ខេត្តតាកែវ ៖ នៅសៀលថ្ងៃទី១១ ខែធ្នូ ឆ្នាំ២០១៨ មានការប្រកាស់ចូលកាន់ដំណែងអភិបាលស្រុកកោះអណ្តែតលោក គិន ភក្តី ពីអភិបាលរងក្រុងដូនកែវជំនួសលោក មាស អ៊ុយ ដែលត្រូវទទួលតំណែងជានាយករដ្ឋបាលសាលាខេត្តតាកែវ ក្រោមអធិបតីភាពលោក អ៊ូច ភា អភិបាលខេត្តតាកែវ ។
លោកអភិបាលខេត្ត បានណែនាំឲ្យមន្រ្តីទាំងអស់ ត្រូវតែសហការគ្នា និងធ្វើការទំនាក់ទំនងឲ្យបានល្អជាមួយនឹងមន្រ្តីចាស់ៗ ដែលពួកគាត់គឺជាអ្នកមានបទពិសោធន៍លើការងារជាច្រើនឆ្នាំ ដោយធ្វើយ៉ាងណាឲ្យការងាររបស់យើងទទួលបានជោគជ័យ។
នាឱកាសនេះដែរ លោក អ៊ូច ភា បានជំរុញដល់លោកអភិបាលស្រុកថ្មី លោក គិន ភក្តី ដែលទើបនឹងទទួលបានការតែងតាំងថ្មី ត្រូវយកចិត្តទុកដាក់ខិតខំបំពេញការងារ ដូចជា ធ្វើការអភិវឌ្ឍន៍បន្ថែមទៀត នៅក្នុងមូលដ្ឋានស្រុកកោះអណ្តែត ឲ្យមានការអភិវឌ្ឍន៍ ពិសេសគឺត្រូវខិតខំប្រឹងប្រែងទប់ស្កាត់ ឲ្យខានតែបានចំពោះរាល់បទល្មើសគ្រប់ប្រភេទ ដោយហាមដាច់ខាតនូវការរជួលដីស្រែ ឲ្យជនបរទេសនៅតាមបន្ទាត់ព្រំដែន។
ជាចុងក្រោយ លោក អ៊ូច ភា ក៏បានផ្តាំផ្ញើដល់លោក គិន ភក្តី ត្រូវចាត់ចែងបម្រើសេវាជូនប្រជាពលរដ្ឋឲ្យបានល្អប្រសើរ ពោលគឺធ្វើយ៉ាងណាឲ្យ អោយមានការពេញចិត្តពីប្រជាពលរដ្ឋពេលដែលពួកគាត់មករកសេវា ហើយត្រូវចងចាំនូវអភិក្រម គឺងូតទឹក ដុសក្អែល ឆ្លុះកញ្ចក់ ព្យាបាល និងវះកាត់៕
ដោយ ៖ សិរីបុត្រ
