ខេត្តសៀមរាប ÷ គរុសិស្សគ្រូបឋមសិក្សា(១២បូក២ ជំនាន់ទី៣៩) ចំនួន ១៣៦នាក់ ក្នុងខេត្តសៀមរាប និងមកពីខេត្តឧត្តរមានជ័យ ដែលបានប្រឡងបញ្ចប់វគ្គបណ្ដុះបណ្ដាលជា គ្រូបឋមសិក្សាទទួល បានលទ្ធផលជាប់ជាស្ថាពរ មួយរយភាគរយ ហើយនឹងត្រូវចេញ ទៅបម្រើការងារតាមសាលាដែលបានជ្រើស ក្នុងក្រុង ស្រុក របស់ខ្លួនចាប់ពីឆ្នាំសិក្សា២០២៣-២០២៤នេះដែលទទួលបានការបណ្ដុះបណ្ដាលគ្រូបឋមសិក្សានៅសាលាគរុកោសល្យ និងវិក្រឹតការខេត្តសៀមរាប ត្រូវបានធ្វើពិធិបិទវគ្គនាព្រឹកថ្ងៃទី៧ ខែកញ្ញា ឆ្នាំ២០២៣ នេះ នៅសាលាគរុកោសល្យ និងវិក្រឹតការខេត្ត ក្រោមអធិបតីរបស់លោកជំទាវ ស៊ិន ណម សមាជិកក្រុមប្រឹក្សាខេត្ត លោកស្រី ម៉ននី រងី្ស អភិបាលរង នៃ គណៈអភិបាលសៀមរាប ។
តាមសេចក្តីរាយការណ៍របស់លោក ឈត់ ឆៀង នាយកសាលាគរុកោសល្យ និងវិក្រឹតការខេត្តសៀមរាប អំពីលទ្ធផលនៃការបណ្តុះបណ្តាលគ្រូបឋមសិក្សាជំនាន់ទី៣៩ បានឲ្យដឹងថា គរុសិស្ស១២ បូក២ បានប្រឡងបញ្ចប់ មានចំនួន ១៣៦នាក់ ស្រី ១០៦នាក់ ក្នុងនោះក្របខណ្ឌខេត្តសៀមរាប ៩២នាក់ ស្រី៧៣នាក់ ខេត្តឧត្តរមានជ័យ ៤៤នាក់ ស្រី ៣៣នាក់ ។ ការបណ្តុះ បណ្តាលតាមប្រព័ន្ធក្រេឌីត រយៈពេល២ឆ្នាំ ដោយមានខ្លឹមសារកម្មវិធីបណ្តុះបណ្តាលសំខាន់ៗ៧ផ្នែក មាន ១៦៣៥ម៉ោង ស្មើ៦២ ក្រេឌិត ។
មានប្រសាសន៍បិទវគ្គបណ្តុះបណ្តាលនោះដែរលោកស្រី ម៉ននី រងី្ស ក៏បានសម្ដែងនូវការ កោតសរសើរចំពោះថ្នាក់ដឹកនាំក្រសួង មន្ទីរអប់រំ យុវជន និងកីឡា ពិសេសគណៈគ្រប់គ្រង បុគ្គលិក គ្រូឧទ្ទេសទាំងអស់នៅសាលាគរុកោសល្យ និងវិក្រឹតការខេត្ត ដែលបាន យកចិត្ត ទុកដាក់ខ្ពស់ ក្នុងការបណ្ដុះបណ្ដាល គ្រូបឋមសិក្សា ជាច្រើនជំនាន់ និងជាច្រើននាក់កន្លង មក ឲ្យទទួលបានលទ្ធផលជោគជ័យល្អប្រសើរគួរជាទីពេញចិត្ត ។
ឆ្លៀតក្នុងឱកាសនោះលោកស្រី បានទាញការចំណាប់អារម្មណ៍ចំពោះសមិទ្ធផលនានាដែលសម្រចបានកន្លងមក ធ្វើឲ្យមានការរីកចម្រើន និងអភិវឌ្ឍលើគ្រប់វិស័យដែលមិនអាចរៀបរាប់អស់នោះ គឺជាមរតកដ៏ថ្លៃថ្លា កើតចេញពីការ ខិតខំប្រឹងប្រែងយកចិត្តទុកដាក់ពីថ្នាក់ដឹកនាំគ្រប់លំដាប់ និង អ្នកពាក់ព័ន្ឋទាំងអស់ របស់រាជរដ្ឋាភិបាលអាណត្តិ មុនរបស់គណបក្សប្រជាជនកម្ពុជា ក្រោមការដឹកនាំប្រកបដោយគតិបណ្ឌិត របស់សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា។
ដោយឡែកខេត្តសៀមរាបជាខេត្តទេសចរណ៍ដ៏មានសក្ដានុពល មួយក៏ មានការរីកចម្រើនគ្រប់វិស័យ ដូច ជាផ្នែកសេវាសាធារណៈ និងឯកជន កម្រិតជីវភាពរបស់ប្រជាជនក៏ប្រសើរឡើង ការរៀបចំហេដ្ឋារចនាសម្ព័ន្ឋ ផ្លូវថ្នល់ ទឹក ភ្លើង បំពេញបានតាមតម្រូវការជាក់ស្ដែង ។
ក្នុងនោះដែរលោកស្រី ម៉ននី រងី្ស ក៏បានលើកនូវអនុសាស្ត្របញ្ចកោណ មានបាវចនា៥,គោលដៅយុទ្ធសាស្ត្រ៥ និងអាទិភាពគន្លឹះ៥ របស់រាជរដ្ឋាភិបាលនីតិកាលទី៧នៃ រដ្ឋសភា ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ។ រចនាសម្ព័ន្ឋគ្រប់គ្រងរាជរដ្ឋាភិបាលនីតិកាលទី៧នៃ រដ្ឋសភាក៏បាន ប្រសូត្រឡើងដោយ ផ្ដល់ឱកាសដល់យុវជន បន្តវេនជំនាន់ក្រោយប្រកបដោយសក្ដានុពល និងមានសមត្ថភាព មានការគាំទ្រ និងផ្ដល់សេចក្ដីទុកចិត្តពីអង្គនីតិបញ្ញត្តិនីតិកាលទី៧ទៀតផង ។
ក្នុងនោះលោកស្រី អភិបាលរងខេត្ត ក៏បានផ្តាំផ្ញើដល់លោកគ្រូអ្នកគ្រូ ប្អូនៗគរុសិស្ស ត្រូវខិតខំប្រឹងប្រែង យកចិត្តទុកដាក់ខ្ពស់ បន្តអភិវឌ្ឍគុណវុឌ្ឍិ និងអភិវឌ្ឍវិជ្ជាជីវៈ ,បន្តអនុវត្តការអប់រំឌីជីថលសម្រាប់បណ្ដុះបណ្ដាលធនធានមនុស្ស ,ត្រូវប្រកាន់ខ្ជាប់នូវទង្វើវិជ្ជ មានក្នុងសង្គម យកចិត្តទុកដាក់អភិវឌ្ឍបន្តលើ ចំណេះដឹង វិជ្ជាជីវៈ ការប្រតិបត្តិវិជ្ជាជីវៈ ការសិក្សាវិជ្ជាជីវៈ និង បន្តយកចិត្តទុកដាក់ណែនាំសិស្សានុសិស្សអំពីសុវត្ថិភាពចំណីអាហារ ពីការគោរពច្បាប់ចរាចរណ៍ ការជៀសផុតពីគ្រឿងញៀន ការអប់រំសីលធម៌ ចរិយាធម៌ គោរពច្បាប់ និងគោរពចាស់ព្រឹទ្ធាចារ្យ លោកគ្រូអ្នកគ្រូជាដើម ៕
ដោយ ÷ ពន្លឺ
