រាជធានីភ្នំពេញ៖ សកម្មភាពចាក់ដីលុបប្រឡាយលូ៥រំលោភយកធ្វើជាកម្មសិទ្ធរបស់លោកឧត្តមសេនីយ៍ឯក ណឹម ម៉េង ម្ចាស់បុរីសូនីសំណ ង់ផ្ទះល្វែងលក់ថ្លើមធំមហាសាល មានចិត្តលោភលន់ណាស់ហ៊ានលួចចាក់ដីរំលោភយកប្រឡាយលូ៥ធ្វើជាកម្មសិទ្ធផ្ទាល់ខ្លួន ដោយអាងខ្នងបង្អែកដ៏រឹងមាំពីនាយឧត្តមសេនីយ៍ ហ៊ីង ប៊ុនហៀង បើទោះបីជាមានបទបញ្ជាពីលោក ឃួង ស្រេង អភិបាលរាជធានីភ្នំពេញបានដាក់ចេញនូវបម្រាមហាមឃាត់មិនឲ្យក្រុមហ៊ុនរបស់លោក ណឹម ម៉េង ចាក់ដីរំលោភលើចំណីដីប្រឡាយលូ៥ កាលពីពេលថ្មីៗកន្លងមកនេះក៏ដោយក៏លោក ណឹម ម៉េង មិនញញើតកោតខ្លាចនឹងអំណាចរបស់លោក ឃួង ស្រេង នោះឡើយ ដោយមហាជនលើកឡើងថាបទបញ្ជាលោក ឃួង ស្រេង សាបដូចទឹកទន្លេ ទោះជាទៅហាមឃាត់យ៉ាងណាក៏គេមិនស្តាប់មិនគោរពធ្វើតាមនោះដែរ ពីព្រោះពួកគេបានស្គាល់ចិត្តស្គាល់ថ្លើមគ្នាអស់ហើយ។
កាលពីថ្ងៃទី១៣ខែវិច្ឆិកាឆ្នាំ២០១៨កន្លងមកនេះ លោកឧត្តមសេនីយ៍ឯក ណឹម ម៉េង រួចម្តងហើយ ដោយរំលោភយកផ្ទៃប្រឡាយអស់ប្រមាណ៥០{cd5bdb6ac61e7c4949e2b5eddea10f7a39669d1fb1784b7fffa616dbf3eb4004}ស្ថិតនៅភូមិឫស្សី១ សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ ពេលនោះលោក ឃួង ស្រេង បានបញ្ជាឲ្យលោក ពេជ្រ កែវមុនី អភិបាលនៃគណៈអភិបាលខណ្ឌមានជ័យ បានដឹកនាំកម្លាំងចម្រុះចុះធ្វើការហាមឃាត់មិនឲ្យចាក់ដីលុបប្រឡាយលូប្រាំ។
ប្រភពបានឲ្យដឹងថាសាលារាជធានីភ្នំពេញកំពុងសាងសង់ស្ថានីយ៍រំដោះទឹកនឹងប្រឡាយលូ៥ដែលមានការកកស្ទះសម្រាមបណ្តាលឲ្យមានជំនន់ទឹកភ្លៀងលិចជារៀងរាល់លើក ហើយការស្តារប្រព័ន្ធផ្លូវទឹកដើម្បីរំដោះទឹកភ្លៀងនារដូវវស្សានេះ បែរជាលោកឧត្តមសេនីយ៍ឯក ផ្កាយ៣ ណឹម ម៉េង បានសម្រុកចាក់ដីលុបប្រឡាយរំដោះទឹកនៅចំណុចភូមិឬស្សី១ សង្កាត់ស្ទឹងមានជ័យ៣ ខណ្ឌមានជ័យ រហូតមកដល់ពេលនេះគេបានសង្កេតឃើញថា ផែនការចាក់ដីរំលោភយកធ្វើជាកម្មសិទ្ធរបស់លោក ណឹម ម៉េង បានសម្រេច១០០{cd5bdb6ac61e7c4949e2b5eddea10f7a39669d1fb1784b7fffa616dbf3eb4004}ជាស្ថាពរហើយ ដែលប្រជាពលរដ្ឋកំពុងព្រួយបារម្ភពីការលិចលង់ផ្ទះសម្បែងនារដូវវស្សាកាន់តែខ្លាំងឡើងថែមទៀត ក្រោយពីក្រុមហ៊ុន ណឹម ម៉េង ម្ចាស់បុរីសូនីចាក់ដីលុបយកធ្វើជាកម្មសិទ្ធដើម្បីសង់ផ្ទះល្វែងលក់។
មតិប្រជាជនបានអោយដឹងថា៖ ប្រឡាយលូប្រាំ(លូ៥)គឺជាសណ្តរស្ទឹងដ៏សំខាន់មួយដែលមានប្រភពជាប់តាំងពីបឹងអន្លុងគង បឹងទួលពង្រ បឹងក្រពើ បឹងត្រពាំងឈូក និងហូរធ្លាក់ចូលស្ទឹងមានជ័យដែលឆ្លងកាត់ផ្លូវវេងស្រេងបង្កប់ដោយលូធំៗចំនួន៥ក្រោមលេសអភិវឌ្ឍន៍ចាក់ដីលុបដូចព្យុះសង្ឃរាកន្លែងខ្លះគេដាក់លូចំនួន៣កន្លែងខ្លះដាក់លូចំនួន២និងកន្លែងខ្លះទៀតដាក់លូតែ១គត់ទើបធ្វើឲ្យស្ទះទឹកជន់លិចជារៀងរាល់ឆ្នាំ ហើយឥឡូវនេះលោកណឹម ម៉េង កំពុងកេងយកចំណេញលើដីប្រឡាយលូ៥ដោយរំលោភបំពានទាំងកំរោលដើម្បីយកធ្វើជាកម្មសិទ្ធរបស់ខ្លួនធ្វើឲ្យប្រឡាយលូ៥សព្វថ្ងៃនៅសល់ប៉ុនស្នូកក្តាមប៉ុណ្ណោះ។
ជុំវិញករណីចាក់ដីលុបប្រឡាយលូ៥ ដែលប្រជាពលរដ្ឋបានលើកឡើងខាងលើនេះ អង្គភាពគេហទំព័រRSKYNEWS.COMយើងពុំអាចធ្វើការទំនាក់ទំនងជាមួយលោកឃួង ស្រេង និងលោកឧត្តមសេនីយ៍ផ្កាយ៣ ណឹម ម៉េង ដើម្បីសុំការបំភ្លឺណាមួយពីលោកទាំងពីរបានទេ ខណៈពេលនេះ អង្គភាពយើងនឹងរង់ចាំទទួលព័ត៌មានគ្រប់ពេលវេលារៀងរាល់ម៉ោងធ្វើការ៕
ដោយ ៖ សិរីបុត្រ
