ខេត្តសៀមរាប ÷ នៅថ្ងៃទី០២ ខែកញ្ញា ឆ្នាំ២០២៣ នេះ សមាគមសហគ្រិនស្រ្តីកម្ពុជា សាខាខេត្តសៀម រាប បានរៀបចំការប្រកួតពានរង្វាន់ស្ត្រីឆ្នើម២០២៣ ដើម្បីលើកកម្ពស់ភាពអង់អាចរបស់ស្ត្រី ក្នុងភាពជាអ្នកដឹកនាំនៃការប្រកបរបរអាជីវកម្ម ការច្នៃប្រឌិត យុទ្ធសាស្ត្រនានា ក្នុងការគ្រប់គ្រងអាជីវកម្មរបស់ខ្លួន។ ការប្រកួតពានរង្វាន់ស្ត្រីឆ្នើមនាពេលនេះមាន ការចូលរួមវាយតម្លៃ និងលើកទឹកចិត្តពីក្រសួង ស្ថាប័ន មន្ទីរ អង្គភាព សមាគមពាក់ព័ន្ធជាច្រើន ដែលបង្ហាញ ពីការគាំទ្រដល់សកម្មភាពចូលរួមរបស់ស្ត្រីនៅក្នុងសង្គម។
លោកស្រី ជា សុកនួន ប្រធានសមាគមសហគ្រិនស្រ្តីកម្ពុជា សាខាខេត្តសៀមរាប បានមានប្រសាសន៍លើកឡើងថាកន្លងមក យើងសង្កេតឃើញថា សមាជិកនៃសមាគមសហគ្រិនស្រ្តីកម្ពុជា មានភាពវៃឆ្លាត និងមានបំណងចង់បង្ហាញដល់មហាជនឱ្យបានដឹងថា ស្រ្តីអាចធ្វើ និងចូលរួមក្នុងសកម្មភាពនានាដូចបុរសបានដូចគ្នា ទោះស្រ្តីជាមេផ្ទះ និងត្រូវមើលថែគ្រួសារក្ដី។ ស្រ្តីគឺជាផ្នែកមួយដ៏សំខាន់ ក្នុងការជំរុញកិច្ចអភិវឌ្ឍន៍សេដ្ឋកិច្ច និងសង្គមប្រកបដោយបរិយា បន្ន និងចីរភាព។
លោកឧកញ៉ាបណ្ឌិត ហ៊ុយ ភៀវ ប្រធានសភាពា ណិជ្ជកម្មខេត្តសៀមរាប-ឧត្តមមានជ័យ ក៏បានបង្ហាញការគាំទ្រចំពោះកម្មវិធីប្រកួតពាន់រង្វាន់ស្ត្រីឆ្នើម ២០២៣នាពេលនេះ ដោយលោកលើកឡើងថា ការប្រកួតប្រជែងរបស់បេក្ខនារីទាំង១២រូប បានបញ្ចេញនូវទេពកោសល្យជាស្ត្រីវ័យឆ្លាតក្នុងការបង្កើត និងគ្រប់គ្រងអាជីវកម្មរបស់ខ្លួន ជាមួយនឹងផលិតផល ឬ សេវាថ្មីៗប្លែកៗពីគ្នា និងអាចឈរនៅលើទីផ្សារបានយូរអង្វែង។ គួរជម្រាបថា សហគ្រិនស្រ្តី ដែលជាបេក្ខភាពចូលរួមប្រកួតប្រជែង និងជាម្ចាស់អាជីវកម្មទាំង ១២រូបនេះ មកពីនៅខេត្តសៀម រាប និងខេត្តបាត់ដំបង។ ចំពោះដំណើរការប្រកួត ពួកគេត្រូវធ្វើបទបង្ហាញរយៈពេល ៨នាទី លើគំនិតផ្ដួចផ្ដើមនិងយុទ្ធសាស្ត្រអាជីវកម្ម ការច្នៃប្រឌិតអាជីវកម្ម យុទ្ធសាស្ត្រទីផ្សារ លទ្ធផលដែលផ្ដល់ដល់សង្គម ទំនាក់ទំនងរវាងអាជីវកម្ម និងគ្រួសារ ព្រមទាំងមានការសួរ និងឆ្លើយសំណួរទៅកាន់បេក្ខនារីម្នាក់ៗរយៈ 10 នាទី ក្នុងការដឹកនាំអាជីវកម្ម គ្រប់គ្រងអាជីវកម្ម និងដំណោះស្រាយបញ្ហាទៅលើអាជីវកម្មផងដែរ៕
ដោយ ÷ ពន្លឺ
