ខេត្តបន្ទាយជ័យ ៖ ប្រធានសាខាកាំកុងត្រូលខេត្តបន្ទាយមានជ័យ លោក សាន វិជ្ជាសារ៉ាវុធ កំពុងអាងមានខ្នងបង្អែករឹងមាំនៅក្នុងអគ្គនាយកដ្ឋានកាំកុងត្រូលនៃក្រសួងពាណិជ្ជកម្ម ទើបហ៊ានធ្វើអ្វីៗស្រេចតែអំពើចិត្តរបស់ខ្លួន។
ប្រភពបានឲ្យដឹងទៀតថា ដោយមានលោក ម៉ក់ ពេជ្ជរិទ្ធ អគ្គនាយកនៃអគ្គនាយកដ្ឋានកាំកុងត្រូល ក្រសួងពាណិជ្ជកម្ម គឺជាខ្នងបង្អែករឹងមាំរបស់លោក សាន វិជ្ជាសារ៉ាវុធ ប្រធានសាខាគយកាំកុងត្រូលខេត្តបន្ទាយមានជ័យ ហេតុនេះហើយទើបលោក សាន វិជ្ជាសារ៉ាវុធ បន្តប្រព្រឹត្តអំពើពុករលួយយ៉ាងគឃ្លើន មិនខ្វល់ពីសុខមាភាពប្រជាជន ។ ប្រភពដែលស្និទ្ធនឹងលោក សាន វិជ្ជាសារ៉ាវុធ បានឲ្យដឹងថា ឈ្មួញដែលបង់លុយតាមការកំណត់តែងតែអាចនាំចូលចំណីអាហារខូចគុណភាពមានលាយសារធាតុគីមីតាមច្រកទ្វារអន្តរជាតិប៉ោយប៉ែត យ៉ាងរលូនហើយឈ្មួញដែលមិនបង់លុយតាមការកំណត់ត្រូវប្រឈមនឹងការបង្ក្រាបយកស្នាដៃជាមិនខាន។
ជាក់ស្តែងកាលពីថ្ងៃទី០៧ ខែធ្នូ ឆ្នាំ២០១៨ មន្ត្រីសាខាកាំកុងត្រូលប្រចាំច្រកទ្វារអន្តរជាតិប៉ោយប៉ែត បានបង្ក្រាបចំណីអាហារខូចគុណភាពមានលាយសារធាតុគីមីដូចជា អណ្ដាតជ្រូក ក្រលៀនជ្រូក ពោះវៀនជ្រូក និងក្រពះជ្រូក រាប់តោន។ ប្រភពពីសមត្ថកិច្ចចូលរួមក្នុងការបង្ក្រាបបានឲ្យដឹងថា ចំណីអាហារដូចខាងលើនេះចំនួន១៥០០គីឡូក្រាមត្រូវបានមន្ត្រីកាំកុងត្រូលចាត់វិធានការបង្ក្រាប ចំណែកម្ចាស់ទំនិញនិងអ្នកអូសរទេះបានរត់គេចខ្លួននៅពេលមន្ត្រីកាំកុងត្រូលចាត់វិធានការត្រួតពិនិត្យ។ ប៉ុន្តែប្រភពខ្លះបានឲ្យដឹងថា មន្ត្រីកាំកុងត្រូលនៅច្រកប៉ោយប៉ែត បង្ក្រាបតែឈ្មួញដែលមិនបង់លុយតាមការកំណត់ប៉ុណ្ណោះ ចំណែកឈ្មួញដែលបង់លុយតាមការកំណត់របស់លោក សាន វិជ្ជាសារ៉ាវុធ ប្រធានសាខាកាំកុងត្រូលខេត្តបន្ទាយមានជ័យ និងបក្ខពួកតែងចៀសផុតពីការបង្ក្រាបយ៉ាងសុខស្រួល។
ប្រភពដែលបានឲ្យដឹងថា ចាប់តាំងពីលោក សាន វិជ្ជាសារ៉ាវុធ ទទួលបានតំណែងជាប្រធានសាខាកាំកុងត្រូលខេត្តបន្ទាយមានជ័យ គឺតែងចាត់វិធានការត្រួតពិនិត្យគុណភាពទំនិញ ជាពិសេសគ្រឿងឧបភោគបរិភោគលើទីផ្សារក្នុងខេត្តបន្ទាយមានជ័យ ជាញឹកញាប់។ ក៏ប៉ុន្តែលោក សាន វិជ្ជាសារ៉ាវុធ ជាអ្នកឃុបឃិតឲ្យឈ្មួញនាំចូលទំនិញខូចគុណភាព ចំណីអាហារខូចគុណភាពមានលាយសារធាតុគីមីតាមច្រកទ្វារអន្តរជាតិប៉ោយប៉ែត និងច្រកផ្សេងៗទៀតយ៉ាងពេញបន្ទុកព្រោះអាងមានខ្នងបង្អែករឹងមាំនៅក្នុងអគ្គនាយកដ្ឋានកាំកុងត្រូលនៃក្រសួងពាណិជ្ជកម្ម។
ផ្ទុយទៅវិញបើលោក សាន វិជ្ជាសារ៉ាវុធ អនុវត្តត្រឹមត្រូវតាមតួនាទីរបស់ខ្លួននោះ គឺគ្មានឈ្មួញណាអាចនាំចូលទំនិញប្រភេទចំណីអាហារខូចគុណភាពមានលាយសារធាតុគីមីមកលក់ចែកចាយតាមទីផ្សារក្នុងខេត្តបន្ទាយមានជ័យ និងទូទាំងប្រទេសបានឡើយ ដូចសព្វថ្ងៃនេះទេ។
ហេតុនេះហើយប្រជាពលរដ្ឋសំណូមពរដល់លោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម គួរពិនិត្យមើលទង្វើមិនប្រក្រតីនិងអំពើពុករលួយរបស់លោក សាន វិជ្ជាសារ៉ាវុធ ប្រធានសាខាកាំកុងត្រូលខេត្តបន្ទាយមានជ័យ ផងទាន បើពឹងផ្អែកអោយលោក ម៉ក់ ពេជ្ជរិទ្ធ អគ្គនាយកនៃអគ្គនាយកដ្ឋានកាំកុងត្រូល វិញគឺដូចអណ្តាត និងធ្មេញទេ ហើយនិងបន្តផ្តល់ឪកាសយ៉ាងពេញទំហឹងសំរាប់លោក សាន វិជ្ជាសារ៉ាវុធ ធ្វើអ្វីៗស្រេចតែទំនើងចិត្ត។
ដោយ ៖ សិរីបុត្រ
