ខេត្តសៀមរាប ÷ នៅវេលាម៉ោង ១៧ និង ៣០ នាទី ថ្ងៃទី២០ ខែសីហា ឆ្នាំ ២០២៣ មានករណីអគ្គីភ័យ ឆាបឆេះផ្ទះមួយខ្នង ស្ថិតនៅចំណុចក្រុមទី០២ ភូមិប្រិយ៍ថ្មី សង្កាត់ទឹកវិល ក្រុងសៀមរាប ខេត្តសៀមរាប ។
តាមការបញ្ជាក់ពីសមត្ថកិច្ចបានឲ្យដឹងថា ម្ចាស់ផ្ទះដែលរងការឆាបឆេះនោះ មានឈ្មោះ ស៊ុត ស្រីលាភ ភេទស្រី អាយុ ២៨ ឆ្នាំ មុខរបរៈនៅផ្ទះ រស់នៅក្នុងភូមិកេីតហេតុខាងលេី ។ ក្នុងករណីអគ្គិភ័យនេះបានបណ្ដាលឲ្យមានការខូចខាតផ្ទះធ្វេីអំពីថ្ម ប្រក់ស័ង្កសី ១ខ្នង ទាំងស្រុង សម្ភារៈប្រេីប្រាស់លក់ដូរនៅក្នុងផ្ទះ សរុបទាំងអស់ប្រហែល ១ ម៉ឺនដុល្លា តែមិនបណ្តាលឲ្យរងគ្រោះថ្នាក់ដល់នរណាម្នាក់ឡេីយ។ ក្នុងការចុះចុះជួយអន្តរាគមន៍ពន្លត់អគ្គីភ័យនេះ កម្លាំងសមត្ថកិច្ចនគរបាលបានប្រេីប្រាស់រថយន្តពន្លត់អគ្គីភ័យ របស់ស្នងការដ្ឋាននគរបាលខេត្តចំនួន ០៣ គ្រឿង។
សមត្ថកិច្ចក៏បានបញ្ជាក់ផងដែរថា ករណីដែលបណ្ដាលឲ្យមានគ្រោះអគ្គិភ័យនេះឡើង បង្កមកពីម្ចាស់ផ្ទះមានការធ្វេសប្រហែស ធ្វើឲ្យផ្ទុះកំប៉ុងហ្គាសតូចក្នុងផ្ទះ ។
ក្នុងនោះដែរកម្លាំងនគរបាល បង្ការពន្លត់ អគ្គីភ័យ សំណូមពរដល់អាជ្ញាធរមូលដ្ឋានឃុំ សង្កាត់ រាល់ផ្លូវថ្នល់នៅតាមមូលដ្ឋាន សូមកុំដាក់របាំងបង្កោលការពារ កុំឲ្យរថយន្តធំចូលនោះ គឺជាវិធានការការពារថែទាំផ្លូវប្រើប្រាស់បានយូរអង្វែង តែដល់មានករណីគ្រោះមហន្តរាយណាមួយកើតឡើង ជាស្តែងដូចថ្ងៃនេះស្រាប់ធ្វើឲ្យមានការរាំងស្ទះដល់ការចុះអន្តរាគមន៍ របស់រថយន្តពន្លត់អគ្គីភ័យ មិនបានទាន់ពេលវេលា ដែលធ្វើឲ្យអន្តរាយដល់ទ្រព្យសម្បត្តិប្រជាពលរដ្ឋ ៕
ដោយ ÷ ពន្លឺ
