ខេត្តរតនគិរី ៖ ប្រតិកម្មខ្លាំងៗរបស់ ឯកឧត្តម ប៊ូ ឡាំ អ្នកតំណាងរាស្ត្រមណ្ឌលរតនគិរី ទៅនឹងអតីតក្រុមហ៊ុនប្រមូលសំរាមកឹមជ្រារបស់លោក ជា គួង ដែលបានយកសំរាមទៅចាក់ចោលពាសវាលពាសកាលនិងកន្លែងសត្វឃាតដ្ឋានគ្មានអនាម័យបង្ក ផលប៉ះពាល់ដល់សុខភាពសាធារណៈយ៉ាងធ្ងន់ធ្ងរ។
ការប្រតិកម្មនេះធ្វើឡើងកាលពីព្រឹកថ្ងៃទី៩ ខែធ្នូឆ្នាំ ២០១៨ ខណៈដែលឯកឧត្តមនិងប្រធានមន្ទីរពាក់ព័ន្ធមួយចំនួនបានអញ្ជើញទៅពិនិត្យជាក់ស្ដែងកន្លែងដែលលោកជាគួងបំពុលបរិស្ថាន (កន្លែងគំនរសំរាម) ភូមិ៣និងតាផ្លើនស្ថិតក្នុងសង្កាត់កាចាញនិងសត្តឃាតដ្ឋាននៅភូមិជ្រីសង្កាត់ឡាបានសៀកក្រុងបានលុង។
ឯកឧត្តមបានសង្កត់ធ្ងន់ថា ” ខ្ញុំមិនបណ្ដែតបណ្ដោយឲ្យប្រជាពលរដ្ឋខ្ញុំរងទុក្ខលំបាកវេទនាទ្រាំរស់ក្នុងបរិយាកាសក្លិនស្អុយអាសោជពីគំនរសំរាមនិងក្លិនស្អុយអសោជពីកន្លែងសត្វឃាតដ្ឋានគ្មានអនាម័យបែបនេះនោះឡើយ ប្រាក់ខែតំណាងរាស្ត្របានមកពីរាស្រ្តដូចនេះខ្ញុំនឹងធ្វើអ្វីៗគ្រប់បែបយ៉ាងដើម្បីសេចក្តីសុខរបស់ប្រជាពលរដ្ឋខ្ញុំ ” ។
ក្នុងនាមតំណាងរាស្ត្រមណ្ឌលរតនគិរីជាពិសេសតំណាងឲ្យប្រជាពលរដ្ឋទាំងបីភូមិខាងលើបានសំណូមពរដល់សម្ដេចអគ្គមហាសេនាបតីតេជោហ៊ុនសែននាយករដ្ឋមន្ត្រីនៃព្រះរាជណាចក្រកម្ពុជាចាត់វិធានការចំពោះបុគ្គលជា គួង ឲ្យប្រមូលសំរាមចេញឲ្យអស់ពីមូលដ្ឋានរបស់ប្រជាពលរដ្ឋខាងលើបើទោះបីជា បុគ្គលជា គួង អស់សិទ្ធក្នុងការប្រមូលសំរាមក៏ដោយក៏មិនអោយបុគ្កលនេះរួចខ្លួនពីការទទួលខុសត្រូវការបំពុលបរិស្ថាននេះដែរ និងសូមឱ្យបុគ្គល ជា គួង អនុវត្តន៍ឲ្យបានត្រឹមត្រូវតាមបទដ្ឋានបច្ចេកទេសបរិស្ថាន។
ពីព្រោះគ្មាននរណាហ៊ានប៉ះពាល់បុគ្គល ជា គួង នោះទេដោយបុគ្គលរូបនេះអាងខ្នងអ្នកធំម្នាក់នៅឯភ្នំពេញចាំការពារជារៀងរហូតមក។ដូច្នេះមានតែសម្ដេចតេជោ ទេដែលមានវិធានការចំពោះលោក ជា គួង នេះបាន។
សូមបញ្ជាក់ថាអតីតក្រុមហ៊ុនប្រមូលសំរាម គឹមជ្រា របស់លោក ជា គួង បានបង្កការក្តៅក្រហាយយ៉ាងខ្លាំងដល់ប្រជាពលរដ្ឋក្នុងក្រុងបានលុងដោយធ្វើការប្រមូលសំរាមមិនទៀងទាត់ចង់ប្រមូលក៏ប្រមូលមិនចង់ប្រមូលទុកឲ្យសំរាមគរដូចភ្នំនៅក្នុងផ្សារក្រុងបានលុងនិងតាមផ្ទះរបស់ប្រជាពលរដ្ឋជាពិសេសបានយកសំរាមទៅចាក់ចោលពាសវាលពាសកាលនៅតាមដីចំការរបស់ប្រជាពលរដ្ឋនិងបានលួចបន្លំកែតម្លៃសៀវភៅបន្ទុកថែមទៀតផង រហូតធ្វើឲ្យខេត្តសម្រេចចិត្តចេញដោយការបញ្ឈប់ក្រុមហ៊ុនប្រមូលសំរាមនេះនៅថ្ងៃទី១ខែតុលាឆ្នាំ២០១៨កន្លងមកនេះ។
ដោយឡែកកន្លែងសត្វឃាតដ្ឋានរបស់បុគ្គលជាគូនេះក៏បានបង្កផលប៉ះពាល់ដល់បរិស្ថានយ៉ាងធ្ងន់ធ្ងរផងដែរដោយបុគ្គលជាគូនេះមិនគោរពតាមបទដ្ឋានបច្ចេកទេសបរិស្ថានបណ្ដែតបណ្ដោយអោយទឹកស្អុយហៀរហូរចូលដីនិងលំនៅដ្ឋានរបស់ប្រជាពលរដ្ឋនៅជុំវិញនោះទោះបីជាខេត្តហៅមកធ្វើការអប់រំណែនាំចំនួន៧លើករួចមកហើយក៏បុគ្គលជាគួងនេះមិនឈឺក្បាលវិលមុខដែរ។
ដោយ៖ សរីបុត្រ
