អាជ្ញាធរ​សង្កាត់​ស្វាយ​ដង្គំ ​រំពឹង​​ថា​ក្រោយ​រៀប​ចំ​ប្រព័ន្ធ​រំដោះ​ទឹក​នឹង​ជួយ​ដោះ​ស្រាយ​បញ្ហា​លិច​សាលា ​និង​ផ្ទះ​ប្រជាពល​រដ្ឋ ​នៅ​មូល​ដ្ឋាន​របស់​លោក ​!   

ខេត្តសៀមរាប ÷ លោក ហ៊ា ហាវ ចៅសង្កាត់ស្វាយដង្គំ ក្រុងសៀមរាប ខេត្តសៀមរាប បានឱ្យដឹងថា សម្រាប់គម្រោងមូនិធិសង្កាត់ស្វាយដង្គំ ឆ្នាំ២០២៣ ផ្ដោតសំខាន់ទៅលើសាងសង់ប្រព័ន្ធរំដោះទឹក ដោយ សារកន្លងមករាល់ពេលមានភ្លៀងធំម្តងៗធ្វើឱ្យមានការលិចលង់មួយរយ:ពេលខ្លី។ ការជន់លិចទីធ្លាសាលារៀនបឋមសិក្សា និងអនុវិទ្យាល័យវត្តចក ធ្វើឱ្យប៉ះពាល់ដល់សិស្ស និងប្រជាពលរដ្ឋ ដែលមានសិស្សមកសិក្សានៅកន្លែងនេះ ជិត ២,០០០នាក់ ពិបាកក្នុងការរៀនសូត្រ ពេលភ្លៀងធ្លាក់ជាប់ជាច្រើនថ្ងៃម្ដងៗ ពេលខ្លះលិចដល់ជិតមួយអាទិត្យ បានបង្ករ ផល់វិបាកដល់ការសិក្សារបស់សិស្ស មួយវិញទៀត ក្នុងភូមិចំនួន៦ ដែលមានប្រជាពលរដ្ឋរស់នៅជាង ៨,០០០ខ្នងផ្ទះ ជាពិសេសភូមិគោកក្រសាំង និងភូមិពោធិ៍បុស្ស ដែលទទួលរងផលវិបាកផងដែរ។

លោកចៅសង្កាត់បានរំពឹងផងដែរថាក្រោយស្ដារប្រឡាយ និងសាងសង់លូរំដោះទឹក ដែលមានប្រវែងជាង ២,០០០ម៉ែត្រ ដែលដាក់ដេញថ្លៃរកក្រុមហ៊ុនទទួលការសម្រាប់គម្រោងចំនួន២នេះ និងជួយ សម្រួលដល់ការសិក្សារបស់សិស្ស និងការរស់នៅរបស់ប្រជាពលរដ្ឋ ក្នុងមូលដ្ឋានរបស់លោក ឱ្យបានកាន់តែប្រសើរឡើងជាងមុន។

សូមជម្រាបថានៅថ្ងៃទី១៧ ខែសីហា ឆ្នាំ២០២៣នេះ គណ:កម្មការលទ្ធកម្មសង្កាត់ស្វាយដង្គំ បានដាក់ឱ្យដេញថ្លៃ គម្រោងស្ដារប្រឡាយ និងគម្រោង សាងសង់លូរំដោះទឹក ដោយមានការចូលរួមពីមន្ត្រីបច្ចេកទេសសាលាខេត្ត មន្ត្រីបច្ចេកទេសក្រុង គណ:កម្មការលទ្ធកម្មសង្កាត់ អ្នកសាព័ត៌មាន រួមនឹងតំណាងក្រុមហ៊ុនដេញថ្លៃ។ ដោយក្រុមហ៊ុន អ៊ី សៀងហៃ ទទួលបានគម្រោងស្ដារប្រឡាយដី ពីខ្សែប្រវែង ១,៨៨០ម៉ែត្រ បាត១,៥ ម៉ែត្រ ជម្រៅ ១,ម៉ែត្រ មាត់លើ៥ម៉ែត្រ លូភ្លោះកាត់ផ្លូវ១កន្លែង និងស្លាកសញ្ញាគម្រោងចំនួន២ ក្នុងតម្លៃប៉ាន់ស្មាន ២៣៤,៧៨៦,៧៧៤រៀល ដោយដេញថ្លៃបានក្នុងតម្លៃ២៣៣,៩០០០,០០០រៀល ។ ចំណែកគម្រោង សាងសង់លូមូលរំដោះទឹក ៣ខ្សែប្រវែង ៦៣៤ម៉ែត្រ លូមុខកាត់ ១ម៉ែត្រ ស្លាកគម្រោងចំនួន៣ ក្នុងតំលៃប៉ាន់ស្មាន ២៥៣,៩១១,៧០០រៀល និងដេញថ្លៃបានក្នុងតម្លៃ ២៣៣,៩០០០,០០០រៀល៕

ដោយ ÷ ពន្លឺ