ខេត្តសៀមរាប ÷ អ្នកទោសជនជាតិចិនម្នាក់ដែលជាមេក្លោងជួញដូរគ្រឿងញៀន ត្រូវបានឧក្រិដ្ឋជនមួយក្រុមធ្វើសកម្មភាពប្លន់រំដោះនៅក្នុងខេត្តសៀមរាបនាព្រឹកថ្ងៃទី១៧ខែសីហាឆ្នាំ២០២៣ នេះដោយក្នុងហេតុការណ៍នោះគឺមានឧក្រិដ្ឋជនមួយក្រុមបានធ្វើសកម្មភាពភ្ជង់រំដោះអ្នកទោសគ្រឿងញៀនម្នាក់ ក្នុងពេលដែលអ្នកទោសរូបនោះត្រូវអនុរក្សពន្ធនា គារបញ្ជូនទៅព្យាបាលធ្មេញនៅគ្លីនិកឯកជនមួយកន្លែងដែលស្ថិតនៅក្នុងភូមិតាភុលសង្កាត់ស្វាយដង្គំក្រុងសៀមរាប។
ហេតុការណ៍ខាងលើនេះគឺមានជនសង្ស័យ១ក្រុមបានបើកបររថយន្តម៉ាក Lexus មករំដោះអ្នកទោសជនជាតិចិនម្នាក់ ឈ្មោះ Chen Hsin Han នៅក្នុងកន្លែងពេទ្យធ្មេញ រួចហើយក៏បានយករថយន្តនោះទៅផ្លុងចោលនៅជិតបុរីអាខេត ក្នុងសង្កាត់ស្វាយដង្គំ ហើយគេចខ្លួនបាត់។
សមត្ថកិច្ចនគរបាលខេត្តសៀមរាប បានឲ្យដឹងថា អ្នកទោសជនជាតិចិនដែល បក្សពួកមករំដោះទៅនោះជាមេក្លោងជួញដូរគ្រឿងញៀន ត្រូវតុលាការកាត់ទោសឲ្យជាប់ពន្ធនាគាររយៈពេល៥២ឆ្នាំ កាលពីឆ្នាំ២០០៩។
ប្រភពបន្តថា ក្នុងពេលអនុវត្តទោសនៅក្នុងពន្ធនាគារ អ្នកទោសរូបនេះមានជំងឺឈឺធ្មេញ ពិបាកទទួលទានអាហារ ត្រូវបានមន្ត្រីពន្ធនាគារបញ្ជូនមកព្យាបាល ប៉ុន្តែមិនធូរស្បើយ ។ លុះដល់ថ្ងៃកើតហេតុ ជាថ្ងៃដែលគ្រូពេទ្យបានណាត់ជួបអ្នកជំងឺ ក្រុមមន្ត្រីពន្ធនាគារខេត្តសៀមរាប ក៏បានបញ្ជូនអ្នកទោសរូបនោះទៅជួបពេទ្យតាមការណាត់។ ក្នុងពេលពេទ្យកំពុងព្យាបាលនោះ ក៏ស្រាប់តែលេចមុខឧក្រិដ្ឋជនមួយក្រុមប្រដាប់ដោយអាវុធ ចូលមកភ្ជង់រំដោះអ្នកទោសបានសម្រេច។
សមត្ថកិច្ចព្រហ្មទណ្ឌកំរិតធ្ងន់ខេត្តសៀមរាប បានឲ្យដឹងថា ក្នុងពេលនេះកម្លាំងសមត្ថកិច្ចកំពុងតាមប្រម៉ាញ់ក្រុមឧក្រិដ្ឋជនទាំងនោះមកផ្តន្ទាទោសឲ្យខានតែបានផងដែរ៕
ដោយ ÷ ពន្លឺ
