ខេត្តស្ទឹងត្រែង ÷ មានសេចក្តីរាយការណ៍មកថា ទីតាំងសិប្បកម្មកែច្នៃ ទ្វារ បង្អួច ខ្នាតយក្សមួយកន្លែងដែលស្ថិតនៅ ភូមិស្រែគរ ឃុំស្រែគរ ស្រុកសេសាន ខេត្តស្ទឹងត្រែង កំពុងតែសំងំលាក់ខ្លួនពួនអាត្មា គៀង គរបក្សពួកឱ្យបំផ្លិចបំផ្លាញសម្បតិ្តធនធានធម្មជាតិ យ៉ាងពេញទំហឹង ខណៈអាជ្ញាធរមន្ត្រីជំនាញពាក់ព័ន្ធ ហាក់រក្សាភាពស្ងៀមស្ងាត់។
ប្រភពបានបន្តថា ទីតាំងសិប្បកម្មខ្នាតយក្សខាងលើនេះជារបស់ លោក សៀង ដែលបានដាក់ទីតាំងធ្វើមកយូរហើយ មិនដែលមានមន្ត្រីជំនាញពាក់ព័ន្ធណាធ្វើការទប់ស្កាត់រឺបង្ក្រាបទេ ដោយសង្ស័យ លោក សៀង ចេះប្រើសិល្ប៍មន្តអាគម បំបាំងភ្នែក ធ្វើឱ្យអស់លោកទាំងនោះដេកលង់លក់អស់ហើយមើលទៅ។
ជាក់ស្តែងនៅថ្ងៃទី១៦ ខែសីហា ឆ្នាំ២០២៣ ក្រុមការងារអ្នកសារព័ត៌មានបានចុះទៅថតផ្តិតយករូបភាពនៅចំនុចទីតាំងខាងលើ ឃើញថាពិតជាសិប្បកម្មខ្នាតយក្សមែន ដោយមានកម្មករ ជាង១០ នាក់ និងស្តុបទុកឈើប្រណិតប្រភេទសុក្រំរាប់សិបគីបនៅក្នុងរោងសិប្បកម្ម មានរៃ មានតាប ពិតជាលក្ខណៈទ្រង់ទ្រាយខ្នាតយក្សមែន។
ប្រភពដដែលបន្តថា សិប្បកម្មកែឆ្នៃ ទ្វា បង្អួចដែលលោក សៀង ធ្វើរួចគឺដឹកចេញយកទៅលក់ចែកចាយ តាមបណ្តាខេត្តនានា ដោយឆ្លងកាត់ក្រុមហ៊ុនវារីអគ្គិសនីសេសានក្រោមពីរបានយ៉ាងរលូន។
ប្រជាពលរដ្ឋសំណូមពរដល់អាជ្ញាធរមន្ត្រីជំនាញពាក់ព័ន្ធក្នុងមូលដ្ឋាន លោក សុវណ្ណ ពិសេដ្ឋ អភិបាលស្រុកសេសាន ឯកឧត្តម ស្វាយ សំអ៊ាង អភិបាលនៃគណៈអភិបាលខេត្តស្ទឹងត្រែង មេត្តាត្រួតពិនិត្យ ទីតាំងសិប្បកម្មកែច្នៃទ្វា បង្អួចរបស់លោក សៀង ខាងលើនេះផងទាន! ព្រោះធនធានធម្មជាតិរបស់រដ្ឋរលាយអស់ហើយ បើនៅតែបណ្តែតបណ្តោយបែននេះទៀត ណាមួយមន្ត្រីជំនាញក្រោមឱវាទមិនហ៊ានបង្ក្រាបនោះទេទាន?៕
