ខេត្តសៀមរាប ÷ នៅព្រឹកថ្ងៃទី១១ ខែសីហា ឆ្នាំ២០២៣ លោកជំទាវ សុខ ណារ៉ូ ពៅហេង អនុប្រធានគណៈកម្មាធិការសាខាកាកបាទក្រហមកម្ពុជាខេត្ត និងជាអនុប្រធានក្រុមការងារឥស្សរជនឆ្នើមថ្នាក់ជាតិសាខាខេត្តសៀមរាប បានដឹកនាំសហការីចុះសួរសុខទុក្ខ និងនាំយកអំណោយមនុស្សធម៌ប្រគល់ជូនដល់គ្រួសារអ្នកជំងឺអេដស៍ ងាយរងគ្រោះបំផុត ចំនួន ១២គ្រួសារ រស់នៅក្នុងឃុំពួក និងឃុំសំរោងយា ស្រុកពួក ខេត្តសៀមរាប ដោយក្នុងមួយគ្រួសារទទួលបាន ៖ អង្ករ៣០គីឡូក្រាម ភួយ១ មុង១ សារុង១ ក្រមា១ មី១កេស ត្រីខ១យួរ និងថវិកា៥ម៉ឺនរៀល។
មានប្រសាសន៍ក្នុងឱកាសនោះ លោកជំទាវ សុខ ណារ៉ូ ពៅហេង បាននាំយកនូវប្រសាសន៍ផ្ដាំផ្ញើ សាកសួរសុខទុក្ខពីសំណាក់ឯកឧត្តម ទៀ សីហា ប្រធានគណៈកម្មាធិការសាខា ដែលតែងតែគិតគូពីសុខទុក្ខ និងសុខភាពបងប្អូនប្រជាពលរដ្ឋក្រីក្រ ពិសេសបងប្អូនអ្នកផ្ទុកមេរោគអេដស៍ និងអ្នកជំងឺអេដស៍។ ជាមួយគ្នានោះដែរ លោកជំទាវក៏បានណែនាំដល់បងប្អូនទាំងអស់ ត្រូវថែរក្សាសុខភាពផ្ទាល់ខ្លួន រស់នៅមានអនាម័យ ពិសេសការប្រែប្រួលអាកាសធាតុនៅរដូវភ្លៀង និងទៅទទួលសេវាថែទាំ និងព្យាបាលដោយថ្នាំប្រឆាំងមេរោគអេដស៍ទៀងទាត់ពេលវេលានៅមណ្ឌលសុខភាព ឬមន្ទីរពេទ្យបង្អែកខេត្ត តាមការណាត់របស់លោក អ្នកគ្រូគ្រូពេទ្យ ពេលធ្វើដំណើរត្រូវប្រុងប្រយ័ត្នពីគ្រោះថ្នាក់ចរាចរ ដែលកើតមានឡើងជាប្រចាំនៅតាមដងផ្លូវ និងត្រូវណែនាំសមាជិកគ្រួសារជៀសវាងពីការសេពគ្រឿងញៀនគ្រប់ប្រភេទ។
ក្នុងឱកាសនោះដែរ លោកជំទាវ ក៏បានធ្វើការផ្សព្ វផ្សាយសារ ៥ចំណុច របស់ឥស្សរជនឆ្នើមថ្នាក់ជាតិមានដូចជា៖ ១.សូមបងប្អូនប្រជាពលរដ្ឋ ត្រូវស្វែងយល់ចំណេះដឹងថ្មីៗពីការចម្លងមេរោគអេដស៍ ក្នុងគ្រួសារ សហគមន៍ និងសង្គមជាតិ ដើម្បីបញ្ចប់ជំងឺអេដស៍នៅឆ្នាំ២០២៥តាមការគ្រោងទុក, ២.ក្នុងករណីសង្ស័យថាបានប្រឈម នឹងការឆ្លង ត្រូវស្វែង រកសេវាផ្តល់ប្រឹក្សា និងសេវាធ្វើតេស្តឈាម ដើម្បីទទួលបានសេវាថែទាំ និងព្យាបាលទាន់ពេលវេលា, ៣.ចំពោះស្រ្តីមានផ្ទៃពោះត្រូវស្វែងរកសេវាថែទាំ និងពិនិត្យផ្ទៃពោះឱ្យបានត្រឹមត្រូវ និងទៀងទាត់តាមការណែនាំរបស់បុគ្គលិកពេទ្យ, ៤.ត្រូវបញ្ចប់ការរើសអើងគ្រប់រូបភាពចំពោះអ្នកផ្ទុកមេរោគអេដស៍ និងអ្នកជំងឺអេដស៍, ៥.ត្រូវការពារជាប្រចាំតាមរយៈការប្រើប្រាស់ស្រោមអនាម័យចំពោះប្រជាពលរដ្ឋទាំងឡាយដែលមានមុខរបរប្រឈមខ្ពស់នឹងការឆ្លងមេរោគអេដស៍៕
ដោយ ÷ ពន្លឺ
