ខេត្តសៀមរាប ÷ ថ្លែងនៅក្នុងកម្មវិធីបើកសិក្ខាសាលាផ្សព្វផ្សាយនីតិវិធីប្រតិបត្តិស្តង់ដាអប្បបរមា ស្តីពី “បរិស្ថានគ្មានផ្សែងបារីក្នុងវិស័យទេសចរណ៍” និងគោលការណ៍ណែនាំស្តីពី “ការរៀបចំទីក្រុងទេស ចរណ៍គ្មានផ្សែងបារី”ដែលធ្វើឡើងនៅខេត្តសៀមរាប នាព្រឹកថ្ងៃទី១១ ខែសីហាឆ្នាំ២០២៣នេះ ឯកឧត្តម ហោ សារុន រដ្ឋលេខាធិការក្រសួងទេសចរណ៍ បានលើកឡើងថាការកសាងបរិស្ថានគ្មានផ្សែងបារីក្នុងវិស័យទេសចរណ៍គឺជាការចូលរួមពង្រឹង ឧត្តមភាពនៃវិស័យទេសចរណ៍កម្ពុជា និងបង្កើនភាពទាក់ទាញតាមរយៈការលើកកម្ពស់សុខុមាលភាព និងការពារ ផលប៉ះពាល់ពីផលិតផល ថ្នាំជក់មកលើសុខភាពប្រជាពលរដ្ឋ អ្នកបម្រើក្នុងវិស័យទេសចរណ៍ និងភ្ញៀវទេសចរ។
ឯកឧត្តមបានបន្តថាការដាក់ឱ្យអនុវត្តគោលការណ៍ណែនាំស្តីពី “ទីក្រុងទេសចរណ៍គ្មានផ្សែងបារី” គឺជាជំហានថ្មីមួយទៀតដែលក្រុង/ស្រុក/ខណ្ឌមានឱកាសកាន់តែច្រើនឡើងថែមទៀតក្នុងការចូលរួមអភិវឌ្ឍវិស័យទេសចរណ៍ក៏ដូចជាកសាងកេរ្តិ៍ឈ្មោះមូលដ្ឋានរបស់ខ្លួននៅក្នុងបេះដូងភ្ញៀវទេសចរជាទីក្រុងទេសចរណ៍គ្មានផ្សែងបារី ផ្ដល់នូវ ផាសុកភាព និងសុខុមាលភាព។
ឯកឧត្តមបានបន្តទៀតថា គោលការណ៍ណែនាំ ស្ដីពី “ការរៀបចំទីក្រុងទេសចរណ៍គ្មានផ្សែងបារី” នេះ ត្រូវបានអនុវត្តសាកល្បងជាគំរូនិងទទួលបានជោគជ័យគួរឱ្យកត់សម្គាល់នៅក្រុងកំពត នៃខេត្តកំពត កាលពីដើមឆ្នាំ២០២៣នេះ។ ក្រុងកំពតត្រូវបានទទួលស្គាល់ជាផ្លូវការពីក្រសួងទេសចរណ៍ អង្គការសុខភាពពិភពលោក (WHO) និងសម្ព័ន្ធត្រួតពិនិត្យថ្នាំជក់អាស៊ីអាគ្នេយ៍ (SEATCA) ព្រមទាំងទទួលបានពាន -ទីក្រុងទេសចរណ៍គ្មានផ្សែងបារី បន្ទាប់ពីអនុវត្តបានល្អតាមគោលការណ៍ណែនាំនេះ និងឆ្លងកាត់ ការចុះត្រួតពិនិត្យនិងវាយតម្លៃផ្ទាល់ពីក្រុមការងារបរិស្ថានគ្មានផ្សែងបារីក្នុងវិស័យទេសចរណ៍ដោយអនុលោមទៅតាមសូចនាករដែលមានចែងនៅក្នុងគោល ការណ៍ណែនាំស្ដីពីការរៀបចំទីក្រុងទេសចរណ៍គ្មានផ្សែងបារី។
ជាមួយគ្នានោះដែរលោកស្រី ម៉ននី រង្សី អភិបាលរងខេត្តសៀមរាប ក៏បានមានប្រសាសន៍ថា ថ្នាំជក់ជាឃាតករលាក់មុខ ដែលផ្តល់ផលវិបាកយ៉ាងច្រើនចំពោះសុខភាពទាំងអ្នកជក់និងអ្នកស្រូបផ្សែងបារីពីគេ។ ហើយអ្នកជក់បារីនឹងក្លាយជាញៀនបារីយ៉ាងឆាប់រហ័សដោយសារសារធាតុនីកូទីនដែលមាននៅក្នុងថ្នាំជក់ដែលអាចបណ្តាលឱ្យស្លាប់ និងមានជំងឺធ្ងន់ធរជាច្រើនដែលបណ្តាលឱ្យមានការប្រឈមនឹងការស្លាប់មុនអាយុ។ នៅលើពិភពលោកយើងនេះថ្នាំជក់បានសម្លាប់ជីវិតមនុស្សច្រើនជាងជំងឺផ្សេងៗទៀត ហើយវាជាមេរោគរាតត្បាតមួយ ដែលបានបំផ្លាញជីវិតមនុស្សរាប់លាននាក់ក្នុងមួយឆ្នាំៗ ក្នុងនោះរាប់សែននាក់បានបាត់បង់ជីវិតដោយសារស្រូបផ្សែងបារីពីគេ។ ប្រសិនបើគ្មានយុទ្ធនាការទប់ស្កាត់ទេ ជំងឺជក់បារី ផ្សែងបារី នឹងផ្តាច់ជីវិតមនុស្សក្នុងមួយឆ្នាំៗរាប់លាននាក់៕
