ខេត្តព្រះវិហារ ៖ ប្រភពព័ត៌មានបានអោយដឹងថាក្រុមហ៊ុនចិនមួយទទួលបានដីសម្បទានសេដ្ឋកិច្ចជាង៥ម៉ឺនហិកតានៅស្រុកឆែប និងស្រុកជ័យសែន ខេត្តព្រះវិហារ សម្រាប់ដាំអំពៅ ។ ជាមួយគ្នានេះគេឃើញ ក្រុមហ៊ុន សំអឿនសុវណ្ណ កំពុងតែបំផុសប្រជាពលរដ្ឋប្រើប្រាស់រណាយន្តរាប់រយគ្រឿងចូលទៅក្នុងព្រៃ ក្រៅដីក្រុមហ៊ុន កាប់ឈើយ៉ាងអាណាធិបតេយ្យ ហើយបានដឹកជញ្ជូនឈើចេញពីតំបន់នោះដូចហែរកឋិនដោយគ្មានសមត្ថកិច្ចជំនាញខាងណាហានបង្ក្រាប ប្រហែលជាត្រូវថ្នាំសណ្តំរបស់ក្រុមហ៊ុនមួយនេះហើយមើលទៅ។
ជាក់ស្តែងពលរដ្ឋរស់នៅស្រុកជ័យសែននិងស្រុកឆែបបានអះអាងថាកាលពីព្រលប់ថ្ងៃទី០៦ ខែធ្នូ ឆ្នាំ២០១៨រថយន្តកែច្នៃប្រភេទបង្គុង២គ្រឿងរបស់ក្រុមហ៊ុន សំអឿន សុវណ្ណ ដឹកជញ្ជូនឈើចូលទៅក្នុងចំការអំពៅរបស់ក្រុមហ៊ុនចិនទៅវិញ។ ប្រការនេះបង្ហាញឲ្យឃើញថាក្រុមហ៊ុន សំអឿន សុវណ្ណ កំពុងសម្រុកកាប់ឈើនិងដឹកជញ្ជូនឈើនៅក្នុងស្រុកឆែប និងស្រុកជ័យសែន យ៉ាងពេញបន្ទុកដោយគ្មានមន្ត្រីអាជ្ញាធរ មន្ត្រីរដ្ឋបាលព្រៃឈើឬសមត្ថកិច្ចណាចាត់វិធានការបង្ក្រាបឡើយ។
ប្រភពពីប្រជាពលរដ្ឋក្នុងស្រុកឆែប និងស្រុកជ័យសែន ខេត្តព្រះវិហារ បានឲ្យដឹងថាមួយរយៈពេលកន្លងមកនេះលោក អឿន ដែលជាប្រធានក្រុមហ៊ុន សំអឿន សុវណ្ណ បានប្រើប្រាស់ និងផ្តល់សិទ្ទិអោយលោក សឿន ចិន ដែលបានជាភ្នាក់ងាររបស់កាសែតជាតិ ជាអ្នកកាន់កញ្ចាប់ថវិការ ដើម្បីរត់ការដោះស្រាយជាមួយអាជ្ញាធរថ្នាក់ខេត្ត រហូតដល់ថ្នាក់ក្រោមបំផុត ក្នុងចេតនាសំរួលអោយការកាប់បំផ្លាញព្រៃឈើក្រៅតំបន់ ដីសម្បទានសេដ្ឋកិច្ចរបស់ក្រុមហ៊ុនចិនបានយ៉ាងរលូន ដោយមិនញញឹតនិងបទបញ្ជារបស់ប្រមុខរាជរដ្ឋាភិបាល សម្តេចអគ្គមហាសេនាបតី តេជោ ហ៊ុន សែន ដែលបានដាក់បទបញ្ជា និងប្រគល់សិទ្ទិជូននាយឧត្តមសេនីយន៏ សៅ សុខា បង្រ្កាប់បទល្មើសព្រៃឈើ ដោយបាញ់រ៉ូកែតពី លើមកដីថែមទៀត។ ក៏ប៉ុន្តែអនុសាស្រ្តនេះមិនត្រូវបាន ក្រុមហ៊ុនសំ អឿន សុវណ្ណ គោរពនិងអនុវត្តន៍តាមនោះទេ តែបែរជាអាជ្ញាធរ និងសមត្ថកិច្ចពាក់ព័ន្ធ ជាពិសេស មន្ត្រីបរិស្ថាន និងរដ្ឋបាលព្រៃឈើ ជុំវិញខេត្តព្រះវិហារ ហាក់កំពុងតែរួមដៃគ្នាដំឡើងរោងចក្រអារឈើខ្នាតយក្ស និងម៉ាស៊ីនធំៗស្ថិតនៅក្នុងស្រុកឆែប ស្រុកជ័យសែន និងស្រុកត្បែងមានជ័យនិងបំផុសអោយប្រជាពលរដ្ឋកាន់ម៉ាស៊ីន រណាយន្តចូលទៅកាប់និងអារឈើ នៅក្នុងព្រៃយ៉ាងគគ្រឹកគគ្រេង។
ដូច្នោះហើយបានជាប្រជាពលរដ្ឋនិងមន្ត្រីក្រៅរដ្ឋាភិបាលងឿងឆ្ងល់ថា តំបន់ដែលក្រុមហ៊ុនចិនទទួលបានដីសម្បទានសេដ្ឋកិច្ចជាង៥ម៉ឺនហិកតា គឺជាតំបន់ដែលមានព្រៃក្រាស់សំបូរទៅដោយឈើប្រណីត ឈើប្រភេទលេខ១ និងឈើប្រភេទលេខ២ ដែលមានទំហំធំៗឬហៅថាឈើហ៊ុប។ មិនតែប៉ុណ្ណោះក្រុមហ៊ុនចិនគឺជាអ្នកទទួលបានដីសម្បទានសេដ្ឋកិច្ច។ ប៉ុន្តែក្រុមហ៊ុន សំអឿន សុវណ្ណ បែរជាធ្វើសកម្មភាពកាប់ឈើនិងដឹកជញ្ជូនឈើចេញពីតំបន់នោះយ៉ាងពេញបន្ទុកតែម្តង។
សេចក្ដីរាយការណ៍ពីសមត្ថកិច្ចពាក់ព័ន្ធក្នុងខេត្តព្រះវិហារ បានឲ្យដឹងថាក្រុមហ៊ុន សំអឿន សុវណ្ណ ដោយបានប្រើប្រាស់ឈ្មោះ សឿន ចិន ដែលមានតួនាទីគ្រាន់តែជាអ្នករាយការណ៏ ឫជាអ្នកយកព័ត៌មានអោយកាសែតជាតិ តែប៉ុណ្ណោះ អោយរត់ការចាត់ចែងគ្រប់សកម្មភាពដ៏ អាក្រក់របស់ខ្លួនដើម្បីបំផ្លាញព្រៃឈើ ដែលជាកេរ្តី៍តំណែលរបស់ដូនតាបន្សល់ទុក និងដើម្បីអោយសត្វព្រៃគ្នាមានជំរករស់នៅផងដែរ។ ហើយក្រុមហ៊ុន សំអឿន សុវណ្ណ មិនត្រឹមតែកាប់ឈើក្នុងទីតាំងដីសម្បទានសេដ្ឋកិច្ចរបស់ក្រុមហ៊ុនចិនប៉ុណ្ណោះទេ គឺមានពាក់ព័ន្ធនឹងបទល្មើសកាប់ឈើនៅតំបន់ព្រៃព្រះរកា និងព្រៃឡង់ផងដែរ។
ប្រភពផ្សេងទៀតបានឲ្យដឹងថា ប្រធានមន្ទីរកសិកម្ម ប្រធានមន្ទីរបរិស្ថាន និងនាយខណ្ឌរដ្ឋបាលព្រៃឈើខេត្តព្រះវិហារ ទំនងជាទទួលបានផលប្រយោជន៍ជាប្រចាំពីម្ចាស់ក្រុមហ៊ុន សំអឿន សុវណ្ណ ទើបបណ្ដោយឲ្យក្រុមហ៊ុន សំអឿន សុវណ្ណ កាប់ឈើនិងដឹកជញ្ជូនឈើចេញពីស្រុកឆែប ស្រុកជ័យសែន និងស្រុកត្បែងមានជ័យ ស្រេចតែអំពើចិត្ត។
ប្រជាពលរដ្ឋរិះគន់ថា ក្រុមហ៊ុនមួយនេះថែមទាំងហ៊ានប្រកាសជាសាធារណៈ ឲ្យប្រជាពលរដ្ឋ រស់នៅក្នុងតំបន់ក្បែរព្រៃនោះ នាំគ្នាចូលទៅកាប់ឈើខុសច្បាប់យកទៅលក់ឲ្យដល់ក្នុងរោងចក្រអារឈើរបស់ពួកគេ និងចេញប្រមូលទិញឈើពីគ្រប់ ទីកន្លែង ក្នុងស្រុកឆែប និងស្រុកជ័យសែន ដោយបើកជាចំហរទាំងយប់ទាំងថ្ងៃដោយគ្មានញញើតច្បាប់ ក្នុងនោះមានសមត្ថកិច្ចជំនាញរដ្ឋបាលព្រៃឈើ ប៉ូលិស អាវុធហត្ថ ដាក់ពង្រាយនៅតាម តូបក្រោមដើមឈើ រង់ចាំរាប់ចំនួនគោយន្តដឹកឈើ និងរថន្តយីឌុបធំៗ និងនៅជួយចាំការពារ សុវត្ថិភាពអ្នកដឹកឈើ
ព្រមទាំងកត់ត្រា លេខរថយន្តណាចម្លែក រាយការណ៍តាមទូរស័ព្ទ ទៅគ្នីគ្នារបស់ពួកគេ ដើម្បីឲ្យតាមឃ្លាំមើលអ្នកចម្លែកចូលទៅក្នុងទឹកដីនៃអាណាចក្រ រោងចក្រអារឈើរបស់ពួកគេទៀតផង។
រាល់ព័ត៌មានខាងលើនេះគេហទំព័ត៌រស្មីក្រុងយើង បានធ្វើការទំនាក់ទំនងទៅសមត្ថកិច្ចគ្រប់ជំនាញនៅថ្ងៃអាទិត្យជាថ្ងៃឈប់សំរាក់ គឺគ្មាន មន្ត្រីណាលើទូរស័ព្ទនិងផ្តល់ព័ត៌មានអោយគេហទំព័រយើងទេ ។ តែក្រុមការងារគេហទំព័ររស្មីក្រុងយើង ទូរស័ព្ទទៅលោក សឿន ចិន ដើម្បីស្វែងយល់ពីការចោទប្រកាន់ទៅលើអ្នកសារព័ត៌មាន តែលោក សឿន ចិន បានប្រាប់ថា៖ ក្រុមហ៊ុនបានប្រជុំកាលពីម្សិលមិញ និងព្រឹកមិញថា តំរូវអោយបងមកដល់កន្លែងទើបអាចនិយាយគ្នាបាន។
ដោយ ៖ សិរីបុត្រ
