ខេត្តកំពង់ឆ្នាំង ÷ ក្នុងមួយសប្តាហ៍កន្លងមកនេះ ក្រុមសមត្ថកិច្ចចម្រុះខេត្តកំពង់ឆ្នាំងបានសហការគ្នាចុះពិនិត្យស្រាវជ្រាវនិងវាស់វែងដីតំបន់៣និងជាដីព្រៃលិចទឹកទុកឲ្យត្រីពងកូនដែលត្រូវជនល្មើស លួចចូលឈូសឆាយភ្ជួររាស់សរុបមានចំនួនប្រមាណ ១៤៤ហិចតានៅក្នុងឃុំច្រណក ស្រុកកំពង់លែង និងបានស្រាវជ្រាវមុខសញ្ញាជនល្មើសនិងអ្នកពាក់ព័ន្ធដើម្បីកសាងសំណុំរឿងបញ្ជូនទៅតុលាការចាត់ ការតាមនីតិវិធីច្បាប់។
លោក ងិន ហ៊ុន ប្រធានមន្ទីរកសិកម្មរុក្ខា ប្រមាញ់និងនេសាទខេត្តកំពង់ឆ្នាំង នៅព្រឹកថ្ងៃទី១៥ ខែកក្កដានេះបានប្រាប់តាមទូរសព្ទឱ្យដឹងថា ក្នុងរយះពេលប៉ុន្មានថ្ងៃកន្លងមកនេះ ក្រុមការងារសមត្ថកិច្ចចំរុះខេត្តកំពង់ឆ្នាំងបានចុះពិនិត្យស្រាវ ជ្រាវនិងវាស់វែងដី តំបន់ ៣ជនល្មើសលួចឈូសឆាយភ្ជួររាស់នៅក្នុងតំបន់ព្រែកសាយឃុំច្រណូក ស្រុកកំពង់លែងចំនួន៥ ចំណុចដែលមានទំហំសរុបប្រមាណ ១៤៤ហិចតា នៅក្នុងទំហំដី តំបន់៣ របស់ខេត្តកំពង់ ឆ្នាំងដែលមានចំនួនសរុបជាង ៥ ម៉ឺនហិចតាដែលបានចុះបញ្ជីគ្រប់គ្រង របស់រដ្ឋ ដែលរដ្ឋបានដកហូតក្នុងអំឡុង ឆ្នាំ២០២១ កន្លងមក។
លោកឲ្យដឹងទៀតថា ក្នុងករណីនេះដែរសមត្ថកិច្ចចម្រុះក៏បានស្រាវជ្រាវរកឃើញជនសង្ស័យមួយ ចំនួនដែលបានពាក់ព័ន្ធនឹងករណីឈូសឆាយនេះនិងមន្ត្រីពាក់ព័ន្ធនៅពីក្រោយខ្នងមួយចំនួនទៀតផងដែរនិងកំពុងកសាងសំណុំរឿងបញ្ជូនទៅកាន់តុលាការចាត់ការតាមនីតិវិធីច្បាប់។
ប្រភពពីក្រុមការងារចម្រុះខេត្តបានមិនដឹងថា នៅក្នុងការចុះពិនិត្យស្រាវជ្រាវវាស់វែងដីតំបន់ ៣ នៅចំណុចដែលគេឈូសឆាយភ្ជួររាស់ខាងលើនេះ ក៏មានក្រុមការងារអន្ត រក្រសួងមកពីថ្នាក់ជាតិ មកចូលរួមពិនិត្យករណីនេះផងដែរ ដែលមានការបញ្ជារដោយ ផ្ទាល់ពីរដ្ឋមន្ត្រីក្រសួងកសិកម្មនិងពីប្រមុខរាជរដ្ឋាភិបាល (សម្ដេចតេជោ ហ៊ុនសែន)។
ប្រភពព័ត៌មានពីប្រជាពលរដ្ឋនៅក្នុងស្រុកកំពង់ លែងបានឲ្យដឹងថាករណីឈូសឆាយភ្ជួររាស់ដីតំបន់ ៣ ដែលរដ្ឋបានដកហូតនៅ ចំណុចខាងលើនេះ អ្នកលួចឈូសឆាយភាគច្រើនគឺជាឈ្មួញរកស៊ីទិញលក់ដីមិនមែនជាប្រជាពលរដ្ឋដែលធ្លាប់អាស្រ័យ ផល លើដីនេះពីមុន ឆ្នាំ២០២១ នោះឡើយ មាន ន័យថាការលួចឈូសឆាយ ដីតំបន់៣ ខាងលើនេះមានមន្ត្រីខិលខូចបើកដៃ ធ្មេចភ្នែកស៊ុមក្រលុំពី ក្រោយខ្នង ព្រោះករណីឈូសឆាយខាងលើនេះគឺគេបានលួចធ្វើតាំងពីអំឡុងខែ ៤ខែ៥ឆ្នាំ ២០២៣ មកម្លេះនេះ ប៉ុន្តែបែរជាមន្ត្រីជំនាញ និងអាជ្ញាធរមូលដ្ឋានធ្វើមិនដឹងមិនឮនឹងទើបភ្ញាក់ផ្អើលពេលក្រុមអ្នកកាសែតចុះទៅថតសាកសួរសម្ភាសន៍និងផ្សាយព័ត៌មាននៅថ្ងៃទី១៣ ខែកក្កដានេះ។ ហើយដីតំបន់៣នៅ ចំណុចនេះកាលពី ១០ឆ្នាំមុនគឺជាព្រៃរនាមលិចទឹកជាសំបុកត្រីពងកូន ហើយក្រោយមកក៏មានការលួចចូលឆាយទន្ទ្រានយកកាន់កាប់ជា បន្តបន្ទាប់។
ករណីនេះមន្ត្រីជំនាញ និងមន្ត្រីពាក់ព័ន្ធមួយចំនួនកំពុងព្រួយបារម្ភពីវាសនានិងតំណែងរបស់ខ្លួន មិនដឹងថារក្សាបានគង់វង្សដែរឬទេ ពិសេសនៅពេលដែលសមត្ថកិច្ចតុលាការកោះហៅជនសង្ស័យមកសាកសួរព័ត៌មានអំពីបទល្មើសខាង លើនេះ មន្ត្រីណាពាក់ព័ន្ធនោះពិតជាមិនអាចលាក់លៀមបានឡើយ។
លោកប្រធានមន្ទីរកសិកម្មខេត្តបានឲ្យដឹងទៀតថា ការទប់ស្កាត់និងបង្ក្រាបករណីនេះរបស់ក្រុមសមត្ថកិច្ចចម្រុះខេត្ត ក៏មាន ការអបអរសាទរពីប្រជាពលរដ្ឋរាប់រយគ្រួសារផងដែរនៅក្នុងឃុំច្រណូក ខណៈដែលពួក គាត់ធ្លាប់អាស្រ័យផលលើដីនេះកន្លងមកមិនហ៊ានចូលកាន់កាប់ឡើយ តែបែរជាមានពលរដ្ឋមួយចំនួនតូច ឈ្មួញនិងមន្ត្រីខូចឆ្លៀតឱកាសបែបនេះទៅវិញ។
សូមបញ្ជាក់ថាកន្លងមកករណីបទល្មើសលើដីតំបន់៣ ជុំវិញបឹងទន្លេសាប បទល្មើសនេ សាទ បទល្មើសព្រៃឈើ សម្ដេចតេជោបានដាក់បទបញ្ជារយ៉ាងតឹងរឹង បើមានកើតឡើងនៅតំបន់ស្រុកខេត្តណាអាជ្ញាធរនិងមន្ត្រីពាក់ព័ន្ធ នៅក្នុងតំបន់នោះត្រូវទទួលខុសត្រូវចំពោះប្រមុខរាជរដ្ឋាភិបាល និងបើមានការពាក់ព័ន្ធនៅពីក្រោយខ្នងនៃបទល្មើសនោះទៀត គឺប្រឈមនឹងការដកតំណែងចោលជៀសមិនរួចឡើយ៕
