ខេត្តសៀមរាប ÷ ក្មេងស្ទាវជិះម៉ូតូ ឌុបគ្នា ៣ នាក់ បើកបរក្នុងល្បឿនលឿន បុកលូ អមឆ្លងផ្លូវចំហៀងខាងលិច បណ្តាលឱ្យស្លាប់ម្នាក់ របួសធ្ងន់២នាក់ បង្កការភ្ញាក់ផ្អើល។
បើតាម លោក វរសេនីយ៍ឯក ទេព ពុំសែន អធិការនគរបាលស្រុកពួកបានប្រាប់តាមទូរស័ព្ទ នៅវេលាម៉ោង១៣:៣០ នាទី រសៀល ថ្ងៃទី១៥ ខែកក្កដា ឆ្នាំ២០ ២៣ នេះថាមានករណីគ្រោះថ្នាក់ចរាចរណ៍ រវាងម៉ូតូដួលខ្លួនឯង នៅចន្លោះពីម៉ោង ២២:០០ នាទី យប់ថ្ងៃទី ១៤ ខែកក្កដា ឆ្នាំ២០២៣ រហូតដល់ម៉ោង ៥:០០នាទី ព្រឹកថ្ងៃទី១៥ ខែកក្កដា ឆ្នាំ២០២៣ លើផ្លូវក្រាលកៅស៊ូ ទៅស្រុកអង្គរជុំ ក្នុងភូមិពង្រថ្មី ឃុំ សសរស្តម្ភ ស្រុកពួក ខេត្តសៀមរាប ទើបសមត្ថកិច្ចទទួលបានព័ត៌មានមក ថាម៉ូតូបុកលូអមឆ្លងផ្លូវចំហៀងខាងលិច បណ្តាលឱ្យស្លាប់ម្នាក់ របួសធ្ងន់២នាក់ ខណៈនោះឱ្យកម្លាំងមន្ត្រីនគរបាលប៉ុស្តិ៍សសរស្ដម្ភ ចុះ ទៅពិនិត្យមើល ដើម្បីប្រមូលភស្តុតាង។
លោក បានបន្ថែមថា ម៉ូតូជនរងគ្រោះ ឌុបមានគ្នា ៣ នាក់ ម៉ាកហុងដាឌ្រីម ផលិតឆ្នាំ 2022 ពណ៌ខ្មៅ គ្មានផ្លាកលេខ បើកបរដោយឈ្មោះ អាត លីហុង ភេទប្រុសអាយុ ១៧ ឆ្នាំ រស់នៅភូមិវត្តដំណាក់ សង្កាត់សាលាកំរើក ក្រុង ខេត្តសៀមរាប ដឹកមនុស្ស០២នាក់ ៖ ទី១-ឈ្មោះ ឈាន មករា ភេទប្រុស អាយុ ១៦ឆ្នាំ នៅភូមិចុងកៅស៊ូ សង្កាត់ស្លក្រាម ក្រុង ខេត្តសៀម រាប និង ទី២-ឈ្មោះ សៀន ស៊ីមិន ភេទ ប្រុស អាយុ១៧ ឆ្នាំ រស់នៅភូមិគោកចាស់ឃុំសសរស្តម្ភ ស្រុកពួក ខេត្តសៀមរាប ដោយបើកបរក្នុងទិសដៅពីជើងទៅត្បូង បានបុកត្រជៀកអម លូឆ្លងផ្លូវចំហៀងខាងលិចបណ្ដាលឱ្យស្លាប់មនុស្ស ០១ នាក់ ឈ្មោះ អាត លីហុង និង របួសធ្ងន់ មនុស្ស ០២នាក់ គឺ៖ ១-ឈ្មោះ សៀន ស៊ីមិន ២-ឈ្មោះ ឈាន មករា គឺមូលហេតុដោយសារ អ្នកបើកម៉ូតូក្នុងល្បឿនលឿនខ្វះការប្រុងប្រយត្ន័។
លោក បញ្ជាក់ថាក្រោយកើតហេតុកម្លាំងផ្នែកជំនាញ សហការណ៍ជាមួយកម្លាំងប៉ុស្តិ៍នគរបាលរដ្ឋបាល ឃុំសសរស្ដម្ភ បានចុះវាស់វែងកន្លែងកើតរួចជួយ សង្គ្រោះជនរងគ្រោះចំនួន២នាក់ដឹកយកទៅសង្គ្រោះនៅមន្ទីរពេទ្យបង្អែកស្រុកពួក ។ រីឯវត្ថុតាងយកមករក្សាទុកនៅអធិការនគរបាល ស្រុកពួក ដើម្បីបន្តតាមនិតិវីធី។
បច្ចុប្បន្នសាកសពជនរងគ្រោះត្រូវបានកម្លាំងនគរ បាលជំនាញស្រុកពួកធ្វើការប្រគល់ជូនក្រុមគ្រួសារ យកទៅធ្វើបុណ្យតាមប្រពីណី។ ចំណែក ជនរងគ្រោះ ដែលជិះម៉ូតូពីក្រោយកំពុងសង្គ្រោះបន្ទាន់ នៅមន្ទីរពេទ្យបង្អែកស្រុកពួក៕
ដោយ ÷ ពន្លឺ
