ខេត្តសៀមរាប ÷ នៅព្រឹកថ្ងៃទី ១០ ខែកក្កដា ឆ្នាំ២០២៣នេះ ឯកឧត្តម ទៀ សីហា សមាជិកគណៈកម្មាធិការកណ្តាល និងជាប្រធានគណៈកម្មា ធិការគណបក្សប្រជាជនខេត្ត និងជាបេក្ខភាពឈរ ឈ្មោះជាតំណាងរាស្ត្រ និង លោកជំទាវ ស៊ិន ណម សមាជិកអច្ចិន្ត្រៃយ៍គណបក្សខេត្ត ជាបេក្ខភាពត្រៀមតំណាងរាស្ត្រមណ្ឌលសៀមរាប នីតិកាលទី៧ នៃរដ្ឋសភា បានចុះជួបធ្វើការសំណេះសំណាលជាមួយ បងប្អូន ជាសមាជិកសមាជិកានៃគណបក្សប្រជាជនកម្ពុជា សង្កាត់ទឹកវិល និងសង្កាត់សាលាកំរើក ប្រមាណជាង ១.៧០០នាក់ នៅទីតាំងពីរផ្សេងៗពីគ្នា ដោយមានការចូលរួមពីឯកឧត្តម លោកជំទាវ អស់ លោក លោកស្រីជាក្រុមការងារចុះជួយសង្កាត់ទាំងពីរផងដែរ ។
ក្នុងឱកាសនោះ ឯកឧត្តម ទៀ សីហា បានពាំនាំមកនូវសេចក្តីនឹករលឹកពីសម្តេចតេជោ ហ៊ុន សែន នាយករដ្ឋមន្រ្តី និងជាប្រធានគណបក្សប្រជាជនកម្ពុជា ព្រមទាំងសម្តេចពិជ័យសេនា ទៀ បាញ់ អនុប្រធានគណបក្សប្រជាជនកម្ពុជា និងជាប្រធានក្រុមការងារគណបក្សចុះមូលដ្ឋាន ខេត្តសៀមរាប ជូនចំពោះសមាជិក សមាជិកា គណបក្សទាំងពីរសង្កាត់ ក្នុង ក្រុងសៀមរាប ។
ឯកឧត្តម ទៀ សីហា បានលើកឡើងថាគណបក្សប្រជាជនកម្ពុជា គឺជាគណបក្សចាស់ទុំខាងនយោ បាយ ដែលបានរំដោះប្រទេសជាតិចេញពីរបបប្រល័យពូជសាសន៍ ប៉ុល ពត ព្រមទាំងបានកសាង និង សម្រេចបាននូវសមិទ្ធផល ជាប្រវត្តិសាស្រ្តយ៉ាងច្រើន សម្រាប់បុព្វហេតុជាតិ និង ផលប្រយោជន៍ របស់ប្រជាជនកម្ពុជា ដែលយើងទាំងអស់គ្នាត្រូវដឹងគុណ និង ត្រូវបន្តនាំគ្នាការពារសមិទ្ធផល និងសន្តិភាពឲ្យស្ថិតនៅគង់វង្ស សម្រាប់កូនចៅរបស់យើងជំនាន់ក្រោយៗទៀត។ សមិទ្ធផលដែលគណ បក្សប្រជាជនកម្ពុជា សម្រេចបាន គឺជាសមិទ្ធផលរួមរបស់ប្រជាជនកម្ពុជាទាំងអស់គ្នា។ ជាក់ស្តែងដូចជាសមទ្ធិផលផ្លូវទាំង៣៨ខ្សែ និង ការស្តារស្ទឹងឡើងវិញ ឲ្យកាន់តែមានសម្រស់ស្រស់ត្រកាល ព្រមទាំងហេដ្ឋារចនាសម្ព័ន្ធផ្លូវថ្នល់ក្នុងសង្កាត់ គឺកើតចេញពីគណបក្សប្រជាជនកម្ពុជា ដែលមានសម្តេច តេជោ ហ៊ុន សែន ជាប្រធានគណបក្សប្រជាជន ។ ម៉្យាងទៀតសមទ្ធិផលជាច្រើនទៀត ក៏ស្តែងចេញពីសកម្មជនក្រុមការងារគណបក្សប្រជាជនកម្ពុជា ចុះជួយមូលដ្ឋានខេត្ត ក្រុង ស្រុក ឃុំ សង្កាត់ ។
ឯកឧត្តមបានបន្តទៀតថា ក្នុងរយៈពេលជាង ៤០ឆ្នាំនេះ ការដឹកនាំប្រទេសកម្ពុជា គឺមិនអាចខ្វះបានទេ ពីការលះបង់របស់ថ្នាក់ដឹកនាំ គណបក្សប្រជាជនកម្ពុជា ពីព្រោះ គណបក្សប្រជាជនកម្ពុជា បានដើរតួនាទីស្នូល និងជាប្រវត្តិសាស្រ្ត ក្នុងការផ្សះផ្សារ និងបង្រួបបង្រួមប្រទេសជាតិ ឲ្យរួបរួមគ្នាតែមួយក្រោមដំបូលម្លប់សន្តិភាព របស់សម្តេចតេជោនាយករដ្ឋមន្រ្តី ។
ក្នុងនោះដែរឯកឧត្តមក៏បានផ្តាំផ្ញើដល់សមាជិកសមាជិកាទាំងពីរសង្កាត់ ត្រូវចូលរួមជម្រុញដល់សមាជិកក្រុមគ្រួសារ និង បងប្អូនប្រជាពលរដ្ឋក្នុងមូលដ្ឋាន ដែលមានឈ្មោះបោះឆ្នោត សូមអញ្ជើញទៅបោះឆ្នោត នៅថ្ងៃទី២៣ ខែកក្កដា ឆ្នាំ២០២៣ ខាងមុខនេះឲ្យបានគ្រប់ៗគ្នា ដែលជាព្រឹត្តិការណ៍ជាប្រវត្តិសាស្រ្ត ដែលប្រជាជនកម្ពុជាទាំងអស់ ត្រូវបំពេញ កាតព្វកិច្ចរបស់ខ្លួនជាពលរដ្ឋម្នាក់ ក្នុងការសម្រេចចិត្តបោះឆ្នោត ជូនគណបក្សប្រជាជនកម្ពុជា ដើម្បីបន្តថែរក្សាការពារសន្តិភាព និងការអភិវឌ្ឍន៍ប្រទេសជាតិ ឲ្យកាន់តែមានការរីកចម្រើន និង គាំទ្រសម្តេចតេជោ ហ៊ុន សែន ជាបេក្ខភាពនាយករដ្ឋមន្ត្រី និង ឯកឧត្តមបណ្ឌិត ហ៊ុន ម៉ាណែត ជាបេក្ខភាពនាយករដ្ឋមន្ត្រីទៅថ្ងៃអនាគត ៕
ដោយ ÷ ពន្លឺ
