ខេត្តសៀមរាប ÷ នាព្រឹកថ្ងៃទី០៤ ខែកក្កដា ឆ្នាំ២០២៣ នេះឯកឧត្តម ស៊ាន បូរ៉ាត់ រដ្ឋលេខាធិការក្រសួងអប់រំយុវជននិងកីឡា តំណាងដ៏ខ្ពង់ខ្ពស់ឯកឧត្តមបណ្ឌិតសាស្ត្រាចារ្យ ហង់ជូន ណារ៉ុន រដ្ឋមន្ត្រីក្រសួងអប់រំយុវជននិងកីឡា បានអញ្ជើញជាអធិបតី ក្នុងពិធីប្រគល់សញ្ញាបត្រជូននិស្សិតជ័យលាភីពូកែ គ្រប់កម្រិត ដល់សមណៈនិសិ្សត និង និសិ្សត ចំនួន ២.១៤១អង្គ/រូប ថ្នាក់បរិញ្ញាបត្រ ,បរិញ្ញាបត្ររង និង បរិញ្ញាបត្រជាន់ខ្ពស់ នៃសាកលវិទ្យាល័យឯកទេសនៃកម្ពុជាសាខាខេត្តសៀមរាប ដោយមានវត្តមានចូលរួមពីឯកឧត្តម លោកជំទាវ ជារដ្ឋលេខាធិការ អនុរដ្ឋលេខាធិការ សមាជិកក្រុមប្រឹក្សាខេត្ត គណៈអភិបាលខេត្ត អស់លោកលោកស្រីថ្នាក់ដឹកនាំមន្ទីរ អង្គភាព អាជ្ញាធរក្រុង ស្រុកចូលរួមផងដែរ ។
មានប្រសាសន៍សំណេះសំណាលនាឱកាសនោះ ឯកឧត្តម ស៊ាន បូរ៉ាត់ បានគូសបញ្ជាក់ថា ក្រោមម្លប់នៃសន្តិភាព ព្រះរាជាណាចក្រកម្ពុជា បានសម្រេចនូវសមិទ្ធផលថ្មីៗជាច្រើន លើមាគ៌ានៃការអភិវឌ្ឍ ទោះបីជាជម្ងឺកូវីដ-១៩ មិនទាន់ត្រូវបានលុបបំបាត់ទាំងស្រុងនិងត្រូវទទួលរងឥទ្ធិពល ពីការវិវត្តដ៏ស្មុគស្មាញនៃសភាពការណ៍អន្តរជាតិក្ដី ក្នុងនោះពាក្យ ស្លោកអរគុណសន្តិភាព អរគុណនយោបាយ ឈ្នះ ឈ្នះ ត្រូវបានគាំទ្រ ដោយប្រជាពលរដ្ឋគ្រប់ទិសទីសន្តិភាព ស្ថេរភាពនយោបាយ និងសន្តិសុខនេះហើយដែលជាមូលដ្ឋានគ្រឹះសម្រាប់ការអភិវឌ្ឍ និងការរស់នៅដ៏សុខដុមរមនារបស់ប្រជាពលរដ្ឋ ។
ឯកឧត្តមរដ្ឋលេខាធិការ បានចាត់ទុកជោគជ័យ និងការខិតខំទាំងអស់នេះ និង ការដាក់ចេញនូវយុទ្ធសាស្ត្រច្បាស់ៗថា បានក្លាយជាចលករ និងជាមូល ដ្ឋានដ៏រឹងមាំ លើការអភិវឌ្ឍធនធានមនុស្សប្រកប ដោយគុណភាព សមត្ថភាព និងគុណធម៌ គឺជាកត្តាគន្លឹះ សម្រាប់ទ្រទ្រង់កំណើនសេដ្ឋកិច្ច និង ភាពប្រកួតប្រជែងរបស់ប្រទេស ទាំងក្នុងពេលចំពោះមុខ ទាំងសម្រាប់អនាគត ពិសេស ក្នុងពេលដែលកម្ពុជា ឈានចូលទៅជាប្រទេស មានចំណូលមធ្យមកម្រិតទាបក្នុងពេលដ៏ខ្លីខាងមុខ ហើយបន្តឡើងទៅជាប្រទេស មានចំណូលមធ្យមកម្រិតខ្ពស់ នៅឆ្នាំ ២០៣០ និង ជាប្រទេសអភិវឌ្ឍនៅឆ្នាំ២០៥០ តាមចក្ខុវិស័យវែងឆ្ងាយរបស់រាជរដ្ឋាភិបាលកម្ពុជា។
ឯកឧត្តមបន្តថាការរីកចម្រើនសេដ្ឋកិច្ចខាងលើនេះក៏បានធ្វើឲ្យរីកចម្រើនវិស័យអប់រំ បានឈានប្រកប ដោយភាពស្វាហាប់ព្រមៗគ្នា ។ ជាក់ស្ដែងគឺការអភិវឌ្ឍធនធានមនុស្ស ចាប់តាំងពីកម្រិតមត្តេយ្យរហូតដល់អនុវិទ្យាល័យ វិទ្យាល័យ ជំនាញវិជ្ជាជីវៈ ឧត្តមសិក្សា និងថ្នាក់ក្រោយឧត្តមសិក្សា ។ ឯកឧត្តមបានកត់សម្គាល់ផងដែរថា ជាក់ស្ដែងនិស្សិតជ័យលាភីចំនួន២.១៤១អង្គ/រូបនាពេលនេះ គឺជាធនធានមនុស្សដ៏មានសារៈសំខាន់មិនអាចខ្វះបាន សម្រាប់ចូលរួមបំពេញបន្ថែមទៅលើ ការរីកចម្រើនវិស័យផ្សេងៗសម្រាប់ជាតិ និងប្រជាជនកម្ពុជា ហើយអ្នកទាំងនេះនឹងត្រូវចេញទៅបំពេញការងារ តាមជំនាញក្នុងសង្គម តាមរយៈចំណេះដឹង និងចំណេះធ្វើរបស់ខ្លួនទទួលបានពីសាកលវិទ្យាល័យ ដោយយកទៅអនុវត្តជាក់ស្តែង និង ដកពិសោធន៍ផ្ទាល់ និង សិក្សាស្រាវជ្រាវកែលម្អបន្ថែមទៀត ពីអ្នកប្រកបការងារជុំវិញខ្លួន ។ ការអភិវឌ្ឍធនធានមនុស្ស ជាពិសេសយុវជន គឺសំដៅទៅលើការកសាងសមត្ថភាពខាង ចំណេះដឹង ចំណេះធ្វើព្រមទាំងសមត្ថភាពក្នុងការស្រាវជ្រាវ និងការអភិវឌ្ឍ ទន្ទឹមនឹងការលើកស្ទួយគុណភាពខាងសុខភាព កាយសម្បទា សីលធម៌ ស្មារតីទទួលខុសត្រូវ និងមនសិការស្នេហាជាតិ និង វិជ្ជាជីវៈ ដោយគ្មានការរើសអើងខាងយេនឌ័រ រួមជាមួយនឹងប្រព័ន្ធសុវត្ថិភាពសង្គមគត់មត់ ព្រមទាំងផ្តល់ឱកាសស្មើៗគ្នាដល់កុមារ និងយុវជន ក្នុងការទទួលការអប់រំទាំងអស់ ។ ក្នុងនោះឯកឧត្តមក៏បានផ្តល់នូវ អនុសាសន៍ល្អៗមួយចំនួន ជាមូលដ្ឋានរឹងមាំ ដល់សាស្ត្រាចារ្យ សមណៈនិសិ្សត និសិ្សតទាំងអស់ ក្នុងការពង្រឹង ពង្រីកនូវគុណភាពអប់រំ ឆ្ពោះទៅលើកកម្ពស់សេដ្ឋកិច្ចជាតិឲ្យកាន់តែមានភាពរីកចម្រើន ហើយសមណៈនិសិ្សន និសិ្សតទាំងអស់ ក៏ត្រូវបន្តការសិក្សារបស់ខ្លួន ស្របតាមទិសស្លោក «ការសិក្សារៀនសូត្រគឺធ្វើគ្មានទីបញ្ចប់ទេ»។ ម៉្យាងទៀត យើង គ្រប់រូប ត្រូវរួមសាមគ្គីគ្នា ក្នុងការថែរក្សាសន្តិភាពឲ្យបានគង់វង្សជាអមតៈ និង សូមអញ្ជើញទៅបោះឆ្នោតជ្រើសតាំងតំណាងរាស្ត្រនីតិកាលទី៧ នៃរដ្ឋសភា នាថ្ងៃទី ២៣ ខែ កក្កដា ឆ្នាំ២០២៣ខាងមុខនេះ ឲ្យបានគ្រប់ៗគ្នាផងដែរ ។ សូមបញ្ជាក់ផងដែរថាសម្រាប់និស្សិតជ័យលាភីដែលទទួលបានសញ្ញាបត្រនាឱកាសថ្ងៃនេះ មានថ្នាក់បរិញ្ញាបត្ររងចំនួន១៣១អង្គ/រូប , ថ្នាក់បរិញ្ញាបត្រចំនួន ១.៨៨៦អង្គ/រូប និងថ្នាក់បរិញ្ញាបត្រជាន់ខ្ពស់ ចំនួន៩៦នាក់ផងដែរ៕
ដោយ ÷ ពន្លឺ
