ខេត្តកំពង់ឆ្នាំង ៖ កាលពីថ្ងៃទី១៦ ខែមិថុនា ឆ្នាំ២០២៣ លោក យ៉ែម លក្ខិណា អភិបាលស្រុក នេះបានបន្តចុះសួរសុខទុក្ខ និងនាំយកអំណោយជាសារ៉ុងផ្តល់ជូនប្រជាពលរដ្ឋរស់នៅក្នុងឃុំផ្លូវទូកចំនួ នជាង៥០០គ្រួសារ។
លោក យ៉ែម លក្ខិណា អភិបាលស្រុកកំពង់លែង បានប្រាប់តាមទូរស័ព្ទកាលពីល្ងាចថ្ងៃទី១៦ ខែមិថុនា ឆ្នាំ២០២៣ នេះអោយដឹងថា ក្រុមការងាររដ្ឋបាលស្រុកកំពង់លែង សហការជាមួយអាជ្ញាធរមូលដ្ឋាន ដឹកនាំដោយរូបលោកផ្ទាល់បានបន្តចុះសួរសុខទុក្ខ និងនាំយកសម្ភារៈជាសារ៉ុងជូនដល់ប្រជាពលរដ្ឋនៅតាមខ្នងផ្ទះ ស្ថិតក្នុងភូមិពាមខ្នង ភូមិថ្នល់ឈើទាល និងភូមិស្លត ស្ថិតក្នុងឃុំផ្លូវទូក ស្រុកកំពង់លែង មានចំនួន ៥២៨គ្រួសារ។
លោកបានបន្តឲ្យដឹងទៀតថា ការចុះសួរសុខទុក្ខ និងនាំយកអំណោយជាគ្រឿងឧបភោគបរិភោគ ឬសម្ភារៈប្រើប្រាស់ និងថវិកាជូនដល់ពលរដ្ឋ រស់នៅក្នុងមូលដ្ឋានរបស់លោកគឺមិនមែនធ្វើតែនៅពេលនេះទេក្នុងនាមលោកជាអាជ្ញាធរ និងថ្នាក់ដឹក នាំលោកតែងតែបានយកចិត្តទុកដាក់ពីសុខភាពនិងជីវភាពរស់នៅប្រចាំថ្ងៃរបស់បងប្អូនប្រជាពលរដ្ឋទាំងអស់តាំងពីលោកឡើងកាន់តំណែងជាអភិបាលស្រុកកំពង់លែងមក។
ទាំងនេះក៏ជាការអនុវត្តតាមការណែនាំដ៏ខ្ពង់ខ្ពស់របស់ឯកឧត្តមអភិបាលខេត្ត ដែលលោកតែងតែគិតគូរអំពីសុខទុក្ខរបស់ប្រជាពលរដ្ឋរាល់ការប្រជុំម្ដងៗលោកក៏តែងតែក្រើនរំលឹកដល់អាជ្ញាធរគ្រប់មូលដ្ឋានជាប្រចាំ។
ក្នុងឱកាសចុះសួរសុខទុក្ខប្រជាពលរដ្ឋក្នុងមូលដ្ឋានខាងលើនេះដែរ ក្រុមការងារក៏បានជួយផ្ទៀងផ្ទាត់ប័ណ្ណព័ត៌មានសម្រាប់ការបោះឆ្នោតខាងមុខនេះ និងជួយរំលឹកអំពីកាលបរិច្ឆេទ នៃថ្ងៃបោះឆ្នោតដល់ប្រជាពលរដ្ឋដែលពួកគាត់រស់នៅក្នុងមូលដ្ឋានដាច់ស្រយាល ខ្លាចក្រែងមានការភ្លេច ភ្លាំង នៅថ្ងៃបោះឆ្នោតជ្រើសរើសតំណាងរាស្ត្រនីតិកាលទី៧ ដែលប្រព្រឹត្តទៅនៅថ្ងៃទី២៣ ខែកក្កដា ឆ្នាំ២០២៣ ខាងមុខនេះ៕
ដោយ ÷ ដារ៉ាស្រ៊ុន
