ខេត្តសៀមរាប ÷ នៅវេលាម៉ោង ៤ និង ១០ នាទីព្រឹកថ្ងៃទី១៨ ខែ មិថុនា ឆ្នាំ២០២៣ មានករណីគ្រោះថ្នាក់ចរាចរណ៍មួយ ត្រង់ចំណុចបង្គោលលេខ ៣៤០ -៣៤១ ក្នុងភូមិប៉ាក់ប៉ាន់ ឃុំសសរស្តម្ភ ស្រុកពួក ខេត្តសៀមរាប ដែលបង្កឡើងដោយរថយន្តក្រុង ៤៥ កៅអី ដឹកភ្ញៀវ របស់ក្រុមហ៊ុន រស្មីភ្នំពេញអ៉ិចប្រេស ដឹកអ្នកដំណើរ ខណៈអ្នកបើកបរងងុយដេក មួយភាំង បានរ៉េចង្កូត ក្រឡាប់ស្នាមភ្លោះ បានបណ្តាលឲ្យមានអ្នករងរបួស ធ្ងន់ ស្រាល ១០នាក់ ដែលបង្កឡើងដោយខ្លួនឯង ហើយចំពោះអ្នកបើកបរ បានគេចខ្លួនបាត់ពីកន្លែងកើតហេតុ បន្សល់ទុកនៅរថយន្ត ដែលផ្ទុកទៅដោយភ្ញៀវជាតិ និង ជនបរទេសផងដែរ ។
នៅក្នុងហេតុការណ៍គ្រោះថ្នាក់ចរាចរណ៍នេះដែរ ក៏មានវត្តមានរបស់ឯកឧត្តមអ្នកឧកញ៉ា សៀង ណាំ អ្នកតំណាងមណ្ឌលសៀមរាប បានអញ្ជើញទៅដល់កន្លែងកើតហេតុ ព្រមទាំងបានឲ្យកម្លាំងសមត្ថកិច្ច ប្រញ៉ាប់យករថយន្តសង្រ្គោះបញ្ជូនបងប្អូនរងគ្រោះថ្នាក់ ទៅកាន់មន្ទីរពេទ្យផងដែរ ។
បើតាមប្រសាសន៍របស់លោកវរសេនីយ៍ឯក ទេព ពុំសែន អធិការនគរបាលស្រុកពួក បានឲ្យដឹងថា ករណីគ្រោះថ្នាក់ចរាចរណ៍ ដែលបង្កឡើងដោយខ្លួនឯងនោះ ដោយរថយន្តម៉ាកហ៊ីណូ ពណ៌ លឿង ពាក់ផ្លាកលេខ ភ្នំពេញ3B- 4999 បើកបរពីទិស ខាងកើត ទៅទិសខាងលិចអ្នកបើកបរពុំស្គាល់អត្តសញ្ញាណរថយន្តរបស់ក្រុម ហ៊ុន រស្មីភ្នំពេញ អ៉ិចប្រេស បានក្រឡាប់ធ្លាក់ទៅស្នាមភ្លោះ បណ្តាលឲ្យអ្នករួមដំណើរក្នុងរថយន្ត ទាំង២២ នាក់ ស្រី១២ នាក់ រងរបួសធ្ងន់ ស្រាល ។ ចំណែកអ្នកបើកបររថយន្ត បានរត់គេចខ្លួនបាត់ បន្សល់ទុកនៅរថយន្ត និង ជនរងគ្រោះនៅកន្លែងកើតហេតុ ។
លោកបានបញ្ជាក់ថា មនុស្ស ប្រុស ស្រី និង ជនបរទេស ហើយក្នុងនោះ មានមនុស្សរងរបួសធ្ងន់ ស្រាល ចំនួន១០ នាក់ (ធ្ងន់ ៣ នាក់ ស្រី២នាក់ -ស្រាល ៤នាក់ (ជនជាតិបរទេស ប្រុស ៣ នាក់ ( អាឡឺម៉ង់ ១ នាក់ ឥណ្ឌា ២នាក់) ត្រូវបានដឹកយកទៅសង្គ្រោះនៅមណ្ឌលសុខភាពសសរស្តម្ភ ។ លោកបន្ថែមថា-ខូចខាតរថយន្ត១គ្រឿង និង ម៉ូតូ ១ គ្រឿង ដែលផ្ទុកនៅក្នុងរថយន្តក្រុង ។ក្នុងករណីគ្រោះថ្នាក់ចរាចរនេះ បណ្តាមកពីអ្នកបើកបរងងុយដេក ។
ក្រោយពេលកើតហេតុកម្លាំងជំនាញបានចុះវាស់វែង ដល់កន្លែងកើតហេតុ និងបានរៀបចំ កសាងសំណុំរឿង និងដកហូតវត្ថុតាងពាក់ព័ន្ធ យកទៅរក្សាទុកនៅអធិការដ្ឋាននគរបាលស្រុក ពួក រង់ចាំដោះស្រាយ ទៅតាមផ្លូវច្បាប់។ រីឯជនបង្ក ជាអ្នកបើកបរ កម្លាំងនគរបាលជំនាញ កំពុងស្រាវជ្រាវ ស្វែងរក និង សហការជាមួយ ក្រុមហ៊ុន រថយន្តក្រុង ដើម្បីឲ្យចូលខ្លួន មកដោះស្រាយទៅតាមផ្លូវច្បាប់ ៕
