ពោធិសែនជ័យ ៖ កំលាំងល្បាតរបស់នគរបាលរដ្ឋបាលកាកាបទី២ នៃអធិការនគរបាលខណ្ឌពោធិសែនជ័យបានចេញល្បាតការពារសុវត្ថភាពជូនប្រជាពលរដ្ឋនៅក្នុងដែនសមត្ថកិច្ចរបស់ខ្លួននៅវេលាម៉ោង១.០០នាទីថ្ងៃទី១៨ ខែ មករា ឆ្នាំ ២០១៨ រួមមានលោកអនុសេនីយ៏ត្រី ម៉ៃ រស្មី លោកលោកអនុសេនីយ៏ត្រី សោម សាម៉ាឌី លោកអនុសេនីយ៏ត្រី វ៉ន វិបុល និងលោក ព្រិន្ទបាលទោ ឃីន សុខមាន បានធ្វើការសហការជាមួយប្រជាការពារភូមិកាកាប បានប្រទះឃើញជនសង្ស័យចំនួន៤នាក់កំពុងដើរនៅតាមបណ្តោយផ្លូវប៉េតុងភូមិកាកាប សង្កាត់កាកាបទី២ ខណ្ឌពោធិសែនជ័យ ពេលនេះកំលាំងសមត្ថកិច្ចយើងមានការសង្ស័យក៏ធ្វើការត្រួតពិនិត្យ និងឆែកឆេរលើខ្លួនជនសង្ស័យពុំមានអ្វីនេះទេ ក្រោយមកសមត្ថកិច្ចបាននាំខ្លួនជនសង្ស័យទាំង៤នាក់មកប៉ុស្តិនគរបាលរដ្ឋបាលកាកាបទី២ដើម្បីសារសួរបន្ថែមតាមនិតិវិធីបន្ត។
ជនសង្ស័យទាំង៤នាក់រួមមានឈ្មោះទី១.ឈ្មោះ ម៉ុន សុខសាន ហៅជាងតោន ភេទប្រុស អាយុ២៥ឆ្នាំ មុខរបរមិនពិតប្រាកដ ស្នាក់នៅបន្ទុបជួលភូមិក្បាលដំរីទី២ សង្កាត់កាកាបទី២ ខណ្ឌពោធិសែនជ័យ ទី២.ឈ្មោះ ឈឹម រតនា ភេទប្រុស អាយុ២៩ឆ្នាំ មុខរបរកម្មកររោងចក្រ ស្នាក់នៅបន្ទុបជួល ក្រុមទី៨ ភូមិចំការឪឡឹក២ សង្កាត់កាកាបទី២ ខណ្ឌពោធិសែនជ័យ ទី៣. ឈ្មោះ រ៉ា នី អាយុ ១៨ឆ្នាំ មុខរបរកម្មកររោងចក្រ ស្នាក់នៅបន្ទុបជួល ក្រុមទី៨ ភូមិចំការឪឡឹក២ សង្កាត់កាកាបទី២ ខណ្ឌពោធិសែនជ័យ និងទី៤.ឈ្មោះ អឿង បូរ៉ា ភេទប្រុស អាយុ១៨ឆ្នាំ មុខរបរដើរតុការ ស្នាក់នៅបន្ទុបជួល ភូមិក្បាលដំរីទី២ សង្កាត់កាកាបទី២ ខណ្ឌពោធិសែនជ័យ ។
ក្រោយការសួរនាំនិងពិនិត្យលើទឹកនោមមកគឺរកឃើញមានការប្រើប្រាស់នូវសារធាតុញៀនពិតប្រាកដមែន ដូចនេះកំលាំងសមត្ថកិច្ចនៃនគរបាលរដ្ឋបាលកាកាបទី២ បានកសាងសំណុំរឿងនៃជនសង្ស័យទាំង៤នាក់ទៅអោយផ្នែកជំនាញប្រឆាំងគ្រឿងញៀននៃអធិការគរបាលខណ្ឌពោធិសែនជ័យ ដើម្បីចាត់ការបន្តតាមនិតិវិធីច្បាប់៕
ដោយ ៖ វិចិត្រ
