អបអរសាទរព្រះរាជពិធីចម្រើនព្រះជន្មវស្សា សម្តេចព្រះមហាក្សត្រី

ខេត្តសៀមរាប ÷ ដើម្បីអបអរសាទរព្រះរាជពិធីចម្រើនព្រះជន្មវស្សា សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ព្រះប្រធានកិត្តិយសកាក បាទក្រហមកម្ពុជា គម្រប់ខួប៨៧ យាងចូល ៨៨ព្រះវស្សា នាព្រឹកថ្ងៃទី ១៦ ខែមិថុនា ឆ្នាំ២០២៣ នៅបរិវេណវត្តរលួស ឃុំរលួស ស្រុកប្រាសាទបាគង ខេត្តសៀមរាប បានរៀបចំពិធីសូត្រមន្តចម្រើនព្រះបរិត្ត និង ប្រគេនចង្ហាន់ ទេយ្យទានដល់ព្រះសង្ឃ ចំនួន១៣ អង្គ និងនាំយកព្រះរាជអំណោយរបស់សម្តេចព្រះមហាក្សត្រី នរោត្តម មុនិនាថ សីហនុ ចែកជូនដល់បងប្អូនជាជនពិការ ចាស់ជរាគ្មាន ទីពឹង កុមារកំព្រា ស្ត្រីមេម៉ាយក្រីក្រ អ្នករស់នៅជាមួយមេរោគ អេដ និង គ្រួសារងាយរងគ្រោះ ចំនួ៨៨គ្រួសារ ក្រោមវត្តមានលោកជំទាវ ទៀង អេង ទៀ សីហា អនុប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប និង សហការី រួមអស់លោក លោកស្រីជាអនុប្រធានកិត្តិយសគណៈកម្មាធិការសាខា អនុសាខាស្រុក មន្ត្រីរាជការជាច្រើនរូបទៀតផង ។

បន្ទាប់ពីកិច្ចរបស់លោកតាអាចារ្យ ទៅតាមក្បួននៃពិធីព្រះពុទ្ធសាសនារួចមក ក្នុងឱកាសដ៏មហានក្ខត្តឫក្សឧត្តុង្គឧត្តមនេះ លោកជំទាវ ទៀង អេង ទៀ សីហា បានមានប្រសាសន៍ថា យើងទាំងអស់គ្នាជាកូនចៅ ចៅទួតរបស់ព្រះអង្គ សូមសំដែងនូវការគោរព និងចងចាំគ្មានថ្ងៃបំភ្លេចបាន នូវស្នាព្រះហត្ថព្រះរាជសកម្មភាពសម្ដេចម៉ែ សម្ដេចយាយជាអម្ចាស់ក្នុងព្រះរាជបេសកកម្មបម្រើប្រទេសជាតិមាតុភូមិ ក្នុងវិស័យមនុស្សធម៌ ព្រមទាំងបានបួងសួងថ្វាយព្រះពរជ័យមហាប្រសើរថ្វាយសម្តេចព្រះមហាក្សត្រី ព្រះវររាជមាតាជាតិខ្មែរ ព្រះប្រធានកិត្តិយសកាកបាទក្រហមកម្ពុជា ជាអម្ចាស់ជីវិតលើត្បូង ជាទីសក្ការៈដ៏ខ្ពង់ខ្ពស់បំផុត សូមព្រះអង្គរមានព្រះរាជសុខភាពល្អបរិបូរណ៌ព្រះកាយពលមាំមួន ព្រះជន្មយឺតយូរជាងរយព្រះវស្សា ដើម្បីគង់ប្រថាប់ជាម្លប់ដ៏ត្រជាក់របស់ប្រជារាស្ត្រជា កូនចៅ ចៅទួតរបស់ព្រះអង្គតរៀងទៅ ។

លោកជំទាវក៏បានបន្តថាដោយមានការយកចិត្តទុកដាក់ពីសំណាក់ សម្តេចកិត្តិព្រឹទ្ធបណ្ឌិត ប៉ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលតែងតែគិតពីសុខទុក្ខនិងការលំបាករបស់បងប្អូនប្រជាពលរដ្ឋ នៅទូទាំងប្រទេស សំខាន់បងប្អូនជាជនក្រីក្រ ជនងាយរងគ្រោះ ជនចាស់ជរា អ្នកផ្ទុកមេរោគអេដស៍ និងទុរគតជននានា និងបានពាំនាំមកនូវការផ្តាំផ្ញើសួរសុខទុក្ខ ព្រមទាំងលើកទឹកចិត្តដល់បងប្អូនប្រជាពលរដ្ឋឲ្យខិតខំថែទាំសុខភាព និងប្រកបរបរចិញ្ចឹមជីវិតតាមលទ្ធភាពដែលអាចធ្វើទៅបាន ។

លោកជំទាវ ទៀង អេង ទៀ សីហា បានពិតទួលថ្វាយព្រះសង្ឃ អាជ្ញាធរមូល ដ្ឋាន និងប្រជាពលរដ្ឋ ចូលរួមក្នុងការធ្វើអនាម័យ បរិស្ថាននៅក្នុងមូលដ្ឋានខ្លួន ក្នុងការលុបបំបាត់ទីជម្រកសត្វមូស ដែលជាភ្នាក់ងារចម្លងជម្ងឺគ្រុន ឈាម គ្រុនចាញ់ និង បើកយុទ្ធនាការការដាក់អាប៊ែបនីតាមផ្ទះ និង យកចិត្តទុកដាក់ចំពោះកុមារតូចៗ អំពីសុខភាពឲ្យបានជាប្រចាំ ។

ក្នុងនោះដែរលោកជំទាវក៏បានរំលឹក និង ពិតថ្វាយដល់ព្រះសង្ឃគ្រប់អង្គ និងប្រជាពលរដ្ឋទូទៅ ដែលបានចុះឈ្មោះក្នុងបញ្ជីបោះឆ្នោត សូមអញ្ជើញទៅបោះឆ្នោតឲ្យបានគ្រប់ៗគ្នា ក្នុងការជ្រើសតាំងតំណាងរាស្ត្រ នីតិកាលទី៧ នាថ្ងៃទី ២៣ ខែ កក្កដា ឆ្នាំ២០២៣ខាងមុខនេះផងដែរ ។

ទេយ្យទាននាំយកទៅវេរប្រគេនដល់វត្តរលួស មានគ្រឿងឧបភោគបរិភោគ និង បច្ច័យ សរុប ៣១៥០០០០រៀល(បីលានដប់ប្រាំម៉ឺនរៀល)  ព្រមទាំងបានចែកព្រះរាជអំណោយរបស់សម្តេចម៉ែ និង សម្តេចកិត្តិព្រឹទ្ធបណ្ឌិត ប៉ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនដល់បងប្អូនគ្រួសារងាយរងគ្រោះទាំង៨៨គ្រួសារមកពី៦ឃុំក្នុងស្រុកប្រាសាទបាគង ក្នុងមួយគ្រួសារទទួលបានគ្រឿងឧបភោគបរិភោគ មានអង្ករ មី ត្រីខ ស្ករស អំបិល ប៊ីចេង , ឃីត១កញ្ចប់ និង ថវិកា៥ម៉ឺនរៀលផងដែរ ៕

ដោយ ÷ ពន្លឺ