ខេត្តសៀមរាប ÷ អតីតអ្នកប្រដាល់គុនខ្មែរលើថ្វីជើងខ្លាំងតាំងពីទសវត្សរ៍១៩៩០ លោក ក្រាក់ សម្ផស្ស ទទួលអំណោយមនុស្សធម៌ពីព្រះសង្ឃក្នុងខេត្តសៀមរាប ដឹកដោយព្រះបវរវិជ្ជា ទេព ភឿន ព្រះរាជាគណៈកិត្តិយស ព្រះវិន័យធរគណខេត្ត ជាព្រះសារធម្មបាល អនុគណស្រុកជីក្រែង និងជាព្រះចៅ អធិការវត្តបុព្វទិសារាមហៅវត្តកំពង់ក្តីស្រុកជីក្រែងខេត្តសៀមរាប នារសៀលថ្ងៃទី០៦ខែមិថុនាឆ្នាំ២០២៣។
លោក ក្រាក់ សម្ផស្ស សព្វថ្ងៃកំពុងបើកក្លឹបបង្ហាត់ប្រដាល់គុនខ្មែរដែលនៅភូមិទួលគ្រួស ឃុំឃុនរាម ស្រុកបន្ទាយស្រី ខេត្តសៀមរាប ដោយមានកូនសិស្សចំនួនប្រមាណជាង៣០នាក់ ។
ព្រះបវរវិជ្ជា ទេព ភឿន ព្រះអង្គ សម្តែងការគាំទ្រ និងលើកទឹកចិត្តដល់រៀមច្បងដែលជាអតីតអ្នកប្រដាល់ គុនខ្មែរដ៏មានប្រជាប្រិយភាពលើទម្ងន់ជើងឲ្យខិតខំបង្វឹកដល់សិស្សគណ ដើម្បីចូលរួមថែរក្សាប្រដាល់ គុនខ្មែរ ជាមរតកដ៏មានតម្លៃរបស់ជាតិ សំដៅលើកកម្ពស់ប្រដាល់គុនខ្មែរលើឆាកអន្តរជាតិឲ្យកាន់តែមានឈ្មោះបោះសម្លេងល្បីរន្ទឺថែមទៀត។ ព្រះតេជគុណ បានមើលឃើញអំពីជីវភាពរបស់អតីតអ្នកប្រដាល់ ក្រាក់ សម្ភស្ស ដែលល្បីល្បាញខាងទម្ងន់ជើងផ្តាច់ព្រលឹងមានជីវភាពរស់នៅលំបាកហើយបានយកចិត្តទុកដាក់ខ្ពស់លើកស្ទួយវិស័យកីឡាប្រដាល់ក្បាច់គុណខ្មែរ ដោយរូបលោកកំពុងតែបើកក្លឹបប្រដាល់ដើម្បីបង្ហាត់និងចែករំលែកក្បាច់គុន ចំណេះដឹងដល់ស្រទាប់យុវជនស្រឡាញ់ និងចូលរួមថែរក្សាប្រដាល់ គុនខ្មែរ ព្រះអង្គ រួមជាមួយព្រះរាជាគណៈ សហការីមន្ត្រីសង្ឃខេត្តនិងក្រុងសៀមរាប បាននិមន្តនាំយកគ្រឿងឧបភោគបរិភោគ និងថវិកាមួយចំនួនដើម្បីលើកទឹកចិត្តជូនដល់លោក ក្រាក់ សម្ភស្ស និងសិស្សគណ ដែលសម្ភារអំណោយទាំងនេះបានមកពីការប្រគេនរបស់ពុទ្ឋបរិស័ទក្នុងពិធីបុណ្យផ្សេងៗនាពេលកន្លងមកហើយក្រុមព្រះសង្ឃបានសន្សំ និងប្រមូលបម្រុងទុកសម្រាប់ ចែកជូនដល់គ្រួសារបងប្អូនប្រជាពល រដ្ឋណាដែលមានជីវភាពខ្វះខាត ឬក៏មានការជួបហានិភ័យគ្រោះថ្នាក់ដោយប្រការផ្សេងៗ។
ព្រះវិន័យធរគណខេត្ត និងព្រះថេរានុត្ថេរ:អមព្រះដំណើរបានអំពាវនាវឱ្យយុវជនគ្រប់មជ្ឈដ្ឋានចូលរួមហ្វឹកហាត់និងស្រឡាញ់ថែរក្សាក្បាច់ប្រដាល់គុនខ្មែរឱ្យបានច្រើនកុះករ ដើម្បីសុខភាពផង និងដើម្បីក្លាយជាកីឡាអាជីពផង ក្នុងន័យរួមចំណែកលើកស្ទួយវិស័យកីឡាប្រដាល់គុនខ្មែរឱ្យកាន់តែរីកចម្រើន តទៅថ្ងៃអនាគត់។ គ្រឿងឧបភោគបរិភោគដែលព្រះគ្រូចៅអធិការវត្តនានាក្នុងខេត្តសៀមរាបយកទៅជូនលោក ក្រាក់ សម្ផស្ស នាពេលនោះមានដូចជា៖ អង្ករចំនួន៣០០គីឡូក្រាម.ទឹកត្រី១កសេនិង១យួរ. អំបិល ៤គីឡូក្រាម.ត្រីខ៥យួរ.ត្រីផ្អក១ធុង ព្រមទាំងថវិកាចំនួន ៦០ដុល្លារ និង ១០០.០០០រៀល ផងដែរ ៕
ដោយ ÷ពន្លឺ
