ខេត្តសៀមរាប ÷ ប្រជាការពារភូមិម្នាក់ស្រវឹងស្រាជោគជាំទៅផ្ទះមិនរួចក៏សម្រេចចិត្តដេក នៅតាមផ្លូវត្រូវរថយន្តជាន់ក្បាលបែកខួរស្លាប់ភ្លាមៗនៅហ្នឹងកន្លែងគួរឱ្យស្រណោះ។
ហេតុការណ៍ករណីរឿងគ្រោះថ្នាក់ចរាចរណ៍ បណ្តាលឱ្យស្លាប់នោះបានកើតឡើងនៅថ្ងៃទី ០៥ខែ មិថុនា ឆ្នាំ២០២៣ វេលាចន្លោះប្រហែលពីម៉ោង ០៣:០០នាទី ទៅម៉ោង០៥: ០០នាទីភ្លឺ លើផ្លូវលេខ ២០២ ពីស្រុកពួក ទៅស្រុកអង្គជុំ ត្រង់ចំណុចគោករំចេក ភូមិជួយចក្រី ឃុំត្រីញ័រ ស្រុកពួក ខេត្តសៀមរាប ។
លោក វរ:សេនីយ៍ឯក ទេព ពុំសែន អធិការនគរបាលស្រុកនៅព្រឹក ថ្ងៃទី ៦ ខែ មិថុនា ឆ្នាំ២០២៣ នេះ បានប្រាប់អ្នកសារព័ត៌មានអោយដឹងថាបន្ទាប់ពីមាន ករណី គ្រោះថ្នាក់ចរាចរណ៍នៅវេលាម៉ោង៥:០០នាទី ព្រឹក ប៉ុស្តិ៍នគរបាលរដ្ឋបាលត្រីញ័រ បានទទួលសេចក្តីរាយការណ៍ពីប្រជាពលរដ្ឋ ថាបានឃើញមនុស្សស្លាប់នៅលើផ្លូវចំណុចកើតហេតុខាងលើ ក្រោយពីទទួលព៌តមាន កំលាំងប៉ុស្តិ៍នគរបាលរដ្ឋបាលត្រីញ័រសហការណ៍ ជាមួយផ្នែកជំនាញ ចុះដល់កន្លែងកើត ហេតុ បានឃើញសាកសព ឈ្មោះ សុត ហុស ភេទប្រុស អាយុ២៥ឆ្នាំ រស់នៅភូមិកុក ឃុំនគរភាស ស្រុកអង្គរជុំ ខេត្តសៀមរាប មុខរបរ កសិករ ដេក ស្លាប់លើទ្រូងថ្នល់ចំហៀងខាងកើត ដោយមានស្នាមរងរបួសបែកក្បាលទាំងស្រុង។
យោងតាមការត្រួពិនិត្យជនងគ្រោះ និងត្រួតពិនិត្យលើស្លាកស្នាមបន្សល់ទុកនៅកន្លែងកើតហេតុ បានឃើញជនរងគ្រោះមានក្អួត ជាច្រើននៅកន្លែងកើត ហេតុ និងមានស្នាមកង់រថយន្តជាន់ចំក្បាលជនរងគ្រោះរួចហើយមានស្នាមដឹតឈាមជាប់ផ្លូវទៅទិសខាងជើង។ យោងតាមការប្រមូលព័ត៌មានពីសាក្សីដែលនៅជំវិញកន្លែងកើតហេតុ បានឱ្យដឹងថា មុនពេលកើតហេតុបានឃើញជនរងគ្រោះស្រវឹងស្រា ជោកជាំ ហើយបានដើរលើផ្លូវ។ លោក បន្ថែម ថា ករណីរឿងនេះគឺមានរថយន្តមិនស្គាល់ម៉ាកបើកបរមានទិសដៅពីត្បូងទៅជើង ហើយបានជាន់ចំក្បាល ជនរងគ្រោះដែលស្រវឹងស្រា ហើយដេកលើផ្លូវចំហៀងខាងកើត ក្រោយពេលកើតហេតុអ្នកបើកបររថយន្តបានបើករត់គេចពីកន្លែងកើតហេតុបាត់។
ក្រោយពីពិនិត្យកន្លែងកើតហេតុ និងពិនិត្យសាកសពរួចបានប្រគល់សពឱ្យក្រុមគ្រួសារយកទៅធ្វើបុណ្យតាមប្រពៃណី និង តាមរករថយន្តបង្ក ដើម្បីចាត់តាមនីតិវិធី៕
ដោយ ÷ ពន្លឺ
