ករណីគ្រោះថ្នាក់ចរាចរណ៍រវាងរថយន្តនិងម៉ូតូបណ្តាលឲ្យបុរសម្នាក់ស្លាប់ពេលបញ្ជូនទៅមន្ទីរពេទ្យ

ខេត្តសៀមរាប ÷ នៅវេលាម៉ោង ២១,០០ នាទី នារាត្រីថ្ងៃទី០៥ ខែមិថុនា ឆ្នាំ២០២៣ មានករណីគ្រោះថ្នាក់ចរាចរណ៍មួយកើតឡើង ដោយបុរសម្នាក់បើករថយន្ត Audi Q7 ពណ៌ខ្មៅ បានបង្ករទៅជាគ្រោះថ្នាក់ដែលបណ្តាលឲ្យបុរសម្នាក់ ជាអ្នកបើកបរម៉ូតូរងរបួសធ្ងន់ និងបានស្លាប់ តាមផ្លូវក្នុងពេលកំពុងបញ្ជូនសង្គ្រោះបន្ទាន់ ។

ហេតុការណ៍នេះ កើតឡើងស្ថិតតាមបណ្ដោយផ្លូវវត្តបូព៌ ត្រង់ចំណុចទល់មុខភោជនីយដ្ឋានមីស្ទ័រក្រៀល (Mr.Grill) ក្នុងភូមិវត្តបូព៌ សង្កាត់សាលាកំរើក ក្រុង ខេត្តសៀមរាប ។ គ្រោះថ្នាក់ចរាចរណ៍ រវាងម៉ូតូហុងដាឌ្រីម C125 ពណ៌ខ្មៅ ពាក់ស្លាកលេខ តាកែវ 1O-7336 ដែលបើកបរដោយបុរសម្នាក់ ឈ្មោះ នួន សុខុមឌីឡា ភេទប្រុស អាយុ២៣ ភូមិធ្លកអណ្តូង សង្កាត់ស្លក្រាម ក្រុងសៀមរាប ខេត្ត សៀមរាប រីឯរថយន្ត AUDI Q7 ពាក់ស្លាកលេខ ភ្នំពេញ 2AO-6869 ដែលបើកបរដោយឈ្មោះ មុិ ម៉ាច ភេទ ប្រុស អាយុ ៣១ឆ្នាំ មានទីលំនៅភូមិ ដកពោធិ៍ សង្កាត់ស្លក្រាម ក្រុងសៀមរាប ខេត្តសៀមរាប និងរួមដំណើរដោយមនុស្សប្រុសស្រីចំនួន០៣នាក់ នៅក្នុងរថយន្ត ដោយធ្វើដំណើរទិសច្រាសគ្នា ។

តាមប្រភពពីសមត្ថកិច្ចបានឲ្យដឹងថា ហេតុការណ៍នេះបានបណ្ដាលឲ្យបុរសដែលជាអ្នកបើកបរម៉ូតូ បានបាត់បង់ ជីវិត បន្ទាប់ពីរថយន្តសង្គ្រោះបន្ទាន់របស់មន្ទីរសម្រាកព្យាបាល&សម្ភព សុឹង រិទ្ធីរ៉េត ព្យាយាមដឹកយកទៅសង្គ្រោះភ្លាមៗ តែជាអកុសលបានស្លាប់នៅពាក់កណ្តាលផ្លូវ ហើយខណៈពេលនេះសព កំពុងរក្សារទុកនៅលើរថយន្តសង្គ្រោះបន្ទាន់ មុខមន្ទីរសម្រាកព្យាបាលនេះនៅឡើយ ដោយពុំទាន់ឃើញមានសាច់ញាតិមកទទួល។

ប្រភពបញ្ជាក់ថា រថយន្តបង្កខាងលើ ដែលមានអ្នកបើកបរ អ្នករួមដំណើរផងនោះ ក៏បានខំព្យាយាមគេចខ្លួន ដោយមានបុរសចំនួន២នាក់ផ្សេងទៀតបានមករំដោះចេញពីកន្លែងកើតហេតុដោយប្រើរថយន្ត Lexus RX300 ពណ៌ខ្មៅមួយគ្រឿង ពាក់ស្លាកលេខ ភ្នំពេញ 2N-6280 ហើយត្រូវបានសមត្ថកិច្ចឃាត់បាន និង នាំយកទៅការិយាល័យនគរបាលចរាចរណ៍ជើងគោក ខេត្តសៀមរាបទាំង២គ្រឿង ដើម្បីកសាងសំណុំរឿងបញ្ជូនបន្តទៅតុលាការ ៕

ដោយ ÷ ពន្លឺ