មនុស្ស៥នាក់ស្លាប់និងរបួស និង សត្វគោ៤ក្បាលងាប់ ដោយគ្រោះធម្មជាតិ រន្ទះបាញ់ នៅស្រុកពួក

ខេត្តសៀមរាប ÷ តាមការបញ្ជាក់របស់លោកវរៈសេនីយ៍ឯក ទេព ពុំសែន អធិការនគរបាលស្រុកពួក បានឲ្យដឹងថា ករណីប្រធានស័ក គ្រោះធម្មជាតិនេះ បានកើតឡើងនៅឃុំពីរ ក្នុងស្រុកពួក ខេត្តសៀមរាប មាន៣ករណី បានបង្កឲ្យមនុស្សម្នាក់ស្លាប់ និង ០៤នាក់រងរបួសធ្ងន់ និងសម្លាប់គោ៤ក្បាល កាលពីវេលាម៉ោង១៥ និង ៣០នាទី ថ្ងៃអាទិត្យទី ០៤ ខែមិថុនា ឆ្នាំ២០២៣ ដោយមានភ្លៀងធ្លាក់យ៉ាងខ្លាំង ព្រមទាំងមានខ្យល់កន្ត្រាក់ផ្គររន្ទះគ្រានោះរន្ទះបានបាញ់ចំនួនបីទីតាំងផ្សេងគ្នាក្នុងពេលតែមួយ ក្នុងភូមិសាស្ត្រ ឃុំមុខប៉ែន និងឃុំសសរស្ដម្ភ ស្រុកពួក ។

ក្នុងករណីទី១ : រន្ទះបាញ់នៅចំណុចវាលស្រែរំដេញ ខាងត្បូងភូមិចម្ងាយប្រហែល១ពាន់ម៉ែត្រ ស្ថិតនៅភូមិត្រកៀត ឃុំមុខប៉ែន ស្រុកពួក ខេត្តសៀមរាប បណ្ដាលឲ្យរងរបួស៤នាក់ និងស្លាប់ ១នាក់ ខណ:ពេលពួកគាត់កំពុងភ្ជួរស្រែ និងព្រោះស្រូវ ។ ជនរងគ្រោះទី១ឈ្មោះ ពេញ វណ្ណឆារ៉ា ភេទប្រុស អាយុ ១៣ឆ្នាំ បាន(ស្លាប់) ,ទី២.ឈ្មោះ កែវ រដ្ឋា ភេទប្រុស អាយុ ១៧ឆ្នាំ (របួស) , ទី៣.ឈ្មោះ វ៉ាត មិថុនា ភេទប្រុស អាយុ ៣៣ឆ្នាំ (របួស) ,ទី៤.ឈ្មោះ ពេជ្រ សម្បត្តិ ភេទប្រុស អាយុ ៤១ឆ្នាំ (របួស) និង ទី៥.ឈ្មោះ ហាន់ ហាយ ភេទប្រុស អាយុ ១៩ឆ្នាំ (របួស) អ្នកទាំង៥នាក់ រស់នៅក្នុងភូមិ/កើតហេតុ ខាងលើជុំគ្នា ហើយត្រូវបានបញ្ជូនទៅសង្រ្គោះនៅមណ្ឌលសុខភាពសសរស្ដម្ភ២នាក់ ,និង នៅមន្ទីរពេទ្យបង្អែកពួក ស្រុកពួក ១នាក់ និង នាក់រងរបួសស្រាល ឆ្អើរភ្លើងនៅផ្ទះ ។

ចំពោះករណីទី២ : រន្ទះបាញ់សត្វគោ នៅចំណុចវាលស្រែទំនប់៧៨ ស្ថិតក្នុងភូមិមុខប៉ែន ឃុំមុខប៉ែន ស្រុកពួក ខេត្តសៀមរាប បណ្ដាលឲ្យស្លាប់សត្វគោចំនួន ៣ក្បាល ដែលបានចងនៅវាលស្រែ និង ករណីទី៣ : រន្ទះបាញ់សត្វគោ នៅចំណុចវាលស្រែថ្នល់ចាស់ ខាងត្បូងភូមិចម្ងាយប្រហែល ៥០០ម៉ែត្រ ស្ថិតក្នុង ភូមិគោកត្លាត ឃុំសសរស្ដម្ភ ស្រុកពួក ខេត្តសៀមរាប បណ្ដាលឲ្យងាប់សត្វគោ ១ក្បាល ខណ:ពេលម្ចាស់ចងនៅវាលស្រែ ហើយម្ចាស់ជ្រកភ្លៀងឆ្ងាយពីសត្វគោ ៕

ដោយ ÷ ពន្លឺ