ខេត្តសៀមរាប ÷ នៅព្រឹកថ្ងៃទី០៥ ខែមិថុនា ឆ្នាំ២០២៣នេះ ឯកឧត្តម អែល សៀត សមាជិកក្រុមប្រឹក្សាខេត្តសៀមរាប និងជាប្រធានគណៈចលនាសាសនិកឥស្លាមខេត្តបានចុះជួបសំណេះសំណាលនិងនាំយកនូវសម្ភារៈសិក្សាចែកជូនដល់លោកគ្រូ អ្នកគ្រូនិងប្អូនៗសិស្សានុសិស្សជាសាសនិកឥស្លាមដែលកំពុងសិក្សានៅសាលារៀនអាន់នៀម៉ះ ស្ថិតនៅក្នុងភូមិស្ទឹងថ្មី សង្កាត់ស្វាយដង្គំ ក្រុងសៀមរាប ។
នៅក្នុងការចុះជួបសំណេះសំណាលនេះផងដែរ ក៏មានការអញ្ជើញចូលរួមពីសំណាក់ លោក ហ៊ា ហាវ ចៅសង្កាត់ស្វាយដង្គំ និង លោក សុខ រ៉ាយ៉ាន សមាជិកគណៈចលនាខេត្ត និងជាជំនួយការសម្តេចពិជ័យសេនា ទៀ បាញ់ ព្រមទាំង អស់លោក លោកស្រី អនុប្រធាន សមាជិកគណៈចលនាខេត្ត សមាជិកសមាជិកាសមាគមសម្ព័ន្ធយុវជន ជាច្រើននាក់ចូលរួមផងដែរ ។ ឯកឧត្តម អែល សៀត សមាជិកក្រុមប្រឹក្សាខេត្តសៀមរាប និងជាប្រធានគណៈចលនាសាសនិកឥស្លាមខេត្ត ក៏បានពាំនាំប្រសាសន៍ផ្តាំផ្ញើរសួរសុខទុក្ខពីសំណាក់ ឯកឧត្តម អូស្មាន ហាស្សាន់ ទេសរដ្ឋមន្ត្រីទទួលបន្ទុកបេសកកម្មពិសេសរបស់រាជរដ្ឋាភិ បាលដែលជានិច្ចកាល ឯកឧត្តមតែងតែយកចិត្តទុក ដាក់អំពីសុខទុក្ខរបស់បងប្អូន ក៏ដូចជាលោកគ្រូអ្នកគ្រូ និងប្អូនៗសិស្សានុសិស្សដែលសាសនិកឥស្លាមគ្រប់ពេលវេលាជានិច្ច ។
ឯកឧត្តម អែល សៀត ក៏បានលើកទឹកចិត្ត និងណែនាំដល់ក្មួយៗសិស្សានុសិស្ស ទាំងអស់អោយចេះតស៊ូ អត់ធ្មត់ នូវរាល់ការលំបាក ខិតខំប្រឹងប្រែងសិក្សារៀនសូត្រ ដើម្បីមានអនាគតល្អ និងជាយុវជនល្អទៅថ្ងៃអនាគត ជាពិសេសក្មួយៗត្រូវយកគម្រូតាមបងៗ ពូៗ ជំនាន់មុន ដែលបានតស៊ូរាល់ការលំបាក ដើម្បីអនាគតខ្លួន គ្រួសារ និងសង្គមជាតិ ដោយបានចាកចោលស្រុកកំណើតទៅសិក្សានៅក្រៅប្រទេស ហើយបច្ចុប្បន្ននេះអ្នកខ្លះក្លាយជាថ្នាក់ដឹកនាំ មន្រ្តីរាជការក្នុងក្រសួងស្ថាប័ននានានិងជាគ្រូបង្រៀនផងដែរ ។
ឆ្លៀតក្នុងឱកាសនោះផងដែរ ឯកឧត្តម អែល សៀត ក៏បានមានប្រសាសន៍ណែនាំ និងផ្តាំផ្ញើអោយប្អូនៗសិស្សានុសិស្សទាំងអស់ត្រូវយកចិត្តទុកដាក់រៀនសូត្រ ដើម្បីក្លាយជាធនធានមនុស្ស ដែលមានចំណេះ ជំនាញ អាចជួយខ្លួនឯង ជួយគ្រួសារ ជាពិសេស គឺរួមចំណែកក្នុងការកសាងសង្គមជាតិយើង ឱ្យកាន់តែមានភាពរីកចម្រើនបន្ថែមទៀត ហើយសូមកុំយក ពេលក្នុងវ័យសិក្សា ទៅបំផ្លាញចោល ដោយការប្រព្រឹត្តអំពើអបាយមុខ កាប់ចាក់គ្នាបងតូចបងធំ សេពគ្រឿងញៀន ដែលនាំមកនូវសេចក្តីវិនាសអន្តរាយ បំផ្លាញខ្លួនឯង បំផ្លាញគ្រួសារ និងសង្គមជាតិ ត្រូវញាំអាហារណាដែលមិនប៉ះពាល់សុខភាពជាពិសេសគឺនំនិងភេសជ្ជៈដែលលក់នៅតាមសាលាដែលក្រសួងអប់រំបានហាមឃាត់មិនឲ្យលក់ដល់សិស្ស ជាពិសេសរដូវនេះជារដូវភ្លៀងសូមប្អូនៗសិស្សានុសិស្សមានការប្រុងប្រយ័ត្នការពារមូសខ្លាខាំនាំអោយកើតជំងឺគ្រុនឈាមផងដែរ។
សម្ភារៈសិក្សាដែលថ្នាក់ដឹកនាំគណៈចលនាសាសនិកឥស្លាមខេត្តសៀមរាបយកទៅប្រគល់ជូនដល់លោកគ្រូអ្នកគ្រូ និងចែកជូនសិស្សានុសិស្សនាពេលនោះមានដូចជា ៖ គម្ពីរអាល់គួរអានចំនួន ១០០ក្បាល សៀវភៅសសេរចំនួន ៤០០ក្បាល និង ប៊ិចចំនួន ១០០ដើមផងដែរ ៕
ដោយ ÷ ពន្លឺ
