ខេត្តសៀមរាប ÷ ការរីកចម្រើនលើគ្រប់វិស័យ ជាពិសេសផ្នែកព្រះពុទ្ធសាសនា អាចអភិវឌ្ឍន៏និងរីកចម្រើនទៅបានគឺអាស្រ័យដោយសារប្រទេសជាតិ មានសុខសន្តិភាព និងស្ថេរភាព ក្រោមការដឹកនាំដ៏ត្រឹមត្រូវរបស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ហើយកត្តាសុខសន្តិភាព ស្ថិរភាពនិងការរីកចម្រើន រួមជាមួយនឹងគោលនយោ បាយយុទ្ឋសាស្ត្រ នានា គឺកើតឡើងក្រោយថ្ងៃជ័យជម្នះ៧មករា១៩៧៩ និងគោលនយោបាយឈ្នះ ឈ្នះ របស់សម្តេចតេជោសែន នាយករដ្ឋមន្ត្រី។
នេះជាការលើកឡើងរបស់ ឯកឧត្តម អ្នកឧកញ៉ា បណ្ឌិត សៀង ណាំ តំណាងរាស្ត្រមណ្ឌលសៀមរាប ថ្លែងក្នុងពិធីសម្ពោធឆ្លងដាក់ឱ្យប្រើប្រាស់ជាផ្លូវការនូវផ្លូវបេតុងមួយខ្សែរួមជាមួយសមិទ្ឋផលមួយចំនួនទៀតនៅវត្តប្រម៉ា សង្កាត់ក្របីរៀល ក្រុងសៀមរាប ខេត្តសៀមរាប នាថ្ងៃទី០៤ខែមិថុនាឆ្នាំ២០២៣។
ឯកឧត្តម មានប្រសាសន៍ថា៖ផ្តើមចេញពីថ្ងៃជ័យជម្នះថ្ងៃ៧មករា១៩៧៩និងដោយមានការដឹកនាំដ៏ត្រឹមត្រូវ ពិសេសចាប់ពីចុងឆ្នាំ១៩៩៨ក្រោមគោលនយោបាយ ឈ្នះ ឈ្នះ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ប្រទេសជាតិទទួលបានសុខសន្តិភាព បង្រួបបង្រួមជាតិ ផ្សះផ្សារជាតិក្រោមដំបូលសន្តិភាពតែមួយ រួមគ្នាធ្វើការអភិវឌ្ឍរីក ចម្រើនលើគ្រប់វិស័យដូចឃើញជាក់ស្តែងទាំងអស់គ្នាក្នុងនោះវិស័យព្រះពុទ្ឋសាសនាក៏មានការរីកចម្រើនជាបន្តបន្ទាប់រហូតមកដល់បច្ចុប្បន្ន។ មានសន្តិភាពទើបមានការអភិវឌ្ឍហេតុនេះសូមបងប្អូនប្រជាពលរដ្ឋរួមសាមគ្គីគ្នារក្សាសុខសន្តិភាព ដើម្បីបន្តការអភិវឌ្ឍក្នុងមូលដ្ឋានឱ្យកាន់តែរីកចម្រើនថែមទៀត ។ ឯកឧត្តមអ្នកឧកញ៉ា សៀង ណាំ ក៏បានកោតសរសើរចំពោះព្រះចៅអធិការវត្ត ព្រះសង្ឍគ្រប់ព្រះអង្គ គណៈ កម្មការវត្តប្រម៉ា ព្រមទាំង លោកតា លោកយាយ សប្បុរសជន មន្រ្តីរាជការ បងប្អូនប្រជាពលរដ្ឋ ក្នុងសង្កាត់ក្របីរៀល ដែលបានខិតខំយកព្រះទ័យ និងយកចិត្តទុកដាក់ សហការជួយគ្នាកសាងលេច ចេញជាសមិទ្ធផលច្រើនក្នុងវត្ត ធ្វើឲ្យវត្តកាន់តែមានសោភ័ណ្ឌស្រស់ស្អាត ឡើង សម្រាប់ប្រជាពលរដ្ឋធ្វើបុណ្យទានផ្សេងៗ។ ឯកឧត្តម បានចាត់ទុកសមិទ្ឋផលថ្មីមានដូចជា ក្លោងទ្វា ការកែលំអរសួនច្បារ ក្នុងវត្ត ថាជាជំហានរីកចម្រើនថ្មីមួយថែមទៀតសម្រាប់បំរើឱ្យវិស័យព្រះពុទ្ឋសាសនា។
ក្នុងឱកាសនោះដែរ ឯកឧត្តម អ្នកឧកញ៉ា ក៏បានមានប្រសាសន៍អំពាវនាវដល់លោកតា លោកយាយ បងប្អូនប្រជាពលរដ្ឋ ដែលមានអាយុគ្រប់ និងមានសិទ្ធិបោះឆ្នោត សូមអញ្ជើញទៅចូលរួមបោះឆ្នោតជ្រើស រើសតំណាងរាស្ត្រ នីតិកាលទី៧ ដែលនឹងប្រព្រឹត្តទៅនៅថ្ងៃអាទិត្យ ទី២៣ ខែកក្កដា ឆ្នាំ២០២៣ ខាងមុខនេះកុំបីខានឡើយ និង ដើម្បីជ្រើសរើសប្រមុខដឹកនាំដែលតែងតែគិតគូរពីសុខទុក្ខប្រជាពលរដ្ឋនិង សម្រាប់បន្តការអភិវឌ្ឍន៏ ក្នុងមូលដ្ឋានជាបន្តទៀត ជាពិសេសត្រូវនាំគ្នាថែរក្សាសន្តិភាពឱ្យបានស្ថិតស្ថេរគង់វង្ស ទោះក្នុងតម្លៃណាក៏ដោយកុំឱ្យបាត់បង នូវ សន្តិភាពដែលរកបានមកដោយលំបាកនេះ។
ជាមួយគ្នានោះដែរ ឯកឧត្តម អ្នកឧកញ៉ា សៀង ណាំ ក៏បានប្រគេនព្រះចៅអធិការវត្តនិងជូនដល់លោកតា លោកយាយ ប្រជាពលរដ្ឋ លោកគ្រូអ្នកគ្រូ សិស្សានុសិស្ស ចូលរួមក្នុងពិធីអស់ថវិកាសរុបចំនួន៣៥០០ដុល្លារ ។
សូមជំរាបថា៖វត្តប្រាសាទល្បើកទឹកថ្លាបុប្ផារាម ហៅវត្តប្រម៉ា ស្ថិតក្នុងភូមិប្រម៉ា សង្កាត់ក្របីរៀល ក្រុងខេត្តសៀមរាប ។ វត្តនេះបានកសាងឡើងនៅឆ្នាំ១៤៩៧។ ក្រោយពីបានសម្ពោធឆ្លងព្រះវិហារនៅឆ្នាំ២០១៩រួចមក ព្រះចៅអធិការ ព្រះសង្ឃ គណៈកម្មការ អាចារ្យ អាជ្ញាធរមូលដ្ឋាននិងសប្បុរសជនជិតឆ្ងាយបានមូលមតិគ្នាបន្តកសាងហេដ្ឋារចនាសម្ព័ន្ឋនានាក្នុងវត្តបន្ថែមទៀត ដូចជា ជួសជុលសាលាវប្បធម៌ សង់រោងទទួលភ្ញៀវ ក្រាលការ៉ូឡា ដាំផ្កាក្នុងបរិវេណវត្ត និងជួយផ្នែកពុទ្ឋិកៈសិក្សាផងដែរ។ ដោយឡែកនៅខែមីនាឆ្នាំ២០២២ព្រះសង្ឃ គណៈកម្មការអាចារ្យនិងអាជ្ញាធរសង្កាត់បានស្រុះស្រួលសាងសង់ផ្លូវបេតុងចូលវត្តតភ្ជាប់ពីផ្លូវលំមានប្រវែង៥៧៤ម៉ែត្រ ទទឹង៦ម៉ែត្រ ប្រើរយៈពេល៦ខែ ដោយចំណាយថវិកាអស់ជាង៥៦.៣០០ដុល្លារ នៅខ្វះថ្លៃសម្ភារៈសំណង់ជិត៦ពាន់ដុល្លារទៀត។ ថវិកាទាំងនេះមួយផ្នែកបានមកពីពិធីបុណ្យនានាក្នុងវត្តមួយផ្នែកទៀត បានមកពីការចូលរួមរបស់ពុទ្ឋបរិស័ទតាមភូមិនានា អាជ្ញាធរមូលដ្ឋាននិងក្រុមការងារចុះជួយសង្កាត់។ នេះបើយោងតាមរបាយការណ៍របស់ ព្រះចៅអធិការនិងគណៈកម្មការវត្តប្រម៉ា៕
ដោយ ÷ ពន្លឺ
