ខេត្តសៀមរាប ÷ ជារៀងរាល់ឆ្នាំមន្ទីរពេទ្យកុមារអង្គរ គឺត្រូវការថវិកាសម្រាប់ដំណើរការប្រតិបត្តិរបស់ខ្លួនពី ៥ ទៅ ៦ លានដុល្លារអាមេរិក ដើម្បីដំណើរការមន្ទីរពេទ្យកុមារអង្គរទាំងមូល ទាំងផ្នែកព្យាបាលនៅមន្ទីរពេទ្យ ទាំងផ្នែកបណ្តុះបណ្តាល និងការងារសហ គមន៍។
ក្នុងឆ្នាំ២០២៣នេះជាឆ្នាំទី១០ហើយ ដែលបានប្រារព្ធពិធីបុណ្យផ្កាប្រាក់មហាសាមគ្គី ក្រោមគំនិតផ្តួចផ្តើមឡើងដោយ សម្តេចព្រះព្រហ្មរតនមុនី ពិន សែម សិរីសុវណ្ណោ គណៈមហានិកាយ នៃព្រះរាជាណាចក្រកម្ពុជា និងជាព្រះគ្រូចៅអធិការវត្តរាជបូណ៌ ព្រមទាំងព្រះមន្ត្រីសង្ឃគ្រប់ជាន់ថ្នាក់ ជាមួយថ្នាក់ដឹកនាំខេត្ត មន្ត្រីរាជការ និងគណៈគ្រប់គ្រង ក្រុមប្រឹក្សាភិបាល និងក្រុមប្រឹក្សាផ្តល់យោបល់ផ្នែកទំនាក់ទំនងសាធារណៈទាំងអស់ នៃមន្ទីរពេទ្យកុមារអង្គរ បានមូលមតិគ្នាជាឯកច្ឆន្ធប្រារព្ធ ធ្វើពិធីបុណ្យផ្កាប្រាក់ មហាសាមគ្គី ឆ្នាំទី១០ ដែលបានប្រព្រឹត្តិទៅកាលពីរសៀលថ្ងៃទី០៤ ខែមិថុនា ឆ្នាំ២០២៣នេះ នៅបរិវេណវត្តរាជបូណ៌ ភូមិវត្តបូព៌ សង្កាត់សាលាកំរើក ក្រុងសៀមរាប ដើម្បីកៀរគរមូលនិធិរៃអង្គាសថវិកា ទ្រទ្រង់ដល់ដំណើរការប្រតិបត្តិនៃមន្ទីរពេទ្យកុមារអង្គរ ខេត្តសៀមរាប ក្នុងការផ្តល់សេវាថែទាំ និងព្យាបាលដល់កុមារកម្ពុជា ។
ក្នុងពិធីបុណ្យផ្កាប្រាក់ មហាសាមគ្គីឆ្នាំទី ១០ នេះដែរគឺមានការដង្ហែរអង្គផ្កាប្រាក់ ដោយមានបណ្តាស្ថាប័ននានា ក្រុមហ៊ុនឧបត្ថម្ភពិធីបុណ្យ និងសប្បុរសជនមួយចំនួន អមដោយភ្លេងឆៃយ៉ាំ នៅក្នុងក្រុងសៀម រាបដោយចាប់ចេញដំណើរពីមន្ទីរពេទ្យកុមារអង្គរ ឆ្ពោះទៅកាន់វត្តរាជបូណ៌ ដោយកាត់តាមផ្សារចាស់ និងតាមផ្លូវមាត់ស្ទឹង ដើម្បីញ៉ាំងឲ្យមានការផ្សព្វ ផ្សាយ និងធ្វើឲ្យពិធីបុណ្យកាន់តែអធិកអធម។
នៅក្នុងពិធីបុណ្យនេះផងដែរក៏មានការអញ្ជើញចូលរួមពីសំណាក់ ឯកឧត្តម កុយ សង សមាជិកក្រុមប្រឹក្សាខេត្តសៀមរាប តំណាងឯកឧត្តប្រធានក្រុមប្រឹក្សាខេត្ត និង ឯកឧត្តមអភិបាលខេត្តសៀមរាប។
លោក ងួន ច័ន្ទភក្ត្រា នាយកមន្ទីរពេទ្យកុមារអង្គរខេត្តសៀមរាប បានមានប្រសាសន៍ឱ្យដឹងថា៖ មន្ទីរពេទ្យកុមារអង្គរខេត្តសៀមរាប ត្រូវបានបង្កើតឡើងនៅក្នុងឆ្នាំ១៩៩៩ ក្នុងគោលដៅផ្តល់សេវាពិនិត្យ និងព្យាបាលជំងឺប្រកបដោយគុណភាព និងឥតគិតថ្លៃជូនដល់កុមារកម្ពុជា។ លោកបន្តថា ជារៀងរាល់ថ្ងៃមន្ទីរពេទ្យកុមារទទួលការពិនិត្យនិងព្យាបាលជំងឺជូនកុមារចំនួន៣៥០នាក់ និងក្នុងមួយឆ្នាំមានចំនួនជាង១ម៉ឺននាក់ ដោយមានផ្តល់នូវសេវាកម្មជាច្រើនដូចជា៖ ការពិគ្រោះជំងឺ សម្រាកនៅមន្ទីរពេទ្យ សង្រ្គោះបន្ទាន់ វះកាត់ ព្យាបាលជំងឺមហារីក ព្យាបាលកុមារមានជំងឺភ្នែក និងសុខភាពមាត់ធ្មេញ។ បន្ថែមពីនេះជារៀងរាល់ឆ្នាំ មន្ទីរពេទ្យតែងតែចូលរួមជាមួយក្រសួងសុខាភិបាល ធ្វើការបណ្តុះបណ្តាលផ្នែកគិលានុដ្ឋាក លោកគ្រូ អ្នកគ្រូពេទ្យ រាប់រយនាក់ក្នុងមួយឆ្នាំៗ និងបន្តសកម្មភាពចុះអប់រំសុខភាពជូនសហគមន៍នៅតាមទីជនបទជាដើម។
ក្នុងនាមមន្ទីរពេទ្យកុមារអង្គរខេត្តសៀមរាប លោក ងួន ច័ន្ទភក្រ្តា ក៏បានមានប្រសាសន៍ ថ្លែងអំណរគុណចំពោះព្រះសង្ឃ និង ថ្នាក់ដឹកនាំខេត្ត ព្រមទាំងសប្បុរសជនទាំងអស់ ចំពោះការបន្តចូលរួមបរិច្ចាគថវិកា ពីសាធារណៈជនទាំងក្នុង និងក្រៅប្រទេស មកកាន់មន្ទីរពេទ្យ ពិតជាមានសារៈសំខាន់ខ្លាំងណាស់ ដើម្បីបន្តដំណើរការពិនិត្យ និងព្យាបាលជំងឺជូនដល់កុមារកម្ពុជា។ លោកក៏បានបញ្ជាក់ផងដែរថា “ថវិកាដែលទទួលបានពីការរៀបចំពិធីបុណ្យផ្កាប្រាក់នេះ គឺជាចំណែកដ៏សំខាន់បំផុតដើម្បីថែរក្សាដំណើរការផ្តល់សេវាពិនិត្យ ព្យាបាល ថែទាំ សង្គ្រោះជីវិតកុមារកម្ពុជា ប្រកបដោយគុណភាព ក្តីមេត្តាករុណា និងឥតគិតកម្រៃ នៅក្នុងមន្ទីរពេទ្យកុមារអង្គរ”។
លោកបានបន្តទៀតថា ពិធីបុណ្យផ្កាប្រាក់មហាសាមគ្គីដែលបានប្រារព្ធធ្វើជារៀងរាល់ឆ្នាំ និងការបន្តចូលរួមបរិច្ចាគថវិការបស់មហាជនទាំងក្នុងនិងក្រៅប្រទេស មកកាន់មន្ទីរពេទ្យពិតជាមានសារៈសំខាន់ខ្លាំងណាស់ ដើម្បីបន្តដំណើរការពិនិត្យ និងព្យាបាលជំងឺជូនដល់កុមារកម្ពុជា។ លោកបានមានប្រសាសន៍បញ្ជាក់បន្ថែមទៀតថា រាល់ថ្ងៃមន្ទីរពេទ្យកុមារអង្គរពឹងផ្អែកថវិកា៧០ភាគរយបានមកពីសប្បុរជននៅក្រៅប្រទេស និង៣០ភាគរយបានមកពីសប្បុរសជនក្នុងប្រទេសដែលប្រជាជនយើងបានបរិច្ចាគដោយ ការចូលរួមរបស់ពួកគាត់បានកើនឡើងជារៀងរាល់ឆ្នាំផងដែរ។ សូមបញ្ជាក់ថាបុណ្យផ្កាប្រាក់មហាសាមគ្គី ឆ្នាំទៅ១០ដើម្បីឧបត្ថមដល់មន្ទីរពេទ្យកុមារអង្គរ ខេត្តសៀមរាបដែលបានប្រព្រឹត្តិទៅកាលពីរសៀលថ្ងៃអាទិត្យ ទី០៤ ខែមិថុនា ឆ្នាំ២០២៣នេះ ប្រមូលថវិកាជា បឋមបានចំនួន៨៩.៦៨៨ ដុល្លារសហរដ្ឋអាមេរិក ៕
ដោយ ÷ ពន្លឺ
