សមណសិស្សពុទ្ធិកបឋមសិក្សាវត្តស្វាយរមៀតនិងប្រជាពលរដ្ឋខ្វះខាត ព្រមទាំងសិស្សានុសិស្សទទួលបានសម្ភារៈសិក្សានិងគ្រឿងឧបភោគបរិភោគពីព្រះសង្ឃនិងសប្បុរសជនក្នុងក្រុងសៀមរាប

ខេត្តសៀមរាប ÷ កាលពីរសៀលថ្ងៃទី០៣ ខែមិថុនា ឆ្នាំ២០២៣ នៅក្នុងវត្តបារាយមហានទីរតនារាម ហៅវត្តស្វាយរមៀត ស្ថិតក្នុងភូមិបន្ទាយឈើ សង្កាត់ទឹកវិល ក្រុងសៀមរាប ខេត្តសៀមរាប ព្រះសង្ឃនិងសប្បុរសជនក្នុងក្រុងសៀមរាបបាននាំយកទេយ្យទាន ជាគ្រឿងឧបភោគបរិភោគនិងសម្ភារ:សិក្សាប្រគេនដល់សមណសិស្ស និងសិស្សកំពុងសិក្សាពុទ្ធិកបឋមសិក្សាវត្តស្វាយរមៀត និងសិស្សានុសិស្សនៃសាលា បឋមសិក្សាបន្ទាយឈើព្រមទាំងប្រជាពលរដ្ឋដែលជាគ្រួសារមានការខ្វះខាតមកពីភូមិមួយចំនួនក្នុងសង្កាត់ទឹកវិលក្រុងសៀមរាបសរុបចំនួនជិត៤០០អង្គ/នាក់។

នៅក្នុងកម្មវិធីនេះការចែកសម្ភារៈសិក្សាដល់សិស្សនាពេលនេះគឺក្រោមការផ្តួចផ្តើមគំនិត និងរៀបចំឡើងដោយព្រះសច្ចានុបាល នឿម វុទ្ធី ព្រះគ្រូចៅអធិការវត្តស្វាយរមៀតដោយមានការនិមន្តចូលរួមពីសំណាក់ព្រះធម្មានុរ័ក្ខញាណ ស៊ុម ពិសិទ្ធិ ព្រះរាជាគណៈកិត្តិយសព្រះសមុហ៍គណខេត្ត និងជាព្រះគ្រូចៅ អធិការវត្តប្រាសាទចន្ទរង្សី (វត្តគោកចាន់)និង ព្រះគ្រូវិចិត្រវង្សាញាតិធម្មោ ហែម គឹមសាន ព្រះគ្រូចៅ អធិការវត្តប្រាសាទគោកចក និងព្រះថេរានុថេរ:គ្រប់ព្រះអង្គ អាជ្ញាធរភូមិឃុំ និងមហាឧបាសិកា ជៀវ ម៉ាលី និងក្រុមគ្រួសារដែលជាសប្បុរសជនម្ចាស់សទ្ធា ព្រមទាំងលោកគ្រូធម្មាចារ្យ និងអ្នកគ្រូធម្មាចារ្យ សីលវ័ន សីលវតី ឧបាសក ឧបាសិកា ទាយក ទាយិកា ព្រមទាំងលោកគ្រូ អ្នកគ្រូ សិស្សានុសិស្ស ពុទ្ធបរិស័ទចំណុះជើងវត្តជាច្រើននាក់បានអញ្ជើញចូលរួមផងដែរ។

ក្នុងនាមពុទ្ឋសាសនូបត្ថម្ភ មហាឧបាសិកា ជៀវ ម៉ាលី បានមានប្រសាសន៍បង្ហាញនូវក្តីរីករាយជ្រះថ្លានិងអរគុណដល់សប្បុរសជន និងក្រុមញាតិធម៌ដែលបានបរិច្ចាគធនធានថវិកាចូលរួមចែករំលែកប្រគេននិងជូនដល់ព្រះសង្ឃនិងបងប្អូនដែលមានជីវភាពខ្វះខាតប្រចាំថ្ងៃ។

មហាឧបាសិកា ជៀវ ម៉ាលី មានប្រសាសន៍បន្ថែមថានេះមិនមែនជាលើកទី១ទេ ដែលបានចែករំលែកទេយ្យទាន និងសម្ភារៈសិក្សាបែបនេះ និងចែកជូនទៅតាមលទ្ឋភាព ប្រកបដោយស្មារតីសាមគ្គីធម៌ ដើម្បី ជួយដល់គ្រួសារដែលមានជីវភាពខ្វះខាតផងដែរ។

ព្រះសច្ចានុបាល ភទ្ទកោ នឿម វុទ្ធី ព្រះរាជាគណ កិត្តិយស និងជាព្រះគ្រូចៅអធិការវត្តបារាយមហានទីរតនារាម (ស្វាយរមៀត) បានមានសង្ឃដីកាថា ក្នុងនាមព្រះអង្គជាព្រះគ្រូចៅអធិការវត្ត តំណាងឱ្យព្រះសង្ឃ អាចារ្យ គណៈកម្មការ ពុទ្ឋបរិស័ទទាំងអស់ សូមថ្លែងអំណរគុណបំផុតចំពោះទឹកចិត្តដ៏សប្បុរសរបស់មហាឧបាសិកា ជៀវ ម៉ាលី និងក្រុមគ្រួសារ ព្រមទាំងញាតិញោមពុទ្ធបរិស័ទទាំអអស់ ដែលតែងតែលះបង់ទ្រព្យធនធាន និងកម្លាំងកាយកម្លាំងចិត្ត ដើម្បីចូលរួមចំណែកជួយសង្គមជួយធុរៈដល់អាជ្ញាធរមូលដ្ឋាន សំដៅកាត់បន្ថយភាពក្រីក្រស្របតាមយុទ្ធសាស្ត្រ ចតុកោណរបស់រាជរដ្ឋាភិបាល។ ហើយជានិច្ចកាល ក្រុមសប្បុរសជនទាំងនេះ តែងតែយកចិត្តទុកដាក់ជួយដល់ប្រជាពលរដ្ឋដែលមានការខ្វះខាត មិនថានៅខេត្តសៀមរាប ឬនៅខេត្តដទៃទៀតនោះទេ។ នេះមិនមែនជាលើកទីមួយទេ គឺជា លើកទី២៦ហើយ របស់មហាឧបាសិកានិងញាតិធម៌បានជួយ ក្នុងពេលកន្លងមក។

ព្រះសច្ចានុបាល ភទ្ទកោ នឿម វុទ្ធី បានមានសង្ឃដីកាបន្ថែមថាកន្លងមក ដោយមើលឃើញសិស្សានុសិស្ស នៅតាមសាលាបឋមសិក្សាមួយចំនួន ការកង្វះខាតនូវសម្ភារៈសិក្សារបស់សិស្សមិនគ្រប់គ្រាន់ ព្រមទាំងមើលឃើញបងប្អូនប្រជាពលរដ្ឋដែលគ្រួសារមានជីវភាពខ្វះខាតនោះ ព្រះតេជគុណក៏បានប្រមូលផ្តុំកៀរគរ រកមូលនិធិនិងសប្បុរសជន ដើម្បីទិញ សម្ភារ:សិក្សា ចែកជូនដល់គ្រប់សិស្សានុសិស្សនិងគ្រួសារប្រជាពលរដ្ឋដែលខ្វះខាតហើយ ម្យ៉ាងវិញទៀតការផ្តល់ជូននេះពិតជាបានជួយសម្រួលដល់ការរៀនសូត្ររបស់ក្មួយៗនិងពិសេសទៅទៀត គឺជួយសម្រាលដល់បន្ទុកគ្រួសារផងដែរ។

ព្រះគ្រូចៅអធិការ បានបន្ថែមថា ការចូលរួមចែក រំលែកនឹងគាំទ្រ ដែលជាចូលរួមចំណែកជាមួយការងារមនុស្សធម៌ ជាមួយអាជ្ញាធរមូលដ្ឋាន ក្នុងការជួយសង្គ្រោះ ក៏ដូចជាជួយសម្រាលទុក្ខលំបាក របស់ញោមញាតិ ក៏ដូចជាសិស្សានុសិស្ស ការងារមនុស្សធម៌នេះ មិនមែនជាលើកទីមួយឡើយ គឺក្រុមការងាររបស់ព្រះសង្ឃក្នុងក្រុងសៀមរាប តែងតែជួយដល់សង្គមនិងចូលរួមចំណែកជាមួយរាជរដ្ឋាភិបាលជារឿយកន្លងមកផងដែរ។

ព្រះគ្រូចៅអធិការវត្តស្វាយរមៀត ក៏បានមានសង្ឃដីកាបញ្ជាក់បន្ថែមទៀតថា ទេយ្យទាន សម្ភារ:សិក្សា និងគ្រឿងឧបភោគបរិភោគ ព្រមទាំងថវិកាទាំងនេះដែលបានប្រគេននិងចែកជូនដល់ សមណសិស្ស និង សិស្សានុសិស្ស ព្រមទាំងប្រជាពលរដ្ឋដែលជាគ្រួសារមានការខ្វះខាត នាពេលនេះគឺបានមកពីការ ជួយឧបត្ថម្ភពីញាតិញោពុទ្ធបរិស័ទសប្បុរសជនដែលជាអ្នកកាន់ព្រះពុទ្ឋសាសនា ហើយញាតិញោមពុទ្ធបរិស័ទតែងតែប្រគេនទេយ្យទាន នឹងចែកជូនដល់បងប្អូនប្រជាពលរដ្ឋក្រីក្រ។ សូមបញ្ជាក់ថាចំពោះបងប្អូនប្រជាពលរដ្ឋខ្វះខាត និងសមណសិស្សពុទ្ធិកបឋមសិក្សាវត្តបារាយមហានទីរតនារាម (ស្វាយរមៀត) និងសិស្សានុសិស្សសាលាបឋមសិក្សាបន្ទាយឈើសរុបចំនួនទាំងអស់ ៣៦៧នាក់ ក្នុងម្នាក់ៗទទួលបាន៖ ១.ប្រជាពលរដ្ឋចំនួន ២០គ្រួសារ ទទួលបានក្នុងមួយគ្រួសារ អង្ករ២០គីឡូ ទឹកត្រីទឹកស៊ីអ៊ីវ មី១ កេសតូច អំបិល១គីឡូ ទឹកសុទ្ធ១យួរ ប្រាក់៣០.០០០រៀល សំពត់១ឈុត សាប៊ូលាង ចាន១ដប។ ២ .ប្រជាពលរដ្ឋចំនួន ៧៥ គ្រួសារ ទទួលបាន១គ្រួសារ សារ៉ុង១ ប្រាក់១០.០០០រៀល។ ៣.សមណៈសិស្ស ៤០អង្គ ទទួលបានសៀវភៅ២ ក្បាលប៊ិច២ដើម បច្ច័យ១០.០០០រៀល។ ៤ .សិស្សា នុសិស្ស ២០០នាក់ ក្នុងម្នាក់ៗ ទទួលបានសៀវភៅ ២ក្បាលប៊ិច២ដើម ប្រាក់៣.០០០រៀល។ ៥.លោកគ្រូ អ្នកគ្រូ ៦នាក់ ក្នុងម្នាក់ៗ ទទួលបានសារ៉ុង១ ប្រាក់២៥.០០០រៀល។ ៦. ប្រជាការពារ និងនគរបាល ១០ នាក់ ក្នុងម្នាក់ៗ ទទួលបានប្រាក់ ២៥.០០០រៀល។ ៧. ស.ស.យ.ក និងក្រុមការងារភូមិ៧នាក់ក្នុងម្នាក់ៗទទួលបានប្រាក់២៥.០០០ រៀល ។ ៨. ប្រគេនព្រះរាជាគណ:និងព្រះគ្រូ ៩ព្រះអង្គ ក្នុងមួយព្រះអង្គ ទទួលបច្ច័យបាន៥០.០០០រៀលផងដែរ៕

ដោយ ÷ ពន្លឺ