ខេត្តសៀមរាប ÷ ក្នុងអំឡុង ឆ្នាំ ២០២១ ព្រះសង្ឃគណៈកម្មការ អាចារ្យវត្ត ដោយបានការឧបត្ថម្ភគាំទ្រថវិកាពីប្រជាពុទ្ឋបរិស័ទបានកសាងផ្លូវបេតុង១ខ្សែមានទទឹង៥ ម៉ែត្រ បណ្តោយ ១.២០០ ម៉ែត្រ រួមនិងបន្ទប់ទឹក១ខ្នង ស្មើនិង១០បន្ទប់ និងដាំដើមពោធិ៍ចំនួន ១.០០០ដើម ដើមគគីចំនួន ១.០០០ដើម សរុបបច្ច័យអស់ចំនួន២២០.០០០ដុល្លាសហរដ្ឋអាមេរិក ក្រោមការផ្តួចផ្តើមកសាងដោយព្រះតេជគុណ ប្រាក់ សៃ ព្រះគ្រូចៅអធិការវត្ត។
ផ្លូវបេតុងនេះភ្ជាប់ពីចុងភូមិថ្មី ឃុំខ្នងភ្នំ ទៅកាន់វត្តព្រះក្រាលស្ថិតនៅលើខ្នងភ្នំគូលែន ក្នុងភូមិសាស្ត្រស្រុកស្វាយលើ ខេត្តសៀមរាប។ ក្រោយពីសាងសង់រួចជាស្ថាពរសមិទ្ឋផលទាំងនេះបានកាត់ខ្សែបូរសម្ពោធដាក់ឱ្យប្រើប្រាស់នៅថ្ងៃទី០៣ ខែមិថុនា ឆ្នាំ២០២៣ ក្រោមអធិបតីភាពឯកឧត្តមអ្នកឧកញ៉ាបណ្ឌិត សៀង ណាំ តំណាងរាស្ត្រមណ្ឌលសៀមរាប និងវត្តមានអភិបាលស្រុក ប្រធានក្រុមប្រឹក្សាស្រុក និងអាជ្ញាធរមូលដ្ឋាន ព្រមទាំងសប្បុរសជន ប្រជាពលរដ្ឋ សិស្សានុសិស្សចូលរួមយ៉ាងច្រើនកុះករ។
លោក អៀង ពិសិដ្ឋ អភិបាលស្រុកស្វាយលើ មានប្រសាសន៍ថា ៖ រយៈកាលកន្លងទៅនេះក្រោមការដឹកនាំរបស់រដ្ឋបាលស្រុករួមទាំងការសម្របសម្រួល ពីអាជ្ញាធរជាតិអប្សរា មន្ទីរបរិស្ថានខេត្ត មន្ទីរធម្មការ និងសាសនាខេត្ត រដ្ឋបាលឃុំព្រមទាំងព្រះមន្ត្រីសង្ឃជាពិសេសព្រះគ្រូចៅអធិការគ្រប់វត្តអារាមទាំងអស់ និងអាចារ្យគណៈកម្មការបានកសាងសមិទ្ធផលនានាមួយចំនួនក្នុងវត្តរៀងៗខ្លួនបន្ថែមទៀត ដើម្បីបម្រើឲ្យ វិស័យព្រះពុទ្ធសាសនា កាន់តែរីកចម្រើនជាបន្តបន្ទាប់ក្រៅពីនេះវិស័យពុទ្ធសាសនាព្រមទាំងបានចូលរួមចំណែកយ៉ាងធំធេងមិនអាចខ្វះបាន ជាមួយផ្នែកអាណាចក្រក្នុងកិច្ចដំណើរការកសាងអភិវឌ្ឍន៏ សហគមន៍ និងការជួយឧបត្ថម្ភសាច់ប្រាក់ជូនស្ត្រីក្រីក្រមានផ្ទៃពោះ កុមារអាយុក្រោម ២ឆ្នាំ ក្មេងកំព្រា ចាស់ជរា និងជនងាយរងគ្រោះ ជាពិសេសនៅក្នុងអំឡុងប្រទេសជាតិយើងជួបវិបត្តិនៃការរាលដាលជំងឺកូវីដ១៩ ព្រះសង្ឃបានចូលរួមយុទ្ធនាការជាមួយរាជរដ្ឋាភិបាលកម្ពុជាក្រោមការដឹកនាំដ៏ប៉ិនប្រសប់របស់សម្តេអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដោយបានផ្តល់ជូនជាបច្ច័យ និងទេយ្យទានជួយដល់បងប្អូនប្រជាពលរដ្ឋដែលធ្វើចត្តាឡីស័ក និងព្យាបាល ។
ព្រះបវរវិជ្ជា ទេព ភឿន ព្រះវិន័យធរគណខេត្ត និងជាព្រះចៅអធិការវត្តបុព្វទិសារាម ហៅវត្តកំពង់ក្តីស្រុកជីក្រែង ខេត្តសៀមរាប មានសង្ឃដីកាថា៖ផ្លូវមួយខ្សែនេះ ជាសសៃឈាមយ៉ាងសំខាន់សម្រាប់ព្រះសង្ឃ និងបងប្អូនដែលរស់នៅក្នុងភូមិសាស្ត្រស្រុកស្វាយ លើ ក្នុងការនិមន្តធ្វើដំណើរទៅមកក្នុងការទៅធ្វើបុណ្យទានផ្សេងៗ និងជួយសម្រួលដល់ការធ្វើដំណើររបស់អ្នកទេសចរណ៍ជាតិនិងអន្តរជាតិដែលចង់មកទស្សនាទិដ្ឋភាពធម្មជាតិនៃតំបន់ខ្នងភ្នំជាពិសេសវត្តព្រះក្រាល ដែលនេះជាការឆ្លើយតបទៅនឹងការចង់បាន និងស្របតាមអនុសាសន៍ដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា “មានផ្លូវមានក្តី សង្ឃឹម”។
សំណេះសំណាល ឱកាសនោះ ឯកឧត្តម សៀង ណាំ បានសម្តែងការកោតសរសើរចំពោះព្រះចៅអធិការ ព្រះសង្ឃ គណៈកម្មការវត្តព្រះក្រាល សប្បុរសជនជិតឆ្ងាយនិងអាជ្ញាធរមូលដ្ឋាន មន្ត្រីជំនាញពាក់ព័ន្ឋដែលបានចូលរួមបរិច្ចាគធនធានថវិកា និងសម្របសម្រួល ឲ្យសម្រេចបានសមិទ្ឋិផលដ៏ធំធេងនេះ។
នាពេលនោះ ឯកឧត្តម សៀង ណាំ មានប្រសាសន៍ ថា៖ផ្តើមចេញពីថ្ងៃជ័យជម្នះថ្ងៃ៧មករា១៩៧៩និងដោយមានការដឹកនាំដ៏ត្រឹមត្រូវ ពិសេសចាប់ពីចុងឆ្នាំ១៩៩៨ ក្រោមគោលនយោបាយឈ្នះ ឈ្នះ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី បាននាំមកនូវសុខសន្តិភាព បង្រួបបង្រួមជាតិ ផ្សះផ្សារជាតិក្រោមដំបូលសន្តិភាពតែមួយ រួមគ្នាធ្វើការអភិវឌ្ឍរីកចម្រើនលើគ្រប់វិស័យដូចឃើញជាក់ស្តែងទាំងអស់គ្នាស្រាប់ ។ ឯកឧត្តម បញ្ជាក់ថា៖មានសម្តេចតេជោសែន មានសន្តិភាពនិងមានការអភិវឌ្ឍគ្រប់ទីកន្លែង ហេតុនេះសូមអំពាវនាវដល់ លោកតា លោកយាយ អ៊ុំពូមីង បងប្អូនប្រជាពលរដ្ឋ ដែលមានអាយុគ្រប់ និងមានសិទ្ធិបោះឆ្នោត សូមអញ្ជើញទៅចូលរួមបោះឆ្នោតជ្រើសរើសតំណាងរាស្ត្រ នីតិកាល ទី៧ ដែលនឹងប្រព្រឹត្តទៅនៅថ្ងៃអាទិត្យ ទី២៣ ខែកក្កដា ឆ្នាំ២០២៣ ខាងមុខនេះកុំបីខានឡើយ ដើម្បីជ្រើសរើសប្រមុខដឹកនាំគិតគូរពីសុខទុក្ខប្រជាពលរដ្ឋនិង សម្រាប់បន្តការអភិវឌ្ឍរីកចម្រើនរុងរឿងលើគ្រប់វិស័យ និងប្រកបដោយសុខសន្តិភាព និងស្ថេរភាពសង្គម ជាពិសេសត្រូវនាំគ្នាថែរក្សាសន្តិភាពឲ្យបានស្ថិតស្ថេរគង់វង្ស ទោះក្នុងតម្លៃណាក៏ដោយកុំឱ្យបាត់ បង់នូវសន្តិភាពដែលរកបានមកដោយលំបាកនេះ។
ឯកឧត្តម បានប្រគេនថវិកាដល់ព្រះចៅអធិការ ជូនយាយជីតាជី ប្រជាពលរដ្ឋនិងសិស្សានុសិស្ស ក្នុងពិធីឆ្លងសរុបចំនួន៤.០០០ដុល្លារ ផងដែរ។
ដោយ ÷ ពន្លឺ
