ផ្លូវដីសប្រវែងជិត៥គីឡូម៉ែត្រនៅក្នុងឃុំខ្នាសណ្ដាយ ស្រុកបន្ទាយស្រី ត្រូវបានបើកការដ្ឋានសាងសង់ ដើម្បីសម្រួលដល់ការធ្វើដំណើរ ប្រកមុខរបររបស់ប្រជាពលរដ្ឋ 

ខេត្តសៀមរាប ÷ ដើម្បីសម្រួលដល់ការធ្វើដំណើរ និងដឹកជញ្ជូន ផលិតផលកសិកម្ម ក៏ដូចជាទៅទទួលសេវាផ្សេងៗ ក្រុមការងារថ្នាក់ជាតិចុះមូលដ្ឋានស្រុកបន្ទាយស្រី បានសាងសង់ផ្លូវដីស មួយខ្សែ ប្រវែង ៤.៥០០ម៉ែត្រ ដល់ឃុំខ្នាសណ្ដាយ ស្រុកបន្ទាយស្រី ខេត្តសៀមរាប និងបានបើកការដ្ឋានសាងសង់ក្រោមអធិបតីភាពឯកឧត្តម សែម សុវណ្ណនី ប្រធានក្រុមការងារថ្នាក់ជាតិចុះមូលដ្ឋានស្រុកបន្ទាយស្រី នៅព្រឹកថ្ងៃទី០១ ខែមិថុនា ឆ្នាំ២០២៣នេះ។

លោក រិន ឡូត អភិបាលនៃគណៈអភិបាលស្រុកបន្ទាយស្រី បានមានប្រសាសន៍អោយដឹងថា ផ្លូវដីស មួយខ្សែ ដែលបានបើកការដ្ឋានសាងសង់ ថ្ងៃនេះមានប្រវែង ៤.៥០០ម៉ែត្រ ទទឹង៧ម៉ែត្រ ពីចំណុច ភូមិទួលក្រឡាញ់ តភ្ជាប់ទៅដល់ភូមិអូរម្នាស់ ឃុំខ្នាសណ្ដាយ ស្រុកបន្ទាយស្រី ខេត្តសៀមរាប ដោយផ្លូវមួយនេះពីមុន ជាផ្លូវរទះគោ ដោយឃើញពីការលំបាក និងសំណូមពរពីប្រជាពលរដ្ឋ ក្រុមការងារថ្នាក់ជាតិចុះមូលដ្ឋានស្រុកបន្ទាយស្រី បានផ្ដល់ផ្លូវមួយខ្សែសនេះ ដើម្បីជួយសម្រួលដល់ប្រជាពលរដ្ឋទូទៅធ្វើដំណើរឆ្លងកាត់។

ឯកឧត្តម សែម សុវណ្ណនី ប្រធានក្រុមការងារថ្នាក់ជាតិចុះមូលដ្ឋានស្រុកបន្ទាយស្រី មានប្រសាសន៍ថាដោយហេតុតែកង្វះខាតនៃការតភ្ជាប់ខាងផ្នែកហេដ្ឋារចនាសម្ព័ន្ធ បងប្អូនប្រជាពលរដ្ឋ តែងជួបការលំបាកក្នុងការធ្វើដំណើរ និងដឹកជញ្ជូនកសិផល ពិបាកក្នុងការទៅទទួលសេវារដ្ឋបាល សេវាសុខាភិបាល ក៏ដូចជាការបញ្ជូនកូនចៅទៅមកសាលារៀន ដែលផ្លូវមួយខ្សែនេះ ពិតជាមានសារះសំខាន់ខ្លាំងណាស់ ប្រៀបដូចសរសៃ ឈាមរបស់ប្រជាពលរដ្ឋ សម្រាប់ធ្វើដំណើរ និងដឹកជញ្ជូន ផលិតផលកសិកម្ម ប្រចាំថ្ងៃ ដែលកន្លងមក បងប្អូន ប្រជាពលរដ្ឋ តែងតែទទូចចង់បានផ្លូវមួយខ្សែនេះ សម្រាប់ការធ្វើដំណើរ ប្រកមុខរបរ ចិញ្ជិមជីវិត ប្រចាំថ្ងៃរបស់ពួកគាត់។

ឯកឧត្តមបានបន្តថាផ្លូវមួយខ្សែនេះ កើតឡើងដោយ សារការចូលរួមថវិការរបស់ ឯកឧត្តមផ្ទាល់រួមជាមួយក្រុមការងារថ្នាក់ជាតិចុះមូលដ្ឋានស្រុកបន្ទាយស្រី បានចំនួន១៦.០០០ដុល្លារ ជាពិសេសការចូលរួមសហការរបស់ប្រជាពលរដ្ឋក្នុងមូលដ្ឋានក្នុងការលះ បង់ដីមួយចំនួនក្នុងការឈូសឆាយធ្វើផ្លូវថ្មីនេះផងដែរ ៕

ដោយ ÷ ពន្លឺ