ខេត្តសៀមរាប ÷ គម្រោងសាងសង់ និងជុសជុលផ្លូវបេតុងអាមេ ក្នុងឃុំចំនួន២ នៃស្រុកសូទ្រនិគម គឺដំដែក និងឃុំកៀនសង្កែ ដែលជាគម្រោងមូលនិធិឃុំសង្កាត់ឆ្នាំ២០២៣ ត្រូវបានប្រកាសដាក់ឲ្យដេញថ្លៃជាស្ថាបពរហើយ នៅថ្ងៃទី៣០ ខែឧសភា ឆ្នាំ២០២៣ ដោយក្នុងនោះមានការចូលរួមពីមន្ត្រីបច្ចេកទេសសាលាខេត្តសៀមរាប មន្ត្រីបច្ចេកទេសក្រុងសៀមរាប គណៈកម្មការលទ្ធកម្មនៃឃុំទាំង២ និងក្រុមហ៊ុនម៉ៅការផងដែរ។
លោក ផាន សាយ ប្រធានគណៈកម្មការលទ្ធកម្ម នៅក្នុងឃុំដំដែក បានឲ្យដឹងថា គណៈកម្មការលទ្ធកម្ម ឃុំគឺ បានដាក់ឲ្យដេញថ្លៃ គម្រោងសាងសង់ផ្លូវបេតុងអាមេចំនួនមួយខ្សែដែលមានប្រវែង០,២៤៥ គីឡូ ម៉ែត្រ ទទឹង៥ម៉ែត្រ កម្រាស់គ្រួស០.១៥ម៉ែត្រ ដែលស្ថិតនៅក្នុងក្នុងតម្លៃនៃការប៉ានស្មានគឺ ១៤២,៩៤៦,៣៣៩រៀល។ ដោយគម្រោងនេះមានក្រុមហ៊ុន ម៉ៅការ ដាក់សំណើដេញថ្លៃចំនួន ៤ក្រុមហ៊ុន ។ ក្រោយពីបានពិនិត្យ និងវាយតម្លៃលើសំណុំ ឯកសារដំណើរការដេញថ្លៃរបស់អ្នកទទួលការ ក្នុងនោះលទ្ធផលបានទៅលើ ក្រុមហ៊ុន ង៉ោ ឈុត (ម្ចាស់ក្រុមហ៊ុនឈ្មោះ អួន សាវិញ ) ក្នុងទឹកប្រាក់ចំនួន ១៤១.០០០.០០០រៀល។
ចំណែកឯលោក ហុង លី ប្រធានគណៈកម្មការលទ្ធកម្ម នៅក្នុងឃុំកៀនសង្កែ បានឲ្យដឹងថា គណៈកម្ម ការ លទ្ធកម្មគឺបានដាក់ឲ្យដេញថ្លៃ គម្រោងជួសជុលផ្លូវដីក្រាលគ្រួសក្រហមចំនួនមួយខ្សែ ដែលមានប្រវែង ១១០០ម៉ែត្រ ទទឹង៥ម៉ែត្រ កម្រាសគ្រួស ០,១៥ម៉ែត្រ និងសាងសង់លូកាត់ផ្លូវ ៨កន្លែង ដែលគម្រោងនេះស្ថិតនៅក្នុងតម្លៃនៃការប៉ានស្មានគឺ ១១៤,៦២២,៩០៩រៀល។ ដោយគម្រោងនេះមានក្រុមហ៊ុនម៉ៅការដាក់សំណើដេញថ្លៃចំនួន៤ក្រុមហ៊ុន ។ បន្ទាប់ពីគណៈកម្មការលទ្ធកម្មបានពិនិត្យនិងវាយតម្លៃលើសំណុំ ឯកសារដំណើរការដេញថ្លៃរបស់អ្នកទទួលការ ក្នុងនោះលទ្ធផលបានទៅលើ ក្រុមហ៊ុន អុឹង លីសួរ ក្នុងទឹកប្រាក់ចំនួន ១៣១.៦៤០.០០០រៀល។
ជាមួយគ្នានោះ ក្រុមហ៊ុនទាំងអស់ដែលបានដេញថ្លៃតម្លៃទាបទី១ នៅក្នុងគម្រោងជុសជួលផ្លូវក្រាលគ្រួសក្រហម និង គម្រោងសាងសង់ផ្លូវមេតុងអាមេ ដែលស្ថិតនៅក្នុងឃុំដំដែក និងឃុំកៀនសង្កែ បានធ្វើការប្ដេជ្ញាចិត្ត ដោយសន្យាថា នឹងធ្វើឲ្យបានត្រឹមត្រូវទៅតាមគំនូសប្លង់បច្ចេកទេស ស្របតាមបទដ្ឋានគតិយុទ្ធនៃការសាងសង់ និង គោរពតាមលក្ខណ្ឌដូចមានចែងនៅក្នុងកិច្ចសន្យា៕
ដោយ ÷ ពន្លឺ
