ខេត្តសៀមរាប ÷ នៅព្រឹកថ្ងៃទី២៧ ខែឧសភា ឆ្នាំ ២០២៣ នេះ លោកជំទាវ ទាង អេង ទៀសីហា អនុប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប និងក្រុមការងារបានអញ្ជើញទទួលទ័យទានជាគ្រឿងឧបភោគបរិភោគ និងសម្ភារៈប្រើប្រាស់ផ្សេងៗពីព្រះគ្រូចៅអធិការវត្តព្រះព្រហ្មរ័ត្ន និងពុទ្ធបរិស័ទចំណុះជើងវត្តនៅក្នុងក្រុងសៀមរាប ។
ព្រះតេជគុណ តង់ តន ព្រះបាឡាត់គណខេត្តសៀមរាប និងជាព្រះគ្រូចៅអធិការវត្តព្រះព្រហ្មរ័ត្ន បានមានសង្ឃដីកាថាព្រះអង្គ មានការគាំទ្រ និងមានទឹកព្រះទ័យរីករាយ ចូលរួមចំណែកជាមួយសកម្មភាពមនុស្សធម៌របស់កាកបាទក្រហមកម្ពុជា ក្នុងការជួយ សង្គ្រោះក៏ដូចជាជួយសម្រាលទុក្ខលំបាក របស់ញោមញាតិទីទ័លក្រនៅគ្រប់ទីកន្លែង ។
ព្រះគ្រូចៅអធិការវត្តព្រះព្រហ្មរ័ត្ន ក៏បានមានសង្ឃដីកាបញ្ជាក់បន្ថែមទៀតថា គ្រឿងឧបភោគបរិភោគ និងគ្រឿងបន្លុងដែលប្រគល់ជូនដល់សាខាកាកបាទក្រហមខេត្តនាពេលនេះ គឺបានមកពីការប្រគេនរបស់ពុទ្ឋបរិស័ទក្នុងពិធីបុណ្យផ្សេងៗ នាពេលកន្លងមក ហើយក៏បានសន្សំ និងប្រមូលបម្រុងទុកសម្រាប់ ចែក ជូនគ្រួសារ ឬអាជ្ញាធរមូលដ្ឋានណាដែលជួប ហានិ ភ័យដោយប្រការផ្សេងៗ សម្រាប់ដោះស្រាយការលំបាកមួយគ្រាៗ តាមលទ្ឋភាពដែលព្រះសង្ឃមាន។
មានប្រសាសន៍ក្នុងឱកាសនោះដែរ លោកជំទាវ ទាង អេង ទៀសីហា អនុគណៈកម្មាធិការសាខាកាកបាទក្រហមកម្ពុជាខេត្តសៀមរាប ក៏បានថ្លែងអំណរព្រះគុណចំពោះព្រះទ័យដ៏សប្បុរសធម៌ របស់ព្រះគ្រូចៅអធិការវត្តព្រះព្រហ្មរ័ត្ន ព្រមទាំងពុទ្ធបរិស័ទទាំងអស់ ក្នុងការយកព្រះទ័យទុកដាក់ ប្រទាន នូវទេយ្នយទាន គ្រឿងឧបភោគបរិភោគ នេះសបញ្ជាក់ ពីព្រះទ័យ ដ៏មនុស្សធម៌ ចំពោះបងប្អូនប្រជាពលរដ្ឋរងគ្រោះ និងងាយរងគ្រោះ។ ក្នុងកាយវិកាដ៏មនុស្សធម៌នេះ គឺជាការចូលរួមរបស់ ព្រះសង្ឃក្នុងវិស័យអាណាចក្រ ជាមួយសកម្មភាពមនុស្សធម៌របស់ កាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន។ គ្រឿងឧបភោគបរិភោគនិងសម្ភារៈប្រើប្រាស់ទាំងនេះសាខាកាកបាទក្រហមកម្ពុជាខេត្ត នឹងយកទៅប្រើប្រាស់ឲ្យចំគោលដៅមនុស្សធម៌ នៅពេលដែលប្រជាពលរដ្ឋយើងទទួលរងនូវគ្រោះមហន្តរាយផ្សេងៗ ដោយមិនប្រកាន់ ពូជសាសន៍ ពណ៌សម្បុរ និងនិន្នាការនយោបាយណា មួយឡើយ ស្របតាមគោលការណ៍គ្រឹះទាំង៧ ប្រការរបស់ចលនាកាកបាទក្រហម និងអឌ្ឍចន្ទក្រហម។
ទេយ្យទានដែលសាខាកាកបាទក្រហមខេត្តទទួលពីព្រះគ្រូចៅអធិការវត្តព្រះព្រហ្មរ័ត្ន មានដូចជា ៖ ឃីតបច្ច័យ៤មានចំនួន២៧កញ្ចប់ធំ .អង្ករចំនួន៣០ ការ៉ុង.ទឹកត្រី២០យួរ.ទឹកស៊ីអ៊ីវ២០យួរ .ក្នុងនោះដែរក៏មានអំណោយរបស់ឯកឧត្តម បណ្ឌិត ហ៊ុន ម៉ានិត មានអង្ករចំនួន៤០០គីឡូក្រាម និងមី៦កេសធំ ព្រមទាំងឧបាសិកា ហោ សាយ័ន ធាស៊ីវុត្ថា មានអង្ករ៥០ ការ៉ុង .ទឹកស៊ីអ៉ីវ៥០យួរ .ទឹកស៊ីអ៊ីវ ៥០យួរ. ទឹកត្រី ៥០យួរ រួមទាំងមានថវិកាចូលរួមរបស់ពុទ្ធបរិស័ទសរុបចំនួន ៣,០០០ដុល្លាអាមេរិក និង ៥ លានរៀលផងដែរ៕
ដោយ ÷ ពន្លឺ