ខេត្តសៀមរាប ÷ ផ្ទះមនុស្សធម៌១ខ្នង ដែលបានឧបត្ថម្ភថវិកាសាងសង់ដោយ លោក ស៊ន់ កាន់ ផ្តល់តាមរយៈសាខាកាកបាទក្រហមខេត្តសៀមរាប ដែលមានផ្ទះទំហំ ៦ម៉ែត្រ X ៦ម៉ែត្រ, មាន២បន្ទប់ ដំបូលប្រក់ស័ង្កសីភ្លឺក្បឿង ជញ្ជាំងស្មាតបត បាតក្រាលការ៉ូ មានកម្ពស់ផុតពីដី០.៥០ម៉ែត្រ ដោយសង់លើផ្ទៃដីផ្ទាល់ខ្លួនទំហំ ១២ X ១៧ម៉ែត្រ ត្រូវបានធ្វើពិធីប្រគល់ ជូនលោកយាយ តូក ទន់ អាយុ៦៦ឆ្នាំ(នៅលីវ)ជរាទុរគត ពិការខ្លីជើងស្តាំម្ខាងពីកំណើតពិបាកក្នុងការធ្វើដំណើរឆ្ងាយ ទៅស្រែក៏មិនបាននៅតែផ្ទះហើយ លោកយាយបានចិញ្ចឹមចៅស្រី១នាក់ ដែលជាកូនរបស់ក្មួយគ្រាន់បានជាគ្នា ដែលមានទីលំនៅក្នុងភូមិឫស្សីតូច ឃុំស្វាយស ស្រុកវ៉ារិន ខេត្តសៀមរាប នៅព្រឹកថ្ងៃទី២៧ ខែ ឧសភា ឆ្នាំ ២០២៣ ក្រោមវត្តមាន លោកជំទាវ ទាង អេង ទៀសីហា អនុប្រធានគណៈ កម្មាធិការសាខាកាកបាទក្រហម ខេត្តសៀមរាប ។
មានប្រសាសន៍នោះ លោកជំទាវ ទាង អេង ក៏បានពាំនាំនូវប្រសាសន៍ផ្ដាំផ្ញើសួរសុខទុក្ខ និងសេចក្ដីនឹករលឹកពីសំណាក់ឯកឧត្តម ទៀ សីហា ប្រធានគណៈ កម្មាធិការសាខាកាកបាទក្រហមកម្ពុជាខេត្តសៀមរាប ជូនដល់បងប្អូនប្រជាពលរដ្ឋទាំងអស់ដោយក្តីនឹករលឹកដែលជានិច្ចកាល តែងតែយកចិត្តទុកដាក់គិតគូរចំពោះសុខទុក្ខប្រជាពលរដ្ឋគ្រប់រូប មិនប្រកាន់វណ្ណៈ ពណ៌សម្បុរ ជំនឿ សាសនា ឬនិន្នាការ នយោបាយណាមួយឡើយ។
លោកជំទាវ ទាង អេង ទៀសីហា អនុប្រធានគណៈកម្មា ធិការសាខាកាកបាទក្រហមខេត្តសៀមរាប ក៏ បានមានផ្តាំផ្ញើបន្ថែមដល់បងប្អូនប្រជាពលរដ្ឋទាំងអស់ដែលបានចូលរួម ជាពិសេសលោកយាយ ដែលបានទទួលផ្ទះថ្មី សូមមានការប្រុងប្រយ័ត្នខ្ពស់បំផុតក្នុងការថែរក្សាសុខភាព ហើយកត្តាដែលសំខាន់នោះ គឺការរស់នៅត្រូវប្រកាន់យកនូវការរស់នៅស្អាត ពិសារទឹកដាំពុះ ហូបស្អាត សម្អាតបរិស្ថានជុំវិញផ្ទះ ណែនាំកូនចៅឲ្យគោរពច្បាប់ចរាចណ៍ គេងក្នុងមុងដើម្បីការពារជំងឺគ្រុនឈាម ជាពិសេស សូមក្រើនរម្លឹកដល់ប្រជាពលរដ្ឋនៅតាមភូមិកុំឲ្យធ្វេសប្រហេសពីជំងឺ កូវីដ-១៩ឱ្យសោះ យើងរួមគ្នាការពារ ត្រូវពាក់ម៉ាស លាងដៃជាមួយសាប៊ូ ឬអាល់កុល ជាប្រចាំត្រូវអនុវត្ត ឲ្យបានតាមការណែនាំរបស់ក្រសួងសុខាភិបាលព្រមទាំងឲ្យមានការប្រុងប្រយ័ត្នខ្ពស់ចំពោះភ្លើងផ្សែង ដោយរដូវរំហើយ ក្តៅ ស្ងួត ងាយទទួលរងគ្រោះអគ្គីភ័យបំផុត ។
ក្នុងនោះដែរក៏មានអំណោយមនុស្សធម៌បន្ថែមជូនដល់លោកយាយ តូក ទន់ សម្រាប់សង្កត់ផ្ទះបន្ថែមទៀត រួមមាន ៖អង្ករចំនួន៦០គីឡូក្រាម .មី១កេស . ត្រីខ១ យួរ.ទឹកត្រី១យួរ. អំបិល២គីឡូក្រាម. ស្កសរ២ គីឡូ ក្រាម.ប៊ីចេង២០កញ្ចប់តូច.កន្ទេល២.ឃីត១កញ្ចប់. ខ្នើយ២ និងសម្ភារៈផ្ទះបាយមួយចំនួនព្រមទាំងថវិកាចំនួន៤០ម៉ឺនរៀលនិង១០០ដុល្លារផងដែរ ។
សម្រាប់លោកតា លោកយាយ ដែលអញ្ជើញចូលរួមពិធីចំនួន៥០នាក់ដោយម្នាក់ៗទទួលបាន៖ អង្ករ៣០ គីឡូក្រាម.មី១កេស.ត្រីខ១យួរ.ទឹកត្រី១យួរ .អំបិល១ គីឡូក្រាម. ស្កសរ១គីឡូក្រាម.ប៊ីចេង១០កញ្ចប់តូច. ឃីត១កញ្ចប់ និងថវិកាចំនួន៨ម៉ឺនរៀល ផងដែរ ៕
ដោយ ÷ ពន្លឺ
