ខេត្តសៀមរាប ÷ នៅវេលាម៉ោង ១៣ និង៤០នាទីរសៀល ថ្ងៃទី២២ ខែឧសភា ឆ្នាំ២០២៣ ខណះពេលម្ចាស់ផ្ទះ នាំគ្នាអង្គុយលេងនៅក្រោមផ្ទះ ដោយនៅលើផ្ទះក្ក្តៅខ្លាំង ក៏នាំចុះមកក្រោម ត្រូវភ្លើងឆេះចេញពីខាងលើបណ្តាលឲ្យឆេះគ្មានសល់ តែមួយប៉ព្រិចភ្នែក តែសំណាងល្អ បានយករថយន្តចេញទាន់ ។ ហេតុការណ៍ ករណីឆេះផ្ទះ ពលរដ្ឋនោះបានកើតឡើង ស្ថិតនៅចំណុចភូមិតាជេត ឃុំសំរោងយា ស្រុកពួក ខេត្តសៀមរាប ។
តាមការបញ្ជាក់របស់លោកវរសេនីយ៍ឯក ទេព ពុំសែន អធិការនគរបាកស្រុកពួក បានឲ្យដឹងថា ផ្ទះប្រជាពលរដ្ឋ ដែលឆេះ មានឈ្មោះ អឿ សំណាង ហៅ វ៉ា ភេទប្រុស អាយុ ៥៨ឆ្នាំ និង ប្រពន្ធឈ្មោះ ជា ផានី ភេទស្រី អាយុ ៥៦ឆ្នាំ មាន(កូន៥នាក់) ស្ថិតនៅភូមិតាជេត ឃុំសំរោងយា ស្រុកពួក ខេត្តសៀមរាប។ លោកបានបន្ថែមថា ករណីនេះមានការខូចខាត : ឆេះផ្ទះអស់ទាំងស្រុង មាន ផ្ទះ ១ខ្នង សង់អំពីឈើខាងលើ ថ្មខាងក្រោម ផ្ទះទំហំ ទទឹង ៧ម X បណ្ដោយ ៩ម ដំបូលប្រក់ក្បឿង ជញ្ជាំងក្តារ មានសំយ៉ាបខាង កើត ៧ម នឹងសំយាបខាងត្បូង ៤ម ។ ក្នុងនោះបាត់បង់ រួមមាន មាសចំនួន ៤ តម្លឹង (រកមិនទាន់ឃើញ) -ប្រាក់ខ្មែរ ចំនួន១០លានរៀល -ម៉ាសុីនកិនស្រូវខ្នាតតូច ១គ្រឿង -ទូរទឹកកក ១គ្រឿង -ទូរស័ព្ទដៃ ២គ្រឿង -ស្រូវពូជ ចំនួន ៦ការ៉ុង និង សម្ភារប្រើប្រាស់មួយចំនួន និងឯកសារអត្តសញ្ញាណប័ណ្ណ បង្កាន់ដៃប្លង់ដី សំបុត្រកំណើត ប័ណ្ណបើកបរ សៀវភៅគ្រួសារ ដែលនៅក្នុងផ្ទះត្រូវបានឆេះអស់ទាំងស្រុង ។
លោកបញ្ជាក់ទៀតថា ក្នុងករណីឆេះផ្ទះពលរដ្ឋនោះ កម្លាំងជំនាញ នៃអធិដ្ឋាននគរបាលស្រុកពួក បានចុះអន្តរាគមន៍ សហការមានប៉ុស្តិ៍សំរោងយា ប៉ុស្តិ៍ខ្នាត ប៉ុស្តិ៍កែវពណ៌ ប្រជាការពារ និងប្រជាពលរដ្ឋ និងកម្លាំងនគរបាលខេត្ត ដោយមានរថយន្តពន្លត់អគ្គីភ័យនគរបាលស្រុកពួក ១គ្រឿង និងរថយន្តពន្លត់អគ្គីភ័យនគរបាលខេត្ត ២គ្រឿងប្រើប្រាស់ទឹកអស់៣រថយន្ត បាញ់ទឹកពន្លត់ភ្លើង រលត់អស់ទាំងស្រុង នៅវេលាម៉ោង ១៤ និង ៤០នាទី នាថ្ងៃ ខែ ឆ្នាំដដែល ។
តាមម្ចាស់ផ្ទះ បានបញ្ជាក់ថា មុនពេលកើតហេតុ គាត់នៅក្រោមផ្ទះបានលឺស្នូរផ្ទុះ(ផុស)នៅខាងលើផ្ទះ មិនចាប់ អារម្មណ៍ លុះមួយសន្ទុះក៏ដឹងថា ភ្លើងឆេះនៅផ្នែកលើនៃផ្ទះខ្លាំង ស្ទុះហៅឲ្យគេជួយ ដោយមិនអាចពន្លត់ភ្លើងឈ្នះឡើយ ។
តាមការបញ្ជាក់របស់សមត្ថកិច្ចជំនាញ មូលហេតុឆេះបណ្ដាលមកពីទុសេខ្សែរភ្លើង សរុបជាទឹកប្រាក់ អស់ចំនួនប្រមាណ ជិត៥ម៉ឺនដុល្លារ៕
ដោយ ÷ ពន្លឺ
