តំណាងរាស្ត្រមណ្ឌលសៀមរាប ថា៖មានសន្តិភាពទើបមានការអភិវឌ្ឍនិងបានអំពាវនាវឱ្យបងប្អូនប្រជាពលរដ្ឋរួមសាមគ្គីគ្នារក្សាសុខសន្តិភាព ដើម្បីបន្តការអភិវឌ្ឍក្នុងមូលដ្ឋានឱ្យកាន់តែរីកចម្រើនថែមទៀត 

ខេត្តសៀមរាប ÷ ថ្លែងក្នុងពិធីសម្ពោធឆ្លងសមិទ្ធផលមួយចំនួនក្នុងវត្តអារញ្ញសាគរ ស្ថិតក្នុងភូមិអារញ្ញ សង្កាត់សៀមរាប ក្រុងសៀមរាប ខេត្តសៀមរាប នាថ្ងៃទី២១ខែឧសភា ឆ្នាំ២០២៣ ឯកឧត្តម បណ្ឌិត អ្នកឧកញ៉ា សៀង ណាំ តំណាងរាស្រ្ត មណ្ឌលសៀមរាប មានប្រសាសន៍ថា៖ផ្តើមចេញពីថ្ងៃជ័យជម្នះថ្ងៃ៧ មករា១៩៧៩និងដោយមានការដឹកនាំដ៏ត្រឹមត្រូវ ពិសេសចាប់ពីចុងឆ្នាំ១៩៩៨ ក្រោមគោលនយោ បាយឈ្នះ ឈ្នះ របស់សម្តេចអគ្គមហាសេនាបតីតេ ជោ ហ៊ុន សែន នាយករដ្ឋមន្ត្រី បាននាំមកនូវសុខសន្តិភាព បង្រួបបង្រួមជាតិ ផ្សះផ្សារជាតិក្រោមដំបូលសន្តិភាពតែមួយ រួមគ្នាធ្វើការអភិវឌ្ឍរីកចម្រើនលើគ្រប់វិស័យដូចឃើញជាក់ស្តែងទាំងអស់គ្នាក្នុងនោះវិស័យព្រះពុទ្ឋសាសនាក៏មានការរីកចម្រើនជាបន្តបន្ទាប់រហូតមកដល់បច្ចុប្បន្ន។

ឯកឧត្តមបានអំពាវនាវដល់លោកតា លោកយាយ បងប្អូនប្រជាពលរដ្ឋ ដែលមានអាយុគ្រប់ និងមានសិទ្ធិបោះឆ្នោត សូមអញ្ជើញទៅចូលរួមបោះឆ្នោតជ្រើសរើសតំណាងរាស្ត្រ នីតិកាលទី៧ ដែលនឹងប្រព្រឹត្តទៅនៅថ្ងៃអាទិត្យ ទី២៣ ខែកក្កដា ឆ្នាំ២០២៣ ខាងមុខនេះកុំបីខានឡើយ ដើម្បីជ្រើសរើសប្រមុខដឹកនាំដែលតែងតែគិតគូរពីសុខទុក្ខប្រជាពលរដ្ឋនិង សម្រាប់បន្តការអភិវឌ្ឍ ក្នុងមូលដ្ឋានជាបន្តទៀត ជាពិសេសត្រូវនាំគ្នាថែរក្សាសន្តិភាពឱ្យបានស្ថិតស្ថេរគង់វង្ស ទោះក្នុងតម្លៃណាក៏ដោយកុំឱ្យបាត់បង នៅសន្តិភាពដែលរកបានមកដោយលំបាកនេះ។

ឯកឧត្តម សៀង ណាំ បានកោតសរសើរចំពោះព្រះចៅអធិការវត្ត ព្រះសង្ឃគ្រប់ព្រះអង្គ គណៈកម្មការវត្តអារញ្ញសាគរព្រមទាំង លោកតា លោកយាយ សប្បុរសជន មន្រ្តីរាជការ បងប្អូនប្រជាពលរដ្ឋ ក្នុងសង្កាត់សៀមរាប ដែលបានខិតខំយកព្រះទ័យ និងយកចិត្តទុកដាក់ សហការជួយគ្នា កសាងលេចចេញជាសមិទ្ធផលនានាច្រើនក្នុងវត្ត ធ្វើឲ្យវត្តកាន់តែមានសោភ័ណ្ឌស្រស់ស្អាត ឡើង សម្រាប់ប្រជាពលរដ្ឋធ្វើបុណ្យទានផ្សេងៗ។ ឯកឧត្តម បានចាត់ទុកសមិទ្ឋផលថ្មីមានដូចជា ក្លោងទ្វា ការកែលំអសួនច្បារ ក្នុងវត្ត ថាជាជំហានរីកចម្រើនថ្មីមួយថែមទៀតសម្រាប់បំរើឱ្យវិស័យព្រះពុទ្ឋសាសនា។

ឯកឧត្តម មានប្រសាសន៍ថា៖ ការរីកចម្រើនលើគ្រប់វិស័យ ជាពិសេសលើផ្នែកព្រះពុទ្ធសាសនា គឺដោយ សារប្រទេសជាតិ មានសុខសន្តិភាព និងស្ថេរភាព ក្រោមការដឹកនាំដ៏ត្រឹមត្រូវរបស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ហើយកត្តាសុខសន្តិភាព ស្ថិរភាពនិងការរីកចម្រើន រួមជាមួយនឹងគោលនយោបាយ និងយុទ្ឋសាស្ត្រប្រកបដោយភាពសាកសិទ្ឋជាក់ស្តែង ប្រាកដនិយម និងម៉ឺងម៉ាត់ បានធ្វើឱ្យតំបន់ជនបទ មានការអភិវឌ្ឍន៍និងប្រែមុខមាត់ថ្មីក្នុងក្តីសង្ឃឹមយ៉ាងឆាប់រហ័ស។

ក្នុងឱកាសនោះ ឯកឧត្តម សៀង ណាំ បានប្រគេនព្រះចៅអធិការវត្តចំនួន១០លានរៀលនិងជូនដល់លោកតា លោកយាយ ប្រជាពលរដ្ឋ លោកគ្រូអ្នកគ្រូ សិស្សានុសិស្ស ចូលរួមក្នុងពិធីអស់ថវិកាចំនួន៦លាន រៀលទៀត សរុបថវិកាចំនួន១៦លានរៀល។

ក្នុងរបាយការណ៍ ព្រះតេជគុណ ហ៊ាក់ គឹមហ៊ត់ ព្រះចៅអធិការវត្តអារញ្ញសាគរ ឱ្យដឹងថា៖សមិទ្ឋផលថ្មីបន្ថែមនេះ ចាប់ផ្តើមកសាងនិងជួសជុលកែលំអពីដើមឆ្នាំ២០២២ដល់ឆ្នាំ២០២៣ ចំណាយថវិកាសរុបចំនួន៤៤.០០០ដុល្លារ មានដូចជាក្លោងទ្វារចំនួន១ រៀបចំសួនច្បារ ក្រាលថ្មម៉ាប ក្នុងវត្ត ដែលថវិកាទាំងនេះបានពីការសាមគ្គី ចូលរួមគាំទ្រ បរិច្ចាគតាមសទ្ឋារបស់ ឯកឧត្តម លោកជំទាវ លោក លោកស្រី សប្បុរសជនជិតឆ្ងាយ និងញាតិញោមចំណុះជើងវត្ត៕

ដោយ ÷ ពន្លឺ