ខេត្តសៀមរាប ÷ ដោយមានការគាំទ្រពីអង្គការទ្រទ្រង់សុវត្ថិភាពកម្ពុជា (CAMSAFE) នៅព្រឹកថ្ងៃទី១២ ខែឧសភា ឆ្នាំ២០២៣នេះ សាខាកាកបាទក្រហកម្ពុជាខេត្ត បានសហការជាមួយសាកលវិទ្យាល័យបៀលប្រាយ ខេត្តសៀមរាប និងវិទ្យាស្ថានបណ្ដុះបណ្ដាល និងស្រាវជ្រាវនៃអង្គការសហប្រជាជាតិ បើកវគ្គផ្សព្វផ្សាយស្តីពី សុជីវធម៌ផ្ទាល់ខ្លួន ដើម្បីទប់ស្កាត់ការបើកបរក្រោមឥទ្ធិពលគ្រឿងស្រវឹង ដើម្បីចូលរួមចំណែកកាត់បន្ថយចំនួនអ្នកស្លាប់ និងរបួស ពិការ ដែលបង្កដោយការបើកបរក្រោមឥទ្ធិពលគ្រឿងស្រវឹង ជូនដល់និស្សិតចំនួន ៦០នាក់។
វគ្គផ្សព្វផ្សាយនេះដែរ មានការចូលរួមពីក្រុមការងារគ្រូបង្គោល មកពីមន្ទីរសាធារណៈការ និងដឹកជញ្ជូនខេត្ត ការិយាល័យនគរបាលចរាចរណ៍ផ្លូវគោកខេត្ត លោកសាស្ត្រាចារ្យសាកលវិទ្យាល័យ និងមន្ត្រីមជ្ឈមណ្ឌលជាតិយុវជនកម្ពុជា ដោយផ្តោតលើប្រធានបទមួយចំនួនដូចជា៖ ១.ជនរងគ្រោះថ្នាក់ចរាចរណ៍ ,២.ការបើកបរក្រោមឥទ្ធិពលគ្រឿងស្រវឹង ,៣.គ្រឿងស្រវឹង និងបទបញ្ញតិ្តពាក់ព័ន្ធក្នុងប្រទេសកម្ពុជា និង ៤.បង្កាខ្លួនពីការទទួលទានគ្រឿងស្រវឹងហើយបើកបរ។
មានប្រសាសន៍ក្នុងឱកាសនោះ លោកសាស្ត្រាចារ្យ ប៊ុន ធុយ តំណាងសាកលវិទ្យាធិការនៃ វិទ្យាល័យ បៀលប្រាយ បានថ្លែងអំណរគុណដល់ អង្គការទ្រទ្រង់សុវត្ថិភាពកម្ពុជា ដែលបានសហការជាមួយសាខាកាកបាទក្រហកម្ពុជាខេត្តសៀមរាប និងក្រុមការងារគ្រូបង្គោលទាំងអស់ ដែលបានចុះមកបើកវគ្គដ៍មានសារសំខាន់នេះ។ លោកបន្តថា នេះជាលើកទី២ ហើយ ដែលសាកលវិទ្យាល័យ បានសហការជាមួយសាខាកាកបាទក្រហមកម្ពុជាខេត្តសៀមរាប និងអ្នកពាក់ព័ន្ធក្នុងការចុះមកអប់រំផ្សព្វផ្សាយចំណេះដឹងស្តីពីសុវត្ថិភាពចរាចរណ៍ដល់ប្អូនៗជានិស្សិត ដើម្បីយល់ដឹង និងចូលរួមការពារកាត់បន្ថយអត្រាគ្រោះថ្នាក់ចរាចរណ៍ដែលកំពុងកើតមានជារៀងរាល់ថ្ងៃ ដែលបណ្តាលមកពីការបើកបរក្រោមឥទ្ធិពលនៃគ្រឿងស្រវឹង ហើយជាការបើកបរមិនប្រុងប្រយ័ត្ន មិនគោរពច្បាប់ចរាចរណ៍ជាដើម។ ជាងនេះទៅទៀត គឺត្រូវបើរ បរដោយពាក់មួកសុវត្ថិភាពឱ្យបានត្រឹមត្រូវ ទាំងអ្នកបើកបរ និងអ្នករួមដំណើរ ប្រុងប្រយ័ត្ននៅចំណុចផ្លូវប្រសព្វ និងថ្មើជើង រឺ បើកបរដោយគោរពតាមគន្លងផ្លូវ ដូចបានចែងក្នុងច្បាប់ចរាចរណ៍ផ្លូវគោក។
សូមជម្រាបថា ការផ្សព្វផ្សាយនាពេលនេះដែល ក៏មានការប្រើប្រាស់សម្ភារដែលឧបត្ថម្ភពីមន្ទីរ សាធារណៈការ និងដឹកជញ្ជូនខេត្តសៀមរាបដូចជា៖ សៀវភៅច្បាប់ចរាចរណ៍ ១០០ក្បាល, សៀវភៅ អ្វីដែលអ្នកបើកបរយានយន្តត្រូវយល់ដឹង ១០០ក្បាល, សន្លឹកប័ណ្ណ ប្រកាសំខាន់ៗដែលត្រូវចងចាំចំពោះអ្នកប្រើប្រាស់ផ្លូវ ១០០សន្លឹក និងសន្លឹកប័ណ្ណកាកបាទក្រហកម្ពុជា ផ្តោតលើបរិយាបន្ទពិការភាព និងសុវត្ថិភាពចរាចរណ៍ ១០០សន្លឹកផងដែរ៕
ដោយ ÷ ពន្លឺ
