កិច្ចប្រជុំសាមញ្ញលើកទី៤៨ របស់ក្រុមប្រឹក្សាខេត្តសៀមរាប អាណត្តិទី៣ ឆ្នាំ២០២៣

ខេត្តសៀមរាប ÷ ក្រុមប្រឹក្សាខេត្តសៀមរាប អាណត្តិទី ៣ បានបើកកិច្ចប្រជុំសាមញ្ញលើកទី៤៨ នៅសាលប្រជុំសាលាខេត្តសៀមរាប នាព្រឹកថ្ងៃទី១០ ខែ ឧសភា ឆ្នាំ២០២៣ ក្រោមកិច្ចដឹកនាំប្រជុំរបស់ឯកឧត្តម អ៊ាន ឃុន ប្រធានក្រុមប្រឹក្សាខេត្ត និង លោក លី សំរិទ្ធ អភិបាលរងនៃគណៈអភិបាលខេត្ត ព្រមទាំងមានការអញ្ជើញចូលរួមពីសំណាក់ឯកឧត្តម លោកជំទាវ សមាជិកក្រុមប្រឹក្សាខេត្ត គណៈអភិបាលខេត្ត តំណាងអាជ្ញាធអប្សារា និង លោក លោកស្រី អាជ្ញាធរក្រុង-ស្រុក ថ្នាក់ដឹកនាំមន្ទីរ-អង្គភាព លោកនាយក នាយករងរដ្ឋបាល នាយក-នាយករងទីចាត់ការ អង្គភាពនានាជុំវិញខេត្តចូលរួមផងដែរ ។

ក្នុងកិច្ចប្រជុំនេះមានរបៀបវារៈមួយចំនួនដូចជា ពិនិត្យ ពិភាក្សានិងអនុម័តលើសេចក្តីព្រាងកំណត់ហេតុកិច្ចប្រជុំសាមញ្ញលើកទី៤៧របស់ក្រុមប្រឹក្សាខេត្តសៀមរាប ,ការអនុម័តលើសេចក្តីព្រាងរបាយការណ៍ប្រចាំខែ មេសា ឆ្នាំ ២០២៣ ស្តីពីការអនុវត្តការងាររបស់រដ្ឋបាលខេត្តសៀមរាប និង អនុម័តលើស សេចក្តីព្រាង សេចក្តីសម្រេចស្តីពីការកែសម្រួលសមាសភាព គណៈកម្មាធិការរៀបចំដែនដីនិងនគរូបនីយកម្មខេត្តសៀមរាប ។

ក្នុងនោះសមាជិកសមាជិកាក្រុមប្រឹក្សាខេត្ត ក៏បានលើកឡើងនូវបញ្ហាមួយចំនួន និង ស្នើសុំធ្វើការកែ តម្រូវអក្ខរាវិរុទ្ធនៅក្នុងរបាយការណ៍ និង បញ្ហាការងារសណ្តាប់ធ្នាប់ក្នុងក្រុង ,ការអនុវត្តនយោបាយភូមិឃុំមានសុវត្ថិភាព ,បញ្ហាផ្លូវមួយចំនួនក្នុងក្រុងសៀមរាប និង តំបន់រមណីយដ្ឋានអង្គរ (ពីរង្វង់មូលព្រៃគុយដល់រង្វង់មូលកូនដំរី ) បញ្ហាការធ្វើចារចរណ៍របស់យានយន្តកែ ច្នៃ និង គោយន្តកន្ត្រៃ លើតាមដងផ្លូវសាធារណៈ (ដែលជាហានីភ័យបំផុត) និង បញ្ហាវិវាទដីធ្លីនៅតាមមូលដ្ឋាន ។

ក្នុងនោះ លោក លី សំរិទ្ធ ក៏បានធ្វើការបកស្រាយបំភ្លឺ និងព្រមទាំងបានអនុញ្ញាតិជូនអស់លោក ប្រធានមន្ទីរ អង្គភាពពាក់ព័ន្ធ ដើម្បីធ្វើការបំភ្លឺជូនអង្គប្រជុំផងដែរ ។ មានប្រសាសន៍នោះដែរលោកអភិបាលរងខេត្ត ក៏បានឯកភាពទៅលើរបាយការណ៍ ប្រចាំខែមេសា ព្រមទាំងបានធ្វើការក្រើនរំលឹកដល់មន្ទីរជំនាញពាក់ព័ន្ធ និង កម្លាំងសមត្ថកិច្ច ត្រូវធ្វើការរួមសហការគ្នាឲ្យបានល្អ ក្នុងការអនុវត្តការងាររបស់ខ្លួន ឲ្យមានភាពរលូន និង រាលចំណុចខ្វះខាតដែលសមាជិកសមាជិកាក្រុមប្រឹក្សាខេត្តលើកឡើង ព្រមទាំងធ្វើការកែប្រែនូវប្រពៃណីដ៏អាក្រក់មួយចំនួន របស់យានយន្តមួយចំនួនដែលធ្វើអាជីវកម្មគ្មានច្បាប់ត្រឹមត្រូវ និង មិនបាន គោរពច្បាប់ធ្វើឲ្យខូចនូវសណ្តាប់ធ្នាប់ក្នុងក្រុង បង្កភាពអាណាធិបតេ្តយ្យ ។ យ៉ាងទៀតមន្ទីរជំនាញ និង កងកម្លាំងសមត្ថកិច្ច ត្រូវ មានវិធានការរាល់យានយន្តដែលបានកែច្នៃ ដាក់ភ្លើង(ឡាហ្សែ) ដែលបង្កហានីភ័យដល់អ្នកបើកបរផ្សេងៗ ព្រមទាំងរៀបចំកម្លាំងក្នុងការត្រួតពិនិត្យរាល់យានយន្តដែលមិនបានចូលធ្វើការត្រួតពិនិត្យបច្ចេកទេសយានយន្ត (ឈៀក ) ព្រមទាំងស្លាកលេខ ក្លែងក្លាយ ទាំងស្លាកលេខរាជការ , នគរបាល , ខេមរភូមិន្ទ , និង ស៊ីវិល ដែលគ្មានច្បាប់អនុញ្ញាតត្រឹមត្រូវ ។

មានមតិបូកសរុបលទ្ធផលនៃកិច្ចប្រជុំនោះ ឯកឧត្តម អ៊ាន ឃុន បានមានប្រសាសន៍ថា តាមរយៈការចូលរួមធ្វើការពិនិត្យ ពិភាក្សា ឆ្លុះបញ្ចាំងមតិយោបល់ល្អៗ ប្រកបដោយ ក្រមសីលធម៌វិជ្ជាជីវៈ ពីសំណាក់ឯកឧត្តម លោកជំទាវសមាជិក សមាជិកាក្រុមប្រឹក្សាខេត្ត គណៈអភិបាលខេត្ត ប្រធានមន្ទីរអង្គភាព និងអ្នកពាក់ព័ន្ធទាំងអស់បានញ៉ាំងឲ្យដំណើរការនៃកិច្ចប្រជុំសាមញ្ញលើកទី៤៨របស់ក្រុមប្រឹក្សាខេត្ត ប្រព្រឹត្តទៅតាមលំដាប់លំដោយ និងទទួលបានលទ្ធផលតាមការគ្រោងទុក ។ ជាមួយគ្នានេះ ឯកឧត្តម ប្រធានក្រុមប្រឹក្សាខេត្តក៏បានថ្លែងនូវអំណរគុណយ៉ាងជ្រាលជ្រៅចំពោះគណៈអភិបាលខេត្ត ក៏ដូចជាមន្ទីរ អង្គភាពទាំងអស់ដែលបានយកចិត្តទុកដាក់ក្នុងការដោះស្រាយរាល់បញ្ហាដែលបានលើកឡើងនេះ ព្រោះបញ្ហាទាំងនេះ គឺជាបញ្ហារបស់ប្រជាពលរដ្ឋដែលតែងតែលើកឡើងជាអន្លើៗ ។

ឯកឧត្តមប្រធាន បានបញ្ជាក់ផងដែរថា ក្នុងខែ មេសានេះ ក្រោមកិច្ចដឹកនាំរបស់ឯកឧត្តមអភិបាលខេត្ត លើកិច្ចការរដ្ឋបាល ក្នុងការរៀបចំព្រឹត្តិការណ៍អង្គរសង្ក្រាន្ត , ការងារសន្តិសុខសាធារណៈ ,ការងារ គ្រោះមហន្តរាយ ក៏ដូចជាបញ្ហាផ្សេងៗជាដើម ។ សំខាន់ក្នុងរយៈពេល៣ថ្ងៃ នៃព្រឹត្តិការណ៍អង្គរសង្ក្រាន្ត បុណ្យចូលឆ្នាំថ្មីប្រពៃណីជាតិខ្មែរ បានប្រព្រឹត្តទៅប្រកបដោយសុវត្ថិភាព ដោយមានភ្ញៀវជាតិ អន្តរជាតិចូលមកទស្សនា ប្រមាណជាង២លាន នាក់ ព្រមទាំងរដ្ឋបាលខេត្តបានបដិសណ្ឋាគិច្ចគណៈប្រតិភូជាន់ខ្ពស់ថ្នាក់ជាតិ អន្តរជាតិ ចូលមកខេត្តសៀមរាប និង ការអនុវត្តការងារប្រកបដោយប្រសិទ្ធភាព មានសាមគ្គីភាពផ្ទៃក្នុង និង មានស្មារតីទទួលខុសត្រូវក្នុងការបំពេញការងារស្របតាមគោលនយោបាយ ច្បាប់ និង លិខិតបទដ្ឋានគតិយុត្តពាក់ព័ន្ធនឹងកំណែទម្រង់វិមជ្ឈការ និងវិសហមជ្ឈការនៅរដ្ឋបាល ថ្នាក់ក្រោមជាតិផងដែរ ៕

ដោយ ÷ ពន្លឺ