ខេត្តសៀមរាប ÷ វិញ្ញាសាកង់ភ្នំ ( XCE ) ចំងាយ ១០០០ម នាតំបន់ជើងភ្នំគូលែន នៅថ្ងៃទី០៨ ខែឧសភានេះ ចាប់ពីម៉ោង៩ព្រឹកដល់ម៉ោង១២ថ្ងៃត្រង់ ដោយមានអត្តពលិកចំនួន ២៦រូប មកពី ៩ប្រទេស ខណៈប្រទេសឡាវ និងព្រុយនេ បន្តអន្តវត្តលើវិញ្ញាសានេះ ។ វិញ្ញាសាប្រកួតកង់ភ្នំ Cross Country Elimination ( XCE ) ផ្នែកបុរស១៤ នាក់ និងផ្នែកនារី១២នាក់ ដោយប្រកួតយ៉ាងស្វិតស្វាញលើចំងាយ ១០០០ម និងមានប្រកួតជម្រុះវិលជុំ ឆ្លងកាត់ផ្លូវ បត់បែន លើផ្លូវឧបសគ្គច្រើន ដោយប្រើរយ:ពេលប្រមាណជិត ៤ម៉ោង។ ជាលទ្ធផលក្រុមកីឡាករផ្នែកបុរសមេដាយមាស បានទៅលើកីឡាករ Methasit Boonsane មកពីប្រទេសថៃ មេដាយប្រាក់ បានទៅលើកីឡាករ ឃីម ម៉េងឡុង កម្ពុជា និងមេដាយសំរិទ្ធ បានទៅលើកីឡាករ Ihza Muhammad មកពីប្រទេសឥណ្ឌូនេស៊ី ។
វិញ្ញាសាផ្នែកនារី មេដាយមាស បានទៅលើកីឡាការិនី Dara Latifah មកពីប្រទេសឥណ្ឌូនេស៊ី មេដាយប្រាក់កីឡាការិនី Ariana Thea Patrice Evangelista មកពីប្រទេសហ្វីលីពីន និងមេដាយសំរិទ្ធបានទៅលើការិនី Warithorn Phetpraphanមកពីប្រទេសថៃ ។
កីឡាករ ឃីម ម៉េងឡុង ម្ចាស់មេដាយប្រាក់ វិញ្ញាសាកង់ភ្នំ Cross Country Elimination បានបង្ហាញអារម្មណ៍រំភើប និងមានមោទកភាពជាទីបំផុតក្នុងនាមតំណាងឱ្យប្រទេសកម្ពុជា ដែលជាប្រវត្តិសាស្រ្តដណ្តើមមេដាយក្នុងព្រឹត្តិការណ៍ស៊ីហ្គេមលើកទី៣២នេះ។ សូមបញ្ជាក់ថា ការប្រកួតកីឡាស៊ីហ្គេម លើកទី៣២ ឆ្នាំ២០២៣ លើវិញ្ញាសាកង់ភ្នំ បានបញ្ចប់ទៅដោយជោគជ័យ ដោយចំណាយរយៈពេល៣ថ្ងៃ ចាប់ផ្ដើមកាលពីថ្ងៃទី០៦ ដល់ថ្ងៃទី០៨ ខែឧសភា ឆ្នាំ២០២៣ ស្ថិតនៅជើងភ្នំគូលែន នៅស្រុកបន្ទាយស្រី ខេត្ដសៀមរាប កម្ពុជាដណ្តើមបានមេដាយចំនួន២ គឺមេដាយប្រាក់ ១ លើវិញ្ញាសាប្រណាំងកង់ភ្នំចំងាយ១០០០ម និងមេដាយសំរិទ្ធ ១ លើវិញ្ញាសាប្រណាំង២៤គីឡូម៉េត្រ ៕
ដោយ ÷ ពន្លឺ
