កាត់ខ្សែបូរសម្ពោធដាក់ឱ្យប្រើប្រាស់ក្លោងទ្វារ និងកុដិ នៃវត្តធម្មយុត្តិក្នុងស្រុកពួកខេត្តសៀមរាប

ខេត្តសៀមរាប ÷ ក្រោយពីកសាងរួចរាល់ជាស្ថាពរ នូវកុដិ និងក្លោងទ្វារ នៅក្នុងវត្តខេមរាសាមគ្គីមុនរង្សី ហៅវត្តធម្មយុត្តិ ស្ថិតក្នុងឃុំពួក ក្នុងស្រុកពួក ខេត្តសៀមរាប សមិទ្ឋិផលទាំងនេះបានកាត់ខ្សែបូរសម្ពោធដាក់ឱ្យប្រើប្រាស់ជាផ្លូវការនៅថ្ងៃទី០៧ខែឧសភាឆ្នាំ២០២៣ ក្រោមអធិបតីភាពឯកឧត្តម អ្នកឧកញ៉ា សៀង ណាំ អ្នកតំណាងរាស្រ្តមណ្ឌល សៀមរាប អភិបាលស្រុកពួក និងមន្ត្រីរដ្ឋបាលស្រុក គណៈកម្មការអាចារ្យវត្ត លោកយាយ លោកតា និងប្រជាពុទ្ធបរិស័ទ លោកគ្រូអ្នកគ្រូ និងសិស្សានុសិស្សយ៉ាងច្រើនកុះករ។

ការសំណេះសំណាលជាមួយ ព្រះសង្ឃ និងពុទ្ធបរិស័ទក្នុង ឱកាសនោះ ឯកឧត្តម សៀង ណាំ បាន សំដែងនូវការសាទរចំពោះ សមិទ្ធិផលថ្មី ដែលបានកើតមានឡើង នៅក្នុងទីអារាមនេះនិងបានកោតសរសើរ ចំពោះ ព្រះចៅអធិការអាចារ្យ គណៈកម្មការវត្ត និងពុទ្ធបរិស័ទព្រមទាំងសប្បុរសជនជិតឆ្ងាយ ដែលបានប្រឹងប្រែង យកព្រះទ័យ និងយកចិត្តទុកដាក់ក្នុងការកសាង សមិទ្ធិផល នេះឡើងទុកជាប្រយោជន៏ នៅក្នុងព្រះពុទ្ធ និងជាចំណែកមួយថ្មីបន្ថែមទៀតញ៉ាំងឱយវិស័យពុទ្ធចក្រកាន់តែរីកចំរើនគង់វង្សស្ថិតស្ថេរថែមទៀត។

ឯកឧត្តម មានប្រសាសន៍ថា៖សមិទ្ឋផលនៅទីនេះនិងនៅគ្រប់ទីកន្លែងអាចកើតឡើងបាន អាស្រ័យដោយកត្តាប្រទេសជាតិមានសុខសន្តិភាពពេញលេញ មានស្ថិរភាពនយោបាយនិងមានការអភិវឌ្ឍរីកចម្រើន លើគ្រប់វិស័យ ក្រោមការដឹកនាំដ៏ត្រឹមត្រូវ និងក្រោមគោលនយោបាយឈ្នះ-ឈ្នះ របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ជាប្រមុខដឹកនាំនាំ បាននាំមកនូវសន្តិភាព ស្ថិរភាព និងការអភិវឌ្ឍលើគ្រប់វិស័យទូទាំងប្រទេស ទាំងពុទ្ធចក្រ និងអាណាចក្រ ហើយសុខសន្តិភាពមិនត្រឹមផ្ដល់ឱ្យប្រទេសជាតិ និងប្រជាជនកម្ពុជារស់នៅក្នុងសេចក្ដីសុខសាន្ត និងមានភាពកក់ក្ដៅទាំងផ្លូវចិត្តនិងផ្លូវកាយប៉ុណ្ណោះទេ ប៉ុន្តែថែមទាំងបានផ្ដល់ឱកាសបានរួបរួមសាមគ្គីគ្នា កសាងនូវសមិទ្ធផលនានាជាច្រើនឡើងវិញ ទាំងវិស័យអាណាចក្រ និងវិស័យពុទ្ធចក្រក្នុងក្របខ័ណ្ឌទូទាំងប្រទេស។

ឯកឧត្តម បានអំពាវនាវដល់លោកតា លោកយាយ បងប្អូនប្រជាពលរដ្ឋ ដែលមានអាយុគ្រប់ និងមានសិទ្ធិបោះឆ្នោត សូមអញ្ជើញទៅចូលរួមបោះឆ្នោតជ្រើសរើសតំណាងរាស្ត្រ នីតិកាលទី៧ ដែលនឹងប្រព្រឹត្តទៅនៅថ្ងៃអាទិត្យ ទី២៣ ខែកក្កដា ឆ្នាំ២០២៣ ខាងមុខនេះកុំបីខានឡើយ ។ ឯកឧត្តមបានប្រគេនថវិកាចំនួន២០លានរៀលសម្រាប់ជួយព្រះចៅអធិការវត្តកសាងឧបដ្ឋានសាលា និងជូនយាយជីតាជីនិង លោកគ្រូអ្នកគ្រូ សិស្សានុសិស្ស និងបងប្អូនប្រជាពលរដ្ឋចូលរួមក្នុងពិធី ថវិកាចំនួន៧លានរៀលទៀតផងដែរ។

ក្នុងរបាយការណ៍របស់ លោក ស៊ិន ចាន់ថុល អភិបាលស្រុកពួក ថា ៖ កុដិមួយខ្នងនេះមានប្រវែង១១,៥ម គុណនឹង១២,៥ម សាងសង់ពីឥដ្ឋ ស៊ីម៉ងត៍និងដែក និងក្លោងទ្វារសង់នៅជ្រុងផ្លូវចូលខាងលិចបានរំលេចក្បូរក្បាច់និងផ្កាភ្ញីយ៉ាងប្រណិត ។សមិទ្ឋផលទាំងពីរនេះ ចំណាយថវិកាសរុប ៥៦៧០០ដុល្លារ(ប្រាំម៉ឺនប្រាំមួយពាន់ប្រាំពីររយ) បានមកពីសទ្ឋាជ្រះថ្លារបស់ឧបាសិកា ស៊ិន ង៉ិក និងភរិយារួមជាមួយកូនចៅនិងក្រុមគ្រួសារសាច់ញាតិ។សូមជំរាបថា៖វត្តខេមរាសាមគ្គីមុនរង្សី ហៅវត្តធម្មយុត្តិបានកសាងឡើងក្នុងឆ្នាំ១៩១៤ មានចៅអធិការ៤អង្គហើយ បច្ចុប្បន្នស្ថិតក្រោមការគ្រប់គ្រងនិងដឹកនាំដោយ ព្រះតេជគុណ ណុប ឡន ជាព្រះគ្រូចៅអធិការ៕

ដោយ ÷ ពន្លឺ