ខេត្តសៀមរាប ÷ សាលាធម្មសភា ផ្លូវថ្នល់និងសមិទ្ឋផលនានា នៃវត្តសុវណ្ណព្រឹក្សាហៅវត្តគគីរ ស្ថិតក្នុងភូមិស្រិតខាងកើត ឃុំកន្ទ្រាំងស្រុកប្រាសាទបាគងខេត្តសៀមរាប ត្រូវបានកាត់ខ្សែបូរសម្ពោធដាក់ឱ្យប្រើប្រាស់ជាផ្លូវការនៅថ្ងៃទី២៨ខែមេសាឆ្នាំ២០២៣ ក្រោមអធិបតីភាព ឯកឧត្តម អ្នកឧកញ៉ា សៀង ណាំ តំណាងរាស្ត្រមណ្ឌលសៀមរាប និង លោកស្រី យូ សុភា អភិបាលរងខេត្ត រួមជាមួយវត្តមាន លោកអភិបាលស្រុក អាជ្ញាធរមូលដ្ឋាន ដូនជី តាជី លោកគ្រូអ្នគ្រូ សិស្សានុសិស្ស និងប្រជាពលរដ្ឋក្នុងមូលដ្ឋានយ៉ាងច្រើនកុះករ។សមិទ្ឋផលថ្មីជាគរុភ័ណ្ឌវត្តនេះ មានដូចជា សាលាធម្មសភា មួយខ្នងមានទំហំ១៦ម៉ែត្រគុណនឹង៣៧ម៉ែត្រ ផ្លូវថ្នល់មុខវត្តប្រវែង១២០០ម៉ែត្រទទឹង៨ម៉ែត្រ និងសមិទ្ឋិផលនានាមួយចំនួនទៀតចំណាយក្នុងការកសាងអស់ថវិកាសរុបជាង៤១ ម៉ឺនដុល្លា និងនៅខ្វះថ្លៃជាងនិងសម្ភារៈសំណង់៦៨០០ ដុល្លារទៀត។
ក្នុងនាមរដ្ឋបាលខេត្ត លោកស្រី យូ សុភា អភិបាល រងខេត្ត មានប្រសាសន៍ថា៖សង្គមខ្មែរយើងបានចាត់ទុកព្រះពុទ្ឋសាសនាជាវិស័យដ៏មានសារៈសំខាន់ ជាដៃគូអភិវឌ្ឍមិនអាចខ្វះបាន ហើយពុទ្ឋចក្រដែលថ្នាក់ដឹកនាំគ្រប់ជាន់ថ្នាក់តែងបានយកចិត្តទុកដាក់ក្នុងការកសាងហេដ្ឋារចនាសម្ព័ន្ឋនានាក្នុងវិស័យនេះ ដើម្បីបំរើសេចក្តីត្រូវការរបស់ប្រជាពុទ្ឋបរិស័ទ មកបំពេញបុណ្យកុសលតាមសេចក្តីជ្រះថ្លា ជាមួយគ្នានេះវត្តអារាមបានផ្តល់គុណសម្បត្តិដល់ពុទ្ឋបរិស័ទដែលមានព្រះសង្ឃជាតួអង្គសំខាន់ និងបានជួយអភិវឌ្ឍសង្គមកម្ពុជាតាំងពីសម័យមុនរហូតមកដល់បច្ចុប្បន្ន ។
សំណេះសំណាលក្នុងឱកាសនោះ ឯកឧត្តម សៀង ណាំ តំណាងរាស្ត្រមណ្ឌលសៀមរាប បានកោតសរសើរចំពោះព្រះចៅអធិការព្រះសង្ឃ គណៈកម្មការ អាចារ្យវត្តគគីរ អាជ្ញាធរដែនដី បងប្អូនប្រជាពលរដ្ឋ និងពុទ្ធបរិស័ទគ្រប់មជ្ឈដ្ឋានដែលបានសាមគ្គី ចូលរួមចំណែកជាកម្លាំងកាយ កម្លាំងចិត្ត និងទ្រព្យធនធ្វើឲ្យការកសាងសាលាធម្មសភានិងសមិទ្ឋផលមួយចំនួនទៀត បានសម្រេចរួចរាល់ជាស្ថាពរ។
ឯកឧត្តម មានប្រសាសន៍ថា៖ ប្រទេសកម្ពុជាបានជួបនូវវិបត្តិសង្គ្រាមស៊ីវិលរ៉ាំរ៉ៃអស់ជាច្រើនទសវត្ស ជាពិសេសក្នុងអំឡុង៣ឆ្នាំ៨ខែនិង២០ថ្ងៃក្នុងរបបប៉ុល ពត កម្ពុជាទាំងមូលរងនូវទុក្ខសោកនាដកម្មយ៉ាងធំធេងដែលមិនត្រឹមតែប្រជាជនសាមញ្ញដែលត្រូវរបបនោះកាប់សម្លាប់ទេ សូម្បីព្រះសង្ឃ និងហេដ្ឋារចនាសម្ពន្ឋ័សង្គមជាតិក៏ត្រូវទទួលរងនូវការបំផ្លិចបំផ្លាញស្ទើរតែសូន្យ ព្រះសង្ឃ វត្តអារាមនិងសាសនាផ្សេងៗទៀត ក៏ត្រូវទទួលរងនូវការកាប់សម្លាប់និងបំផ្លិចបំផ្លាញស្ទើរគ្មានសល់។ តែដោយសារគុណថ្ងៃរំដោះ៧មករាឆ្នាំ១៩៧៩ យើងបានរស់រានមានជីវិតឡើងវិញ ប្រមុខដឹកនាំប្រទេសបានស្វះស្វែងរកសន្តិភាព និងការអភិវឌ្ឍប្រទេសឡើងវិញជាបន្តបន្ទាប់ ។ ឯកឧត្តម បញ្ជាក់ថា៖រាល់សមិទ្ឋផលនានាទាំងនៅទីនេះនិងនៅទីដ៏ទៃក្នុងទូទាំងប្រទេស អាចកើតឡើងទៅបានគឺអាស្រ័យដោយប្រទេសជាតិមានសុខសន្តិភាពពេញលេញ បើគ្មានសន្តិភាពទេ យើងមិនអាចធ្វើការអភិវឌ្ឍន៏ឱ្យរីកចម្រើនដូចពេលនេះបានឡើយ។
ឯកឧត្តម បានអំពាវនាវដល់លោកតា លោកយាយ បងប្អូនប្រជាពលរដ្ឋ ដែលមានអាយុគ្រប់ និងមានសិទ្ធិបោះឆ្នោត សូមអញ្ជើញទៅចូលរួមបោះឆ្នោតជ្រើសរើសតំណាងរាស្ត្រ នីតិកាលទី៧ ដែលនឹងប្រព្រឹត្តទៅនៅថ្ងៃអាទិត្យ ទី២៣ ខែកក្កដា ឆ្នាំ២០២៣ ខាងមុខនេះកុំបីខានឡើយ។ជាមួយនោះដែរឯកឧត្តម បានប្រគេនព្រះចៅអធិការវត្តនូវថវិកាចំនួនប្រគេនបច្ច័យចំនួន ១០លានរៀលនិង ចែកជូនតាជីយាយជី ២០០នាក់ សិស្សានុសិស្ស ១០០នាក់ លោកគ្រូ អ្នកគ្រូ ១៥នាក់ ប្រជាពលរដ្ឋ១០០០នាក់ សរុបអស់ថវិកា ១៧លានរៀលទៀត ៕
