ខេត្តត្បូងឃ្មុំ ÷ នាថ្ងៃទី២៧ ខែមេសា ឆ្នាំ២០២៣ សាកលវិទ្យាល័យ ហេង សំរិន ត្បូងឃ្មុំ បានរៀបចំកិច្ចប្រជុំគណៈកម្មការ គ្រប់គ្រងគម្រោងស្តីពី “កម្មវិធីបរិញ្ញាបត្រជាន់ខ្ពស់ (អនុបណ្ឌិត) ក្នុងឧស្សាហកម្ម ៤.០” នៅសណ្ឋាគារអង្គរ ប៉ារ៉ាឌី ខេត្តសៀមរាប ក្រោមអធិបតីភាព លោកបណ្ឌិត និត ប៊ុនឡៃ អគ្គនាយករងនៃអគ្គនាយកដ្ឋានឧត្តមសិក្សា ក្រសួងអប់រំ យុវជន និងកីឡា។ គោលបំណងនៃកិច្ចប្រជុំ គឺដើម្បីធ្វើបច្ចុប្បន្នភាពគម្រោងដែលបានអនុវត្តកន្លងមក និងធ្វើការរៀបចំផែនការអនុវត្តជាបន្ត ដើម្បីឲ្យទទួលបានជោគជ័យទៅតាមផែនការគម្រោង “កម្មវិធីបរិញ្ញាបត្រជាន់ខ្ពស់ (អនុបណ្ឌិត) ជំនាញឧស្សាហកម្ម ៤.០”។ តាមរយៈគម្រោង Ind4.0 សាកលវិទ្យាល័យ ហេង សំរិន ត្បូងឃ្មុំ នឹងបង្កើតឱ្យមានកម្រិតបរិញ្ញាបត្រ ជាន់ខ្ពស់ (អនុបណ្ឌិត) លើជំនាញឧស្សាហកម្ម ៤.0 និងការកសាងភាពជាដៃគូស្រាវជ្រាវក្នុងចំណោមភាគី ពាក់ព័ន្ធនៅប្រទេសកម្ពុជា ម៉ាឡេស៊ី ឥណ្ឌូនេស៊ី និងប្រទេសនៅសហគមន៍អឺរ៉ុប។
បច្ចុប្បន្នសាកលវិទ្យាល័យ ហេង សំរិន ត្បូងឃ្មុំ បាននឹងកំពុងអនុវត្តគម្រោងឈ្មោះថា “កម្មវិធី បរិញ្ញាបត្រជាន់ខ្ពស់ (អនុបណ្ឌិត) ជំនាញឧស្សាហកម្ម ៤.០ (Ind4.0)” ដែលមានរយៈពេល០៣ ឆ្នាំ (២០២១- ២០២៤) ដែលទទួលបានថវិកាពីមូលនិធិសហភាពអឺរ៉ុប (Erasmus+ CBHE) ដែល សាកលវិទ្យល័យ UiTM នៅប្រទេសម៉ាឡេស៊ីជាស្ថាប័នសម្របសម្រួលគម្រោង។ គម្រោងនេះមាន កិច្ចសហប្រតិបត្តិការរវាងសាកលវិទ្យាល័យ ហេង សំរិន ត្បូងឃ្មុំ និងដៃគូ អនុវត្តគម្រោងចំនួន១៥ ដោយនៅអាស៊ានមានចំនួន ៣ប្រទេស គឺកម្ពុជា ម៉ាឡេស៊ី និងឥណ្ឌូនេស៊ី និងនៅសហគមន៍អឺរ៉ុប មានចំនួន ៣ ប្រទេសគឺ ក្រិច អ៊ីតាលី និងអាឡឺម៉ង់។
គោលបំណងសំខាន់នៃគម្រោងនេះគឺដើម្បីរួម ១. បង្កើតកម្មវិធីសិក្សាឯកទេសថ្មី និងការច្នៃប្រឌិត កម្មវិធីថ្នាក់អនុបណ្ឌិតវិទ្យាសាស្ត្រលើឧស្សាហកម្ម 4.0 និងវគ្គបណ្តុះបណ្តាលវិជ្ជាជីវៈនៅក្នុង ប្រទេសដៃគូ ២. បង្កើតភាពស្និទ្ធស្នាល និងទំនាក់ទំនងជាមួយឧស្សាហកម្មក្នុងតំបន់ក្នុងការផលិត (វិស័យកសិកម្ម/ វារីវប្បកម្ម និងសុខភាព) ដោះស្រាយតម្រូវការរបស់ពួកគេនៅក្នុងឧស្សាហកម្ម 4.0 ៣. ពង្រឹងហេដ្ឋារចនា សម្ព័ន្ធនៃប្រទេសដៃគូ គ្រឹះស្ថានឧត្តមសិក្សា ដោយបង្កើតមន្ទីរពិសោធន៍ឧស្សាហកម្ម 4.0 ។ ៤. ពង្រឹង សមត្ថភាពរបស់គ្រឹះស្ថានអប់រំឧត្តមសិក្សា ដោយការបណ្តុះបណ្តាលបុគ្គលិកសិក្សា របស់ពួកគេនៅក្នុង វគ្គសិក្សាថ្មី និងវិធីសាស្រ្តចែកចាយសមស្រប និង ៥. ជំរុញទំនាក់ទំនងមនុស្សកាន់តែច្រើនតាម រយៈការផ្លាស់ប្តូរនិស្សិត និងបុគ្គលិក ដែលអាចអនុញ្ញាតបានតាមរយៈបណ្តាញសកលតំបន់ និង សមាគមនៃគ្រឹះស្ថានឧត្តមសិក្សា នៅអាស៊ាន និងសហគមន៍អឺរ៉ុប៕
ដោយ ÷ ពន្លឺ
