ខេត្តសៀមរាប ÷ អ្នកតំណាងរាស្ត្រមណ្ឌលសៀមរាប ឯកឧត្តម អ្នកឧកញ៉ា សៀង ណាំ នៅព្រឹកថ្ងៃទី២៥ ខែមេសា ឆ្នាំ២០២៣នេះ បានអញ្ជើញកាត់ខ្សែបូរ សម្ពោធឆ្លងស្រះទឹក និងដាក់ឲ្យប្រើប្រាស់ជាផ្លូវការនូវសមិទ្ធផលនានាជាច្រើនទៀត នៅបរិវេណវត្តអន្លុងសំណរ ក្នុងឃុំអន្លុងសំណរ ស្រុកជីក្រែង ខេត្តសៀមរាប។ ពិធីនេះក៏មានការនិមន្តចូលរួមពីសំណាក់ ព្រះធម្មសិរី អាភាករោ ជុំ គឹមឡេង ព្រះសុមង្គលសិលាចារ្យ ព្រះមេគណខេត្ត រួមនឹងមន្ត្រីសង្ឃក្នុងខេត្ត លោកអភិបាលស្រុក អាជ្ញាធរមូលដ្ឋាន ប្រជាពលរដ្ឋ និងសិស្សានុសិស្សជាច្រើនរូប។
ព្រះធម្មសិរី អាភាករោ ជុំ គឹមឡេង មានសង្ឃដិកាថា ឈរលើមូលដ្ឋានប្រទេសជាតិមានសុខសន្តិភាពពេញបរិបូរណ៍នោះ បានធ្វើឲ្យកម្ពុជាមានឱកាសច្រើនសម្រាប់អភិវឌ្ឍន៍លើគ្រប់វិស័យ។ ជាក់ស្តែងការបើក ចំហសិទ្ធិសេរីភាពខាងជំនឿសាសនា តាមរយៈគោលនយោបាយដ៏ត្រឹមត្រូវរបស់រាជរដ្ឋាភិបាលកម្ពុជា តាំងពីដើមរៀងមក ដែលមានសម្តេចតេជោ ហ៊ុន សែន ជាប្រមុខដឹកនាំ បានធ្វើឲ្យវិស័យសាសនានៅកម្ពុជាមានការរីកចំរើនសម្បូរបែបគួរឲ្យកត់សម្គាល់ និងមានសុខដុមនីយកម្មសាសនាគួរជាទីមោទនៈ ជាពិសេសរាល់សមិទ្ធផល ដែលកំពុងកើតមាននៅក្នុងវត្តអន្លុង សំណរ នាពេលនេះ ដែលវាជាភស្តុតាងស្រាប់ ខណៈដែលនៅក្នុងរបបវាលពិឃាត ប៉ុល ពត បានធ្វើឲ្យវិស័យសាសនាបានធ្លាក់ចុះដល់ចំនុចសូន្យ ហើយវត្តអារាម ព្រះវិហារត្រូវបានបំផ្លិចបំផ្លាញស្ទើរទាំង ស្រុង។
មានប្រសាសន៍ក្នុងឱកាសនោះ ឯកឧត្តម អ្នកឧកញ៉ា សៀង ណាំ បានថ្លែងថា ប្រទេសកម្ពុជា ក្រោមការដឹកនាំដ៏ឈ្លាសវៃរបស់សម្តេចតេជោ ហ៊ុន សែន នាយករដ្ឋមន្រ្តី បានធ្វើឲ្យប្រទេសជាតិទាំងមូលមានសុខសន្តិភាព ភាពជាម្ចាស់ការពេញលេញក្នុងការដឹកនាំជោគវាសនាដ៏ប្រពៃរបស់ខ្លួន ដើម្បីស្វែងរកសន្តិភាព វឌ្ឍនភាព និងសេចក្តីថ្លៃថ្នូរ ជូនប្រជាជនខ្មែរគ្រប់រូប ពោលគឺកម្ពុជាមានសន្តិភាពពេញលេញ មានឯករាជ្យភាព មានកំណើនសេដ្ឋកិច្ចខ្ពស់ និងមានប្រជាធិបតេយ្យពិតប្រាកដ។ ដោយឡែកសមិទ្ធផលដែលបានរៀបចំពីធីឆ្លង និងដាក់ឲ្យប្រើប្រាស់ជាផ្លូវការ មានស្រះទឹក និងសមិទ្ធផលនានាជាច្រើនទៀត នៅបរិវេណវត្តអន្លុងសំណរ នៅថ្ងៃនេះដែរ វាគឺជាសក្ខីភាពថ្មីមួយបន្ថែមទៀតដែរ សម្រាប់បងប្អូនប្រជាពលរដ្ឋ លោកយាយលោកតាក្នុងស្រុកជីក្រែង ខេត្តសៀមរាបទាំងមូល។ ជាមួយគ្នានោះ ឯកឧត្តម អ្នកឧកញ៉ា សៀង ណាំ ក៏បានអំពាវនាវដល់ប្រជាពលរដ្ឋ ដែលគ្រប់អាយុ និងមានសិទ្ធិបោះឆ្នោត សូមអញ្ជើញទៅចូលរួមបោះឆ្នោតជ្រើសរើសតំណាងរាស្ត្រ នីតិកាលទី៧ ដែលនឹងប្រព្រឹត្តនឹងទៅនៅថ្ងៃអាទិត្យ ទី២៣ ខែកក្កដា ឆ្នាំ២០២៣ ខាងមុខនេះឲ្យបានគ្រប់ៗគ្នា ដើម្បីជ្រើសរើសប្រមុខដឹកនាំគិតគូរពីសុខទុក្ខប្រជាពលរដ្ឋ និងបន្តការអភិវឌ្ឍ និងការរីកចម្រើន រុងរឿងលើគ្រប់វិស័យ ប្រកបដោយសុខសន្តិភាព និងស្ថេរភាពសង្គម។
សូមបញ្ជាក់ថា សមិទ្ធផលថ្មីៗ ដែលត្រូវបានកាត់ខ្សែបូរសម្ពោធដាក់ឲ្យប្រើប្រាស់ជាផ្លូវការនាពេលនេះដែរ មានស្រះទឹក១ មានបណ្តោយ ៤០ម៉ែត្រ ទទឹង ៣០ម៉ែត្រ និងជម្រៅ ៥ម៉ែត្រកន្លះ រួមនឹងសមិទ្ធផលផ្សេងៗទៀត សរុបថវិកាអស់ចំនួនជាង ១៥ម៉ឺនដុល្លារ។
ជាមួយគ្នានោះដែរក្នុងពិធីនោះ អ្នកឧកញ៉ា សៀង ណាំ ក៏បានប្រគេននូវថវិកាផ្ទាល់ខ្លួនប្រគេនដល់ព្រះចៅអធិកាវត្តចំនួន ១០លានរៀល, ប្រគល់ជូនលោកគ្រូអ្នកគ្រូ ១លាន ៣សែនរៀល, យាយជិតាជី ៣០០នាក់ ក្នុងម្នាក់ទទួលបាន ក្រណាត់ស ១ដុំ ថវិកា ១ម៉ឺនរៀល និងសិស្សានុសិស្ស ២០០នាក់ ក្នុងម្នាក់ទទួលបាន សៀវភៅ២ក្បាល ប៊ិក២ដើម និងថវិកា ៥.០០០រៀលផងដែរ៕
ដោយ ÷ ពន្លឺ
