ទីតាំងល្បែងជល់មាន់តាមប្រព័ន្ធអនឡាញក្នុងសង្កាត់ទឹកថ្លាមួយកន្លែង មានឥទ្ធិពលខ្លាំងម្លេះ បានជាបើកលេងរាល់ថ្ងៃអាជ្ញាធរ សមត្ថកិច្ចក្នុងមូលដ្ឋានមិនហ៊ានបង្ក្រាបសោះ?

រាជធានីភ្នំពេញ ៖ ទីតាំងបើកលេងល្បែងស៊ីសងមាន់ជល់ និងឡូតូតាមអនឡាញជាច្រើនកន្លែង នៅក្នុង ភូមិបុរីកម្មករ សង្កាត់ទឹកថ្លា ខណ្ឌសែនសុខ កំពុងតែលួចលាក់បង្កប់លេងល្បែងស៊ីសង មាន់ជល់តាមអនឡាញ ខណៈពេលដែលអស់លោកអាជ្ញាធរនិងសមត្ថកិច្ចក្នុងខណ្ឌសែនសុខ  បានរក្សាភាពស្ងៀមស្ងាត់ផ្គើននិងបទបញ្ជារបស់សម្តេចតេជោហ៊ុនសែន ស្តីពីការទប់ស្កាត់និងបង្ក្រាបបទល្មើសល្បែងស៊ីសងនៅទូទាំងរាជធានីខេត្ត។

សូមជម្រាបជូនថា កាលពីថ្ងៃទី ១៧ ខែកញ្ញា ឆ្នាំ២០២២  កន្លងទៅនេះ សម្ដេចតេជោ ហ៊ុន សែន បានចេញបទបញ្ជា ដាច់ណាត់មួយ ឲ្យអភិបាលរាជធានីខេត្ត ទាំង ២៥ ខេត្តក្រុង ត្រូវបិទទីតាំងបនល្បែងសុីសង គ្រប់ប្រភេទ ទាំងអស់ឲ្យខាងតែបាន។

សម្តេចតេជោហ៊ុនសែន បានបញ្ជាក់យ៉ាងច្បាស់ដាច់ណាត់ទៀតថា អាជ្ញាធរនិងសមត្ថកិច្ចស្រុក ក្រុង ខេត្តណា ដែលមិននាំគ្នាទប់ស្កាត់និងបង្ក្រាប បទល្មើសល្បែងស៊ីសង នៅក្នុងមូលដ្ឋានរបស់ខ្លួនទេ អាជ្ញាធរនិងសមត្ថកិច្ចទាំងនោះ និងត្រូវប្រឈមបាត់បង់តំណែងទៀតផង ។

ជាក់ស្តែងនៅថ្ងៃទី ១៩ ខែមេសា ឆ្នាំ ២០២៣ ពលរដ្ឋល្អបានរាយការណ៌មកអង្គភាពអស្កាយញូសិ៍ថា ÷ នៅចំនុចភូមិបុរីកម្មករ សង្កាត់ទឹកថ្លា ខណ្ឌសែនសុខ រាជធានីភ្នំពេញ មានទីតាំងបើកលេងល្បែងភ្នាល់មាន់ជល់តាមប្រព័ន្ធអនឡាញលក្ខណៈទ្រង់ទ្រាយធំខណៈ ក្រុមអ្នកញៀនល្បែងចូលមកលេងល្បែងខាប់ដូចទឹកគ្រឿង ចេញចូលៗដូចគេលេងល្ខោនចឹង តែពុំដែលឃើញមានអាជ្ញាធរ ឬសមត្ថកិច្ចក្នុងមូលដ្ឋានចុះមកបង្ក្រាបម្តងឡើយ។ ដោយហេតុនេះហើយមហាជនបានលើកឡើងថា (កន្ទេលធំបន្លំដេក កន្លែងណាដែលគ្រោះថ្នាក់បំផុត ទីនោះហើយជាកន្លែងដែលមានសុវត្តិភាពបំផុត) ។

ជុំវិញករណីខាងលើនេះប្រជាពលរដ្ឋស្នើសុំដល់ ឯកឧត្តមឃួង  ស្រេង អភិបាលរាជធានីភ្នំពេញ ពិសេសឯកឧត្តម ឧត្តមសេនីយ៍ឯក ស ថេត  អគ្គស្នងការរង និងជាស្នងការដ្ឋាននគរបាលរាជធានីភ្នំពេញមេត្តា ជួយចាត់កម្លាំងក្រោមឱវាទចុះទៅបង្ក្រាបបទល្មើសល្បែងស៊ីសងខុសច្បាប់ខាងលើនេះផងទាន! ដើម្បីរក្សាសុខសុវត្តិភាពជូនប្រជាពលរដ្ឋក្នុងមូលដ្ឋាន ស្របតាមគោលការណ៌ទាំង៧ចំនុចរបស់រាជរដ្ឋា ភិបាល។

អង្គភាពអ្នកសារព័ត៌មានយើងខ្ញុំគ្រាន់តែជាកញ្ចក់ឆ្លុះបញ្ចាំង រិះគន់ក្នុងន័យស្ថាបនា ចូលរួមចំណែកជាមួយរាជរដ្ឋាភិបាល បណ្ដាញសារព័ត៌មាន យើងខ្ញុំរង់ចាំការឆ្លើយបំភ្លឺ គ្រប់ស្ថាប័នពាក់ព័ន្ធគ្រប់ពេលម៉ោងធ្វើការតាមរបបអ្នកសារព័ត៌មានសូមអរគុណ៕ បឋម

ដោយ ÷ វិច្ឆិកា