ខេត្តសៀមរាប ÷ ផ្លូវលំមួយខ្សែ ដែលមានប្រវែងជាង ៣គីឡូម៉ែត្រ ក្នុងឃុំស្រណាល ស្រុកក្រឡាញ់ ខេត្តសៀមរាប ត្រូវបានបើកការដ្ឋានជួសជុលកែលំអរឡើងវិញជាផ្លូវការ នៅព្រឹកថ្ងៃទី២១ ខែមេសា ឆ្នាំ២០២៣នេះ ដើម្បីជាការជួយសម្រួលដល់ការធ្វើដំណើររបស់បងប្អូនប្រជាពលរដ្ឋ ដែលពិធីនេះប្រព្រឹត្តិទៅក្រោមអធិបតីភាពឯកឧត្តម អ្នកឧកញ៉ា សៀង ណាំ អ្នកតំណាងរាស្ត្រមណ្ឌលសៀមរាប រួមនឹងវត្តមានប្រធានក្រុមប្រឹក្សាស្រុក អភិបាលស្រុក ក្រុមការងារចុះជួយមូលដ្ឋានឃុំស្រណាល អាជ្ញាធរមូលដ្ឋាន ព្រះសង្ឃ និងប្រជាពលរដ្ឋជាច្រើនរូបផងដែរ។
លោក សុខ ណារ៉េត អភិបាលស្រុកក្រឡាញ់ បានឱ្យដឹងថាផ្លូវមួយខ្សែនេះ មានប្រវែងសរុប ៣.៨០០ម៉ែត្រ ទទឹង៥ម៉ែត្រ តភ្ជាប់ពីផ្លូវជាតិលេខ៦ ឆ្លងកាត់ភូមិចំនួន៣ ក្នុងឃុំស្រណាល ដែលផ្លូវមួយខ្សែនេះដែរ គ្រោងប្រើប្រាស់ថវិការប្រមាណជិត ២ម៉ឺនដុល្លា ដែលបានមកពីក្រុមការងារខេត្តចុះជួយមូលដ្ឋានឃុំ ស្រណាល រួមនឹងសប្បុរសជននានាតាមរយៈក្រុមការងារ នឹងអនុវត្តការជួសជុលដោយកងវិស្វកម្មសម្ដេចតេជោ ហ៊ុន សែន ។
លោកបន្តទៀតថា ថវិកាដែលបានផ្ដល់សម្រាប់ការស្ថាបនាផ្លូវមួយខ្សែនេះ គឺជាការគិតគូរដល់ជីវភាព និងទុក្ខលំបាក់របស់ប្រជាជនរស់នៅក្នុងឃុំស្រណាលទាំងមូលដែលវាបានផ្ដល់ភាពងាយស្រួលក្នុងការធ្វើដំណើរ និងដឹកជញ្ជូននូវផលិតផលកសិកម្ម ព្រមទាំងជាផ្លូវដែលមានសារៈសំខាន់ ក្នុងការផ្សារភ្ជាប់រវាងពីមូលដ្ឋានមួយ ទៅមូលដ្ឋានមួយទៀត និងពីតំបន់មួយ ទៅតំបន់មួយទៀត។ មានប្រសាសន៍ក្នុងពិធីបើកការដ្ឋាននោះ ឯកឧត្តម អ្នកឧកញ៉ា សៀង ណាំ បានលើកឡើងថា ដោយសារកត្តាសុខសន្តិភាព ស្ថិរភាព និងការរីកចម្រើនលើគ្រប់វិស័យរបស់កម្ពុជា បានធ្វើឱ្យបណ្តាប្រទេសជាច្រើននៅលើសកលលោក បន្តពង្រឹង និងពង្រីកចំណងសាមគ្គីភាព មិត្តភាព និងកិច្ចសហប្រតិបត្តិការកាន់តែជិតស្និទ្ឋថែមទៀតជាមួយកម្ពុជា។ ចំពោះផ្លូវមួយខ្សែនេះ គឺជាសមិទ្ឋផលដ៏មានសារសំខាន់មួយសម្រាប់ប្រជាពលរដ្ឋក្នុងឃុំ ស្រណាល ជាពិសេសស្រុកក្រឡាញ់ទាំងមូល។
ជាមួយគ្នានោះដែរឯកឧត្តម អ្នកឧកញ៉ា សៀង ណាំ ក៏បានអំពាវនាវដល់ប្រជាពលរដ្ឋ ដែលគ្រប់អាយុ និងមានសិទ្ធិបោះឆ្នោត សូមអញ្ជើញទៅចូលរួមបោះឆ្នោតជ្រើសរើសតំណាងរាស្ត្រ នីតិកាលទី៧ ដែលនឹងប្រព្រឹត្តនឹងទៅនៅថ្ងៃអាទិត្យ ទី២៣ ខែកក្កដា ឆ្នាំ២០២៣ ខាងមុខនេះឲ្យបានគ្រប់ៗគ្នា ដើម្បីជ្រើសរើសប្រមុខដឹកនាំគិតគូរពីសុខទុក្ខប្រជាពលរដ្ឋ និងបន្តការអភិវឌ្ឍ និងការរីកចម្រើនរុងរឿងលើគ្រប់វិស័យ ប្រកបដោយសុខសន្តិភាព និងស្ថេរភាពសង្គម៕
ដោយ ÷ ពន្លឺ
