សម្តេចពិជ័យសេនា និងប្រតិភូ ព្រមទាំងថ្នាក់ដឹកនាំខេត្តដង្ហែបុណ្យផ្កាប្រាក់សាមគ្គី ពុទ្ធាភិសេកព្រះនិងកាត់ខ្សែបូរសម្ពោធដាក់ឱ្យប្រើប្រាស់ជាផ្លូវការអាគារសាលាអនុគណក្រុងក្នុងវត្តទេពពោធិវង្ស (ហៅវត្តថ្មី)

ខេត្តសៀមរាប ÷ កាលពីរសៀលថ្ងៃទី ១២ ខែ មេសា ឆ្នាំ២០២៣ ឯកឧត្តម អ៊ាន ឃុន ប្រធានក្រុមប្រឹក្សាខេត្ត និងឯកឧត្តម ទៀ សីហា អភិបាល នៃគណៈអភិបាលខេត្ត ព្រមទាំងថ្នាក់ដឹកនាំ មន្ត្រីរាជការបងប្អូន ប្រជាពុទ្ធបរិស័ទចំណុះជើងវត្តក្នុងខេត្តបានចូលរួមបុណ្យផ្កាប្រាក់សាមគ្គី និង ពុទ្ធាភិសេកព្រះផ្ចាញ់មារដែលផ្តួចផ្តើមឡើងដោយ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងារ រាជរដ្ឋាភិបាល ចុះជួយមូលដ្ឋានខេត្តសៀមរាប បានដង្ហែរអង្គផ្កាប្រាក់ ចូលវត្តទេពពោធិវង្ស (ហៅវត្តថ្មី) ស្ថិតនៅក្នុងភូមិត្រពាំងសេះ សង្កាត់គោកចក ក្រុងខេត្តសៀមរាប។ ការរៀបចំបុណ្យផ្កាប្រាក់សាមគ្គីនេះឡើង គឺដើម្បីជាការរៃអង្គាសបច្ច័យ យកមកកសាងសមទ្ធិផលក្នុងវត្តទេព ពោធិវង្ស ដើមី្បប្រមូលបច្ច័យសាងសង់សាលាអនុគណក្រុងសៀមរាប សម្រាប់បម្រើដល់វិ័ស័យព្រះពុទ្ធសាសនាជូនប្រជាពុទ្ធបរិស័ទចំណុះជើងវត្ត។

សម្តេចពិជ័យសេនា ទៀ បាញ់ បានវេរប្រគេនបច្ច័យបានពីអង្គផ្កាប្រាក់ចំនួន ១១០លានរៀល និង ប្រាក់ដុល្លារចំនួន ១៦ពាន់ដុល្លារដល់ព្រះគ្រូចៅអធិការវត្តនិង បានធ្វើពិធីពុទ្ធាភិសេកព្រះអង្គផ្ចាញ់មារទៅតាមគន្លងប្រពៃណី ព្រះពុទ្ធសាសនា ដើមី្បតម្កល់ ទុកក្នុងអគារសាលា អនុគណ សម្រាប់ព្រះសង្ឃ ពុទ្ធបរិស័ទគោរពប្រតិបត្តិធ្វើបុណ្យទានផ្សេងៗ ។

នៅព្រឹកថ្ងៃទី១៣ខែមេសាឆ្នាំ២០២៣សម្តេចពិជ័យសេនា ទៀ បាញ់ បានអញ្ជើញជាអធិបតីកាត់ខ្សែបូរ សម្ពោធដាក់ឱ្យប្រើប្រាស់ជាផ្លូវការនូវអាគារសាលាអនុគណវត្តទេពពោធិវង្ស។សម្តេចពិជ័យសេនា ទៀ បាញ់ បានវាយតម្លៃខ្ពស់និងចាត់ទុកថាជាសមិទ្ឋផលថ្មីមួយសម្រាប់បំរើឱ្យវិស័យព្រះពុទ្ឋសាសនា និងរួមចំណែកយ៉ាងសំខាន់និងបង្កភាពងាយស្រួលដល់កិច្ចការងាររដ្ឋបាលសង្ឃក្នុងក្រុងសៀមរាប សម្រាប់បំរើឱ្យការងារព្រះពុទ្ឋសាសនាក្នុងការធ្វើទំនាក់ទំនងគ្រប់វត្តអារាម អាជ្ញាធរមានសមត្ថកិច្ចពាក់ព័ន្ឋ និងជាពុទ្ឋិកៈសិក្សាធិការជួយបណ្តុះបណ្តាលធនធានព្រះសង្ឃប្រកបដោយចំណេះដឹង គុណធម៌ ប្រកាន់វិន័យខ្ជាប់ខ្ជួនតាមពុទ្ឋប្បញតិនិងពុទ្ឋានុញ្ញាតិ និងចូលរួមអភិវឌ្ឍ សិល្បៈ វប្បធម៌ប្រពៃណីទំនៀមទម្លាប់ខ្មែរ ថែរក្សា លើកស្ទួយនិងទប់ស្កាត់វប្បធម៌អវិជ្ជមានទាំងឡាយដែលមានផលប៉ះពាល់ដល់វប្បធម៌ជាតិប្រកបដោយមនសិការ។

សម្តេចពិជ័យសេនា ទៀ បាញ់ មានប្រសាសន៍ថា៖តាមនយោបាយឈ្នះ ឈ្នះ និងក្រោមការដឹកនាំប្រកប ដោយគតិបណ្ឌិត របស់សម្តេចតេជោ ហ៊ុន សែន នាយករដ្ឋមន្ត្រី បានខិតខំប្រឹងប្រែងអភិវឌ្ឍវិស័យព្រះពុទ្ឋសាសនាដើម្បីជាប្រយោជន៍ក្នុងការរួមចំណែកពង្រឹងសាមគ្គីភាព ការលើកកម្ពស់វប្បធម៌និងការ យោគយល់គ្នាក្នុងចំណោមពុទ្ឋសាសនិកក៏ដូចជាប្រជាជនកម្ពុជានាពេលបច្ចុប្បន្ននិងទៅអនាគត។ ការសម្ពោធសាលាគណៈក្រុងសៀមរាបនាពេលនេះស្របទៅប្រទេសជាតិមានការរីកចម្រើនលើគ្រប់វិស័យអាស្រ័យដោយយើងរក្សាបាននូវសុខសន្តិភាព ស្ថេរភាពនយោបាយនិងសន្តិសុខដ៏រឹងមាំ បានធានាឱ្យកម្ពុជាសម្រេចបានលទ្ឋផលល្អប្រសើរក្នុងដំណើរការអភិវឌ្ឍសង្គមសេដ្ឋកិច្ចនិងលើកកម្ពស់ជីវភាពរស់នៅរបស់ប្រជាជន ជាមួយគ្នានេះ វិស័យព្រះពុទ្ឋសាសនាក៏ជាវិស័យមួយដែលរាជរដ្ឋាភិបាលបន្តធ្វើការអភិវឌ្ឍន៍ជារៀងរាល់ឆ្នាំតាមរយៈផ្សព្វផ្សាយបង្កើនការយល់ដឹងជូនប្រជាពុទ្ឋបរិស័ទជាពិសេសស្រទាប់ យុវវ័យអំពីតម្លៃវប្បធម៌សិល្បៈប្រពៃណី ទំនៀមទម្លាប់ខ្មែរ។

សម្តេចពិជ័យសេនា ទៀ បាញ់បានអំពាវនាវដល់ប្រជាពលរដ្ឋគ្រប់រូប អាជ្ញាធរមូលដ្ឋានគ្រប់លំដាប់ថ្នាក់ត្រូវចូលរួមការពារសន្តិភាពមិនត្រូវឱ្យសន្តិភាពនេះត្រូវបានបំផ្លាញដោយជនណាម្នាក់ឬបក្សនយោបាយណាមួយនោះទេ ទោះអស់តម្លៃណាក៏ដោយ និងចូលរួមថែរក្សាការពារនូវសមិទ្ឋិផលទាំងឡាយរបស់ជាតិធ្វើយ៉ាងណាឱ្យសមិទ្ឋិផលសម្រេចបានដោយឆ្លងកាត់ការលំបាកនិងឧបសគ្គគ្រប់បែបយ៉ាងទម្រាំបានដូចសព្វថ្ងៃនេះឱ្យបានស្ថិតនៅគង់វង្សជាអមតៈ ជាពិសេសសមិទ្ឋផលជ័យជម្នះ៧មករា១៩៧៩ដែលជាបុព្វបទនៃការនាំមកនូវសន្តិភាពនិងការអភិវឌ្ឍន៏រីកចម្រើនរបស់ជាតិយើងជាដរាបតរៀងមក។

សម្តេចពិជ័យសេនា ទៀ បាញ់ បានស្នើដល់ព្រះសង្ឃ យាយជីតាជី ជួយអប់រំ ហាមប្រាមដាស់តឿនដល់យុវជនកុំឱ្យប្រើប្រាស់គ្រឿងញៀន ព្រោះវានឹងក្លាយជាសោកនាដកម្មសម្រាប់ប្រទេសជាតិយើងនិងសូមចូលរួមអនុវត្តគោរពច្បាប់ចរាចរណ៍ឱ្យកាន់តែមានប្រសិទ្ឋិភាពថែមទៀត ពីព្រោះបច្ចុប្បន្ននេះ ជារៀងរាល់ថ្ងៃប្រជាជនយើងស្លាប់ច្រើនជាងសម័យមានសង្គ្រាមទៅទៀត ក្នុងមួយឆ្នាំៗរហូតដល់រាប់ពាន់នាក់និងអ្នករបួសខូចខាតទ្រព្យសម្បត្តិមួយចំនួនទៀត ផង៕

ដោយ ÷ ពន្លឺ