ប្រជាពលរដ្ឋរងគ្រោះដោយខ្យល់កន្ត្រាក់នៅស្រុកវ៉ារិន បានទទួលអំណោយមនុស្សធម៌ពីសាខាកាកបាទក្រហមកម្ពុជា ខេត្តសៀមរាប

ខេត្តសៀមរាប÷នាព្រឹកថ្ងៃទី១២ ខែមេសា ឆ្នាំ២០២៣ នេះ លោក ចៅ ម៉ៅមុន្នី សមាជិកគណៈកម្មាធិការសាខាកាកបាទក្រហមកម្ពុជា ខេត្តសៀមរាប ចុះជួបសំណេះសំណាលសួរសុខទុក្ខ និងនាំយកអំណោយមនុស្សធម៌ជូនប្រជាពលរដ្ឋរងគ្រោះដោយខ្យល់កន្ត្រាក់កាលពីថ្ងៃទី៦ ខែមេសា ឆ្នាំ២០២៣ កន្លងទៅដែលស្ថិត ក្នុងភូមិសាស្ត្រស្រុកវ៉ារិន ដែលមានឃុំស្រែណូយ .ឃុំល្វាក្រាំង និងឃុំស្វាយស សរុបចំនួន១៥គ្រួសារ (រលំ៣ខ្នង និងរបើកដំបូល១២ខ្នង) ក្នុងពិធីសំណេះសំណាល និងផ្ដល់អំណោយមនុស្សធម៌នេះដែរគឺប្រារព្ធធ្វើនៅវត្តប្រាសាទចន្ទគីរី ក្នុង ឃុំល្វាក្រាំង ។

មានប្រសាសន៍នាឱកាសនោះលោក ចៅ ម៉ៅមុន្នី សមាជិកគណៈកម្មាធិការសាខាកាកបាទក្រហមកម្ពុជា ខេត្តសៀមរាប ក៏បានពាំនាំនូវការផ្ដាំផ្ញើសួរសុខទុក្ខពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏ដូចជាឯកឧត្តម ទៀ សីហា ប្រធានគណៈកម្មាធិការសាខា ដែលតែងតែយកចិត្តទុកដាក់គិតគូរខ្ពស់ចំពោះសុខទុក្ខប្រជាពលរដ្ឋគ្រប់រូប មិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ។ លោកក៏បានសំដែងនូវការសោកស្ដាយជាពន់ពេកចំពោះការខូច ខាតផ្ទះសំបែង ទ្រព្យសម្បត្តិ ដែលនេះជាគ្រោះមហន្តរាយដោយធម្មជាតិ គ្មាននរណាម្នាក់ចង់ជួបប្រទះឡើយ។

លោកចៅ ម៉ៅមុន្នី បានបន្តថា ថ្វីត្បិតតែអំណោយមនុស្សធម៌ដែលបាននាំយកមកចែកជូនបងប្អូននាពេលនេះ មានចំនួនមិនសមល្មមនឹងការខាតបង់របស់បងប្អូន តែក៏អាចជួយសម្រាលទុក្ខលំបាករបស់បងប្អូនបានមួយកម្រិត ហើយក៏ជាការបង្ហាញនូវការយកចិត្តទុកដាក់ចំពោះប្រជាពលរដ្ឋគ្រប់រូបពីសំណាក់ថ្នាក់ដឹកនាំ ពិសេសគឺកាកបាទក្រហមកម្ពុជា ដែលមានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ដូចដែលបានលើកឡើងថា “កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា-មិនទុកនរណាម្នាក់ចោល” និង “ទីណាមានទុក្ខលំបាក ទីនោះមានកាកបាទក្រហមកម្ពុជា”។

ក្នុងឱកាសនោះដែរលោក ចៅ ម៉ៅមុន្នី ក៏បានមានប្រសាសន៍អំពាវនាវដល់ប្រជាពលរដ្ឋទាំងអស់សូមមានការប្រុងប្រយ័ត្នចំពោះភ្លើងទៀន ធូប ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរនេះ ហើយ ពិសេសជាងនេះរាល់ការធ្វើដំណើរសូមគោរពច្បាប់ចរាចរណ៍ ឱ្យបានខ្ជាប់ខ្ជួន ដើម្បើចៀសវាងគ្រោះថ្នាក់ចរារចរណ៍ ដែលអាចបង្កឱ្យមានរបួស ពិការ ឬបាត់បង់ជីវិត នាំឱ្យមានការសោកស្ដាយក្នុងជីវិត។ អំណោយមនុស្សធម៌ដែលបានផ្ដល់ជូននាពេលនោះគឺក្នុង១គ្រួសារៗទទួលបាន គឺគ្រួសារដែល ឆេះ និងរលំផ្ទះ ទទួលបាន មុង១ ភួយ១ សារុង១ ក្រមា១ កន្ទេល១ អាវយឺត១ ស័ង្កសី ១៦សន្លឹក មី១កេស ទឹកត្រី១យួរ ត្រីខ១យួរ ប៊ីចេង១០ កញ្ចប់តូច អំបិល១គីឡូក្រាម ស្កសរ១គីឡូក្រាម អង្ករ៣០គីឡូក្រាម និងថវិកា១សែន៥ម៉ឺនរៀល ចំពោះគ្រួសារដែលរបើកដំបូលផ្ទះគឺទទួលបាន មុង១ ភួយ១ សារុង១ ក្រមា១ កន្ទេល១ អាវយឺត១ ស័ង្កសី ១០សន្លឹក មី១កេស ទឹកត្រី១យួរ ត្រីខ១យួរ ប៊ីចេង១០ កញ្ចប់តូច អំបិល១គីឡូក្រាម ស្កសរ១គីឡូក្រាម អង្ករ៣០គីឡូក្រាម និងថវិកា១សែនរៀល។

ជាមួយគ្នានេះដែរលោក ចៅ ម៉ៅមុន្នី ក៏បានឧបត្ថម្ភបន្ថែមនូវថវិកាផ្ទាល់ខ្លួនរបស់លោក ចំនួន៥ម៉ឺនរៀលផងដែរក្នុង១គ្រួសារៗ៕

ដោយ ÷ ពន្លឺ