ខេត្តសៀមរាប ÷ នៅព្រឹកថ្ងៃទី១២ខែ មេសា ឆ្នាំ២០២៣នេះ នៅខេត្តសៀមរាបក្រសួងទេសចរណ៍ សហការណ៍ជាមួយរដ្ឋ បាលខេត្តសៀមរាបនិងមន្ទីរទេសចរណ៍ខេត្តបានបើកសិក្ខាសាលាស្តីពី”ការពង្រឹងគុណភាពសេវាកម្មទេសចរណ៍ឆ្ពោះទៅអបអរព្រឹត្តិការណ៍ អង្គរសង្ក្រាន្តឆ្នាំ២០២៣” អមជាមួយវគ្គបណ្តុះបណ្តាលស្តីពី “ការពង្រឹងគុណភាពអាជីវកម្មសេវាកម្មទេសចរណ៍លក់ម្ហូបអាហារតាមដងផ្លូវ ឆ្ពោះទៅស្វាគមន៍ព្រឹត្តិការណ៍ SEA Games 2023 និង យុទ្ធនាការ “ឆ្នាំទស្សនាកម្ពុជា ២០២៣ ក្រោមអធិបតីភាព ឯកឧត្តម សុខ សង្វា អនុរដ្ឋលេខាធិការក្រសួងទេសចរណ៍ និង លោក យុន លីនណេ អភិបាលរងខេត្តសៀមរាបដោយមានការអញ្ជើញចូលរួមពីសំណាក់លោកប្រធាន អនុប្រធានតំណាងមន្ទីរអង្គភាពជុំវិញខេត្ត ព្រមទាំងមានការចូលរួមពីអស់លោក លោកស្រី ម្ចាស់ ឬតំណាង សណ្ឋាគារ ផ្ទះសំណាក់ និងអាជីវករលក់ដូរនៅតាមដងផ្លូវជាច្រើនរូបក្នុងក្រុងសៀមរាបអញ្ជើញចូលរួមជាសិក្ខាកាមផងដែរ ។
លោក យុន លីនណេ អភិបាលរងខេត្តសៀមរាបបានមានប្រសាសន៍ថាដោយមានការយកចិត្តទុកដាក់ពីរាជរដ្ឋាភិបាល ពិសេសមានការ ចង្អុលបង្ហាញពីក្រសួងទេសចរណ៍ និងមានការគាំទ្រពីក្រសួង ស្ថាប័នជំនាញពាក់ព័ន្ធ ព្រមទាំងមានកិច្ចសហប្រតិ បត្តិការល្អជា មួយផ្នែកឯកជន និង ដៃគូអភិវឌ្ឍន៍ជាតិ-អន្តរជាតិនានា ពិសេស ការរួមចំណែកគាំទ្រពីប្រជាពលរដ្ឋនៅក្នុងខេត្តសៀមរាប ក៏ដូចជា ភ្ញៀវទេសចរជាតិ-អន្តរជាតិ ធ្វើឲ្យវិស័យទេសចរណ៍ខេត្តសៀមរាប មានការអភិវឌ្ឍន៍រីកចម្រើនពីមួយឆ្នាំទៅមួយឆ្នាំ និងបានចូលរួមចំណែកលើកកម្ពស់ជីវភាពរស់នៅ និងកាត់បន្ថយភាពក្រីក្រ របស់ប្រជាពលរដ្ឋ ។
លោកអភិបាលរងខេត្តបានមានប្រសាសន៍បន្តទៀត ថា ការរៀបចំសិក្ខាសាលាពង្រឹងគុណភាពសេវាកម្មទេសចរណ៍នាថ្ងៃនេះគឺបានបង្ហាញអំពីការយកចិត្តទុកដាក់ របស់រាជរដ្ឋាភិបាលដែលមានក្រសួងទេសចរណ៍ជាសេនាធិការដើម្បីរៀបចំខេត្តសៀមរាប ឱ្យក្លាយជាទីក្រុង ទេសចរណ៍ ដែលមានគុណភាព សុវត្ថិភាព និងមានភាពទាក់ទាញស័ក្តិសមជាប៉ូលទេសចរណ៍ដ៏ល្អ សម្រាប់ប្រទេសកម្ពុជាក៏ដូចជាក្នុងពិភពលោក ព្រមទាំងប្រែក្លាយ គោលដៅទេសចរណ៍ ខេត្តសៀមរាបឱ្យក្លាយជាគោលដៅទាក់ទាញ សម្រាប់ភ្ញៀវជាតិ-អន្តរជាតិមកទស្សនាឲ្យបានកាន់តែ ច្រើនកុះករ បន្ទាប់ពីវិបត្តិកូវីដ-១៩ ក្រោមស្មារតីយុទ្ធនាការ «ទស្សនាស្រុក យើងកម្ពុជាស្អាត ទីក្រុងស្អាត រមណីយដ្ឋានស្អាត សេវាកម្មល្អ និង បដិសណ្ឋារកិច្ចល្អ»។
លោក យុន លីនណេ បានមានប្រសាសន៍បញ្ជាក់បន្ថែមថា ព្រឹត្តិការណ៍អង្គរសង្ក្រាន្ត ត្រូវបានចាត់ទុកថាជាព្រឹត្តិការណ៍កម្រិតអន្តរជាតិនិងថ្នាក់ជាតិបម្រើដល់វិស័យទេសចរណ៍សម្រាប់ឆ្នាំ២០២៣ ប្រភេទព្រឹត្តិការណ៍វប្បធម៌ សាសនាប្រវត្តិសាស្ត្រ ដូចមានបញ្ជាក់ក្នុងវិធានគោលនយោបាយអនុវត្តយុទ្ធនាការ “ឆ្នាំទស្សនាកម្ពុជា ២០២៣” និងរួមចំណែកកសាង និងបង្កើនទំនុកចិត្តសម្រាប់ភ្ញៀវទេសចរជាតិ និងអន្តរជាតិផងដែរ។
មានប្រសាសន៍បើកសិក្ខាសាលានាពេលនោះដែរ ឯកឧត្តម សុខ សង្វារ អនុរដ្ឋលេខាធិការក្រសួងទេសចរណ៍ បានលើកឡើងថា ការបើកសិក្ខាសាលា នាពេលនេះនឹងឆ្លុះបង្ហាញនូវទិដ្ឋភាពសំខាន់ៗមួយចំនួនតាមរយៈប្រធានបទដូចខាងក្រោម ៖ គឺមន្ទីរទេសចរណ៍ខេត្តសៀមរាបនឹងលើកបង្ហាញជូននូវរាល់សកម្មភាពដែលអង្គភាពមួយនេះបានអនុវត្តក្នុងដែនសមត្ថកិច្ចរបស់ខ្លួនផង និងក្នុងនាមជាកិច្ចសហការ ផង សំដៅសម្រេចបាននូវ “ការពង្រឹងគុណភាពសេវាកម្មទេសចរណ៍ក្នុងខេត្តសៀមរាប” ជារួម និងជាពិសេសសម្រាប់ព្រឹត្តិការណ៍ធំៗដែលនឹងឈានចូលមកដល់ ដូចជា ព្រឹត្តិការណ៍អង្គរសង្រ្កាន្តឆ្នាំ២០២៣, ព្រឹត្តិការណ៍ប្រកួតកីឡាអាស៊ីអាគ្នេយ៍ (SEA Game) លើកទី៣២ ដែលនឹងមានវិញ្ញាសារប្រកួតមួយចំនួននឹងប្រារព្ធនៅខេត្តសៀមរាប .ទី២គឺ ប្រធានបទទី២ “កាតព្វកិច្ចដាក់បង្ហាញបញ្ជីរាយនាមសេវាកម្មរបស់អាជីវកម្មសេវាកម្មទេសចរណ៍ដោយមានភ្ជាប់ជាមួយតម្លៃ” ដែលវាគ្មិននឹងបញ្ជាក់លម្អិត អំពីព័ត៌មាន និងលក្ខខណ្ឌរៀបចំបញ្ជីរាយនាមសេវាកម្មរបស់អាជីវកម្មសេវាកម្មទេសចរណ៍ដោយមានភ្ជាប់ជាមួយតម្លៃ ដូចដែលបានកំណត់ក្នុងសារាចរណ៍ណែនាំលេខ ០០២ សរណន.ចុះថ្ងៃទី១៧ ខែមីនា ឆ្នាំ២០២៣ ស្ដីពីការរៀបចំ ដាក់តាំងបង្ហាញ បញ្ជីរាយនាមសេវាកម្មរបស់អាជីវកម្មសេវាកម្មទេសចរណ៍ដោយមានភ្ជាប់ជាមួយតម្លៃ និងទី៣គឺបង្ហាញអំពីសក្តានុពលម្ហូបអាហារកម្ពុជា ដែលអង្គការទេសចរណ៍ពិភពលោកបានទទួលស្គាល់ថា“ម្ហូបអាហារជាភាពទាក់ទាញទេសចរណ៍”។ ហើយចំពោះការលក់ដូរតាមដងផ្លូវក៏ជាផ្នែកមួយនៃភាពទាក់ទាញទេសចរណ៍ផងដែរប្រសិនបើយើងអនុវត្តត្រឹមត្រូវតាមនិយាមនិងស្តង់ដាប្រតិបត្តិត្រឹមត្រូវ។
ឯកឧត្តម សុខ សង្វារ ក៏បានសំណូមពរឱ្យអាជីវករទាំងអស់ ត្រូវមានបញ្ជីរាយនាមតម្លៃសេវាកម្ម ជៀសវាងមានភាពមិនស្របគ្នារវាងអ្នកទិញនិងអ្នកលក់ទៅលើបញ្ហាតម្លៃ ដែលយើងអាចសង្កេតឃើញមានការជជែកគ្នាច្រើនអំពីបញ្ហាតម្លៃនេះ។ ក្នុងឱកាសនោះដែរ ឯកឧត្តមអនុរដ្ឋលេខាធិការក្រសួងទេសចរណ៍ ក៏បានថ្លែងអំពាវនាវដល់វិស័យឯកជន និងគ្រប់ភាគីពាក់ព័ន្ធទាំងអស់ត្រូវចូលរួមសហការ ដើម្បីត្រៀមស្វាគមន៍ភ្ញៀវទេសចរជាតិ និងអន្តរជាតិ ដែលមកកម្សាន្តកម្ពុជា និងជាពិសេសគោលដៅទេសចរណ៍ខេត្តសៀមរាបក្នុងឱកាសព្រឹត្តិការណ៍អង្គរសង្ក្រាន្ត ស្របទៅតាមដំណាក់កាលទី២នៃការជំរុញ និងការស្តារឡើងវិញនៃវិស័យទេសចរណ៍នៃផែនទីចង្អុលផ្លូវស្តីពីផែនការស្តារនិងលើកស្ទួយវិស័យទេសចរណ៍កម្ពុជា ក្នុង និងក្រោយវិបត្តិជំងឺកូវីដ-១៩ ហើយក៏ដូចជាឆ្ពោះទៅស្វាគមន៍ព្រឹត្តិការណ៍ ស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣ ដែលត្រូវបានកំណត់ដោយរាជរដ្ឋាភិបាលយកព្រឹត្តិការណ៍កីឡាទេសចរណ៍ដ៏ធំនេះដាក់ចេញជាយុទ្ធនាការ “ឆ្នាំទស្សនាកម្ពុជា ២០២៣”៕
ដោយ ÷ ពន្លឺ
