ខេត្តសៀមរាប ÷ នៅថ្ងៃទី១១ ខែមេសាឆ្នាំ២០២៣ ឯកឧត្តម ទៀ សីហា អភិបាលនៃគណៈអភិបាលនិងជាប្រធានគណៈបញ្ជាការឯកភាពរដ្ឋបាលខេត្តសៀមរាប និងឯកឧត្តម អ៊ាន ឃុន ប្រធានក្រុមប្រឹក្សាខេត្តនិងគណៈប្រតិភូខេត្ត បានអញ្ជើញ ចុះសួរសុខទុក្ខកងទ័ពប្រចាំសមរភូមិមុខ ដោយបាននាំទៅជាមួយនូវគ្រឿងឧបភោគបរិភោគ និងថវិកាមួយចំនួន ជាអំណោយរដ្ឋបាលខេត្ត ជូនដល់នាយទាហានពលទាហានកងពលតូចអន្តរាគមន៍លេខ៥នៃកងពលធំអន្តរាគមន៍លេខ២ប្រចាំទិសទី៣ ឈរជើងនៅ ក្នុងភូមិសាស្រ្តស្រុកបន្ទាយអម្ពិលខេត្តឧត្តរមានជ័យ ជាអង្គភាពសម្ពន្ឋ័មេត្រីភាពរបស់ខេត្ត និងជូនដល់អង្គភាព ទ័ពប្រចាំសមរភូមិមុខ យោធភូមិភាគទី៤ ប្រចាំទិសទី២ និង អង្គភាពវរៈសេនាតូចលេខ១ ចំណុះតំបន់ប្រតិបត្តិការសឹករងសៀមរាប ឈរជើងតំបន់អូរកូន តឹង ស្ថិតភូមិត្រពាំងក្រសាំង ឃុំ ស្រែណូយ ស្រុកវ៉ារិន ខេត្តសៀមរាប តំបន់ព្រៃស្អាក ក្នុងឱកាសបុណ្យចូលឆ្នាំថ្មី ឆ្នាំថោះ បញ្ចស័ក ព.ស ២៥៦៧ ប្រពៃណីជាតិខ្មែរយើងខាងមុខ ។ សម្ភារៈអំណោយនិងគ្រឿងឧបភោគបរិភោគ បានផ្តល់ជូនកងពលតូចអន្តរាគមន៍លេខ៥ នូវឧបភោគបរិភោគ ចំនួន ២៨មុខ និង ប្រេងម៉ាស៊ូត ១ពាន់លីត្រ,ស័ង្កសី ២ពាន់សន្លឹក ,តង់ ០១ផ្ទាំង ស្រាបៀរ ១០០កេស និង ថវិកា ២០លាន រៀល និងចែកជូនកងទ័ពម្នាក់ៗ ២ម៉ឺនរៀល ព្រមទាំងឧបត្ថម្ភដល់កងពលធំអន្តរាគមន៍លេខ២ នូវស្រាបៀរ ៥០កេស ថវិកា៦លានរៀល។ និងបាន ជូនដល់ទីបញ្ជាការប្រចាំទិសទី២ នៃយោធភូមិភាគទី៤ នូវស្រា បៀរ ៥០កេស ថវិកា ៥លានរៀល មី ៤០កេស គោ ១ក្បាល, អង្គភាពវរៈសេនាតូចលេខ១ មានគ្រឿងឧបភោគបរិភោគ ចំនួន ២២មុខ និងថវិកា សរុប ១២លានរៀល ស្រាបៀរ ៥០កេស ,ប្រេងម៉ាស៊ូត ៥០០លីត្រ ពុយដាក់ប្រេង ០៥ពុយ និង តង់០១ ក្នុងនោះបានចែកជូនយោធិនម្នាក់ៗ៤ម៉ឺនរៀលផងដែរ ។
មានប្រសាសន៍សំណេះសំណាលជាមួយមេបញ្ជាការ មេបញ្ជាការងនិងយោធិនទាំងពីរគោលដៅ ឯកឧត្តម ទៀ សីហា បានក្រើនរំលឹក ដល់នាយទាហានពលទាហានទាំងអស់ ទោះបីស្ថានការណ៍នៅតាមបណ្តោយព្រំដែនកម្ពុជា ថៃ មានសភាពស្ងប់ស្ងាត់ យ៉ាងណាក៏ដោយ បងប្អូនត្រូវយកចិត្តទុកដាក់ ក្នុងការហ្វឹកហាត់ឲ្យបានជាប្រចាំ នូវយុទ្ធវិធីយុទ្ធសាស្រ្តរបស់កងទ័ព ត្រូវត្រៀមលក្ខណៈនៅគ្រប់ពេលវេលា ក្នុងការជួយអន្តរាគមន៍ពេលមានសភាពការណ៍ណាមួយកើតឡើង ។
ឯកឧត្តមមានប្រសាសន៍ថា៖ ក្រោមអនុសាសន៍របស់សម្តេចតេជោ នាយករដ្ឋមន្ត្រី បានបំផុសឲ្យមានចលនាចងសម្ព័ន្ធមេត្រីភាពរវាងសមរភូមិក្រោយ និង មួយសមរភូមិមុខ ក្នុងកាលៈទេសៈមួយ ដើម្បីពង្រឹង ខឿនការពារជាតិ ការពារប្រជាជន ។ ឯកឧត្តមបានបញ្ជាក់ថា ការសួរសុខទុក្ខដល់អង្គភាពទ័ពសម្ព័ន្ឋមេត្រីភាពតាមព្រំដែន ជាមួយរដ្ឋបាលខេត្តសៀមរាប ត្រូវបានអាក់ខាន ជាងបីឆ្នាំ ដោយបញ្ហាជម្ងឺកូវិដ១៩ តែចំពោះកិច្ចទំនាក់ទំនង និងសហប្រតិបត្តិការនៅរក្សាបានល្អប្រសើរ ។ ឯកឧត្តមក៏បានផ្តាំផ្ញើដល់បងប្អូនកងកម្លាំងទាំងអស់ត្រូវយកចិត្តទុកដាក់ខ្ពស់ទៅ លើបញ្ហាសុខភាព អនាម័យ និង ធ្វើការកសាង ជម្រកក្នុងអង្គភាព ព្រមទាំងធ្វើការដាំដុះដំណាំបន្លែបង្កា និង ចិញ្ចឹមសត្វ ដើមី្បផ្គត់ផ្គង់ដល់ជីវភាពកងទ័ព ក្នុងអង្គភាព និងគ្រួសារកងទ័ព ជាពិសេសលើការគ្រប់គ្រង និងថែរក្សានូវគ្រឿងបំពាក់សម្ភារៈយោធូ បករណ៍កងទ័ពឲ្យបានល្អ និងក្រៅពីភារកិច្ចស្នូល កងទ័ពក៏មានភារកិច្ចចូលរួមការពារមូលដ្ឋាន ភូមិឃុំមានសុវត្ថិភាព ជាពិសេសក្នុងឱកាសបុណ្យចូលឆ្នាំប្រពៃណីយ៌ខ្មែរ ដែលនឹងឈានមកដល់នៅប៉ុន្មានថ្ងៃទៀតនាពេលខាងមុខនេះ នៅតាមបណ្តាទីវត្តអារាម ក៏ដូចជាទីប្រជុំជននានា ត្រូវចូលរួមសហការជាមួយសមត្ថកិច្ចមូលដ្ឋាន ដើម្បីការពារសន្តិសុខ រក្សាសណ្ឋាប់ធ្នាប់ជូនប្រជាពលរដ្ឋ ក្នុងពេលកម្សាន្តសប្បាយ ៕
ដោយ ÷ ពន្លឺ
