សម្តេចព្រះឧត្តមបញ្ញា ដូង ផង់ និង ឯកឧត្តម សៀង ណាំ និមន្តនិងអញ្ជើញកាត់ខ្សែបូរសម្ពោធព្រះវិហារនិងសមិទ្ធិផលនានាក្នុងវត្តប្រាសាទត្រាងស្រុកស្វាយលើខេត្តសៀមរាប

ខេត្តសៀមរាប ÷ វត្តរតនមុនីសុវណ្ណចន្ទ្រា ( ហៅវត្តប្រាសាទត្រាង)ស្ថិតនៅភូមិត្រពាំងស្វាយ ឃុំស្វាយលើ ស្រុកស្វាយលើខេត្តសៀមរាបបានសាង សង់រួចរាល់នូវព្រះវិហារ ព្រមទាំងសមិទ្ធិផលនានាជាច្រើនទៀត និងបានកាត់ខ្សែបូរសម្ភោធដាក់ឱ្យប្រើប្រាស់ជាផ្លូវការនៅថ្ងៃទី០៨ខែមេសាឆ្នាំ២០២៣ ក្រោមព្រះអធិបតីភាព សម្តេចព្រះឧត្តមបញ្ញា កិត្តិបណ្ឌិត ដូង ផង់ ព្រះអគារធិការរងនៃអគារធិការដ្ឋានពុទ្ឋិកសិក្សាជាតិនិងជាចៅអធិការវត្តព្រែកប្រាំង និងអធិបតីភាព ឯកឧត្តម ឧកញ៉ា សៀង ណាំ តំណាងរាស្ត្រមណ្ឌលសៀមរាប និងវត្តមាន លោកអភិបាលស្រុក អាជ្ញាធរមូលដ្ឋាន ដូនជី តាជី លោកគ្រូអ្នគ្រូ សិស្សានុសិស្ស និងប្រជាពលរដ្ឋក្នុងមូលដ្ឋានយ៉ាងច្រើនកុះករ។

សមិទ្ឋផលថ្មីជាគរុភ័ណ្ឌវត្តនេះ មានដូចជា ព្រះវិហារថ្មី ឈាបនដ្ឋាន ចាក់ដីបំពេញវត្ត បំពាក់អំពូលសូឡា កសាងអណ្តូងទឹក សរុបថវិកាអស់ជាង៦៥ម៉ឺន៣ពាន់ដុល្លារ ជាមួយគ្នានោះក៏នៅខ្វះថ្លៃជាងនិងសម្ភារៈសំណង់ជាង៣ម៉ឺនដុល្លារ។ សមិទ្ឋផលទាំងនេះ សម្រេចបាន គឺបានការសហការជួយឧបត្ថម្ភគាំទ្រពីបណ្ដាពុទ្ធបរិស័ទចំណុះជើងវត្តទាំងអស់សប្បុរសជននៅក្នុងស្រុក ខេត្ត ទូទាំងប្រទេស នេះបើតាមរបាយការណ៍របស់ ព្រះតេជគុណ ស្រស់ វិធាន ព្រះគ្រូចៅអធិការវត្តប្រាសាទត្រាង ។

សម្តេចព្រះឧត្តមបញ្ញា កិត្តិបណ្ឌិត ដូង ផង់ មានសង្ឃដីកាកោតសរសើរចំពោះព្រះចៅអធិការ ព្រះសង្ឃ គណៈកម្មការ អាចារ្យវត្តកំបោរអ អាជ្ញាធរដែនដី បងប្អូនប្រជាពលរដ្ឋ និងពុទ្ធបរិស័ទគ្រប់មជ្ឈដ្ឋានដែលបានសាមគ្គី ចូលរួមចំណែកជាកម្លាំងកាយ កម្លាំងចិត្ត និងទ្រព្យធនធ្វើឲ្យការកសាងព្រះវិហារនេះបានសម្រេចរួចរាល់ជាស្ថាពរ។ សម្តេចព្រះឧត្តមបញ្ញា បន្តថា៖ប្រទេសកម្ពុជាបានជួបនូវវិបត្តិសង្គ្រាមស៊ីវិលរ៉ាំរ៉ៃអស់ជាច្រើនទសវត្ស ជាពិសេសក្នុងអំឡុង៣ឆ្នាំ ៨ខែនិង២០ថ្ងៃក្នុងរបបប៉ុល ពត កម្ពុជាទាំងមូលរងនូវទុក្ខសោកនាដកម្មយ៉ាងធំធេងដែលមិនត្រឹមតែប្រជា ជនសាមញ្ញដែលត្រូវរបបនោះកាប់សម្លាប់ទេ សូម្បីព្រះសង្ឃ និងហេដ្ឋារចនាសម្ពន្ឋ័សង្គមជាតិក៏ត្រូវទទួលរងនូវការបំផ្លិចបំផ្លាញស្ទើរតែសូន្យ ព្រះសង្ឃ វត្តអារាមនិងសាសនាផ្សេងៗទៀត ក៏ត្រូវទទួលរងនូវការកាប់សម្លាប់និងបំផ្លិចបំផ្លាញស្ទើរគ្មានសល់។ តែដោយសារគុណថ្ងៃរំដោះ៧មករាឆ្នាំ១៩៧៩ យើងបានរស់រានមានជីវិតឡើងវិញ ប្រមុខដឹកនាំប្រទេសបានស្វះស្វែងរកសន្តិភាព និងការអភិវឌ្ឍប្រទេសឡើងវិញជាបន្តបន្ទាប់ ។ កម្ពុជាក្រោមកិច្ចដឹកនាំប្រកបដោយភាពឈ្លាសវៃ និងក្រោមគោលនយោ បាយឈ្នះ ឈ្នះ របស់សម្តេចអគ្គមហាសេនាបតីតេជោ ហ៊ុនសែន នាយករដ្ឋមន្ត្រី នៅឆ្នាំ១៩៩៨ បាននាំមកនូវសុខសន្តិភាព បង្រួបបង្រួមជាតិ ផ្សះផ្សារជាតិក្រោមដំបូលសន្តិភាពតែមួយ រួមគ្នាធ្វើការអភិវឌ្ឍរីកចម្រើនលើគ្រប់វិស័យដូចឃើញជាក់ស្តែងទាំងអស់គ្នានាពេលបច្ចុប្បន្ន ។

សម្តេចព្រះឧត្តមបញ្ញា បានលើកទឹកចិត្តឲ្យបងប្អូនប្រជា ពុទ្ធបរិស័ទទាំងអស់ ត្រូវជឿជាក់លើការដឹកនាំរបស់រាជរដ្ឋាភិបាលកម្ពុជាដែលមានសម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី ដែលមានគោលនយោបាយច្បាស់លាស់ និងដឹកនាំប្រទេសប្រកបដោយភាពរីកចំរើនលើគ្រប់វិស័យ ប្រទេសជាតិទទួលបានសុខសន្តិភាព សុវត្ថិភាព និង ការអភិវឌ្ឍន៍តាំងពីទីប្រជុំជនរហូតដល់ទីជនបទដាច់ស្រយាល និងនាំគ្នាការពារ ថែរក្សាសន្តិភាពដែលរកបានដោយលំបាកនេះកុំឱ្យបាត់បង់។

ឯកឧត្តម ឧកញ៉ា សៀង ណាំ បានមានប្រសាសន៍ថា សមិទ្ធិផលថ្មីៗទាំងនេះ ជាផ្នែកមួយដ៏សំខាន់រួមចំណែកក្នុងការរីកចំរើននៃវិស័យពុទ្ធចក្រ ដែលត្រូវបានកំណត់ដោយរដ្ឋធម្មនុញ្ញថាព្រះពុទ្ឋសាសនាជាសាសនារបស់រដ្ឋ។ ទន្ទឹមនឹងនេះ វិស័យពុទ្ឋចក្រនិងវិស័យអាណាចក្របានដើរទន្ទឹមគ្នាពុំអាចខ្វះមួយណាបានឡើយ ហើយចក្រទាំងពីរនេះចូលរួមជួយស្តារនិងអភិវឌ្ឍន័សង្គមជាតិឱ្យបានរីកចំរើន៕

ដោយ ÷ ពន្លឺ